1 KORINT 3 - DAÜLANGPÜ LAIHING (BSI)

Attoi kü Hanteipü

¹ Hanangkü jeihinaü hatü nyahinaüthü, ngei am kü laangha shennyakthü kü kei nevai, shejao phai shennyakthü, Khrista kü aküngnaühathü kü kei enyeih.

² Ngei am kü vaanpü hahying nevai, amma mon yingpeih; mehenangkü amphongü vaanpü hahying hahhen temei neshiü. Shaang dangkao am temei neshiü;

³ mehenangkü am shaang thahshi phailei nyüke. Am khongkü mükhühteipü, hatü dehilao nyupü thahshi amphongü kahdoknyü phai, hatü hangkui lümpükei nyunyu nevaipü je?

⁴ Mehenangkü hüki, “Ngeiyü Paul khong” shei enyüke, hatü lebü hüki, “Ngeiyü Apollos khong” shei enyüke. Shejema amphongü kahdoknyü shennyak nevaipü je?

⁵ Shejema Apollos meheang? Paul meheang? Henjiphen Shembüpai dou dükhen shuohpü am hinglempü lemei müpü chongphobü nyi mon.

⁶ Ngei sheipeih, Apollos-i yung shihpeih, shejao Kahvangi longhüpeih.

⁷ Hanangkü sheipü shennyak nevaijü yung shihpü nyi payü meheyao nevai, shejao hapa longhüpeyü Kahvang mon.

⁸ Sheibü hatü yung shihpü nyiphen aihük mükhong nyüpeih, hatü jijiphen laophülei dou aimü lat danghen.

⁹ Mehenangkü henjiyü chemi dou dükpü Kahvang chongphobü nyi; amphongü Kahvangei kah, Kahvangei shem.

¹⁰ Kahvangi ngei kü shuohpü phahji aimü lahhinpü shem vebü keiha ngei chongnyiam lingtepih, hatü ha shangkü hanei ami venyüke. Shejao shem vebü peüi hapa shangkü mekei venya kenhinghen vongbong.

¹¹ Mehenangkü lingtükpü chongnyiam, Jisu Khrista mü lenei üpaiyao lebü chongnyiam linghen neaok.

¹² Hanei ami hapa chongnyiam shangkü hon, ngin, douvang yaong, pü, thüng hatü hahtang yah-ei vejema,

¹³ büpalei dou meheshang eedainyeih; mehenangkü Khristalei Nyih-i ha shakei vamhühen, hatü hapayü aw homei shakei vamhühen, hatü peüi mepa keipü dou dükpa aw homei dokhen.

¹⁴ Mepa hapa chongnyiam shangkü vetepa, ha meishi nyujema shem vebüi laklei danghen.

¹⁵ Shejao hapa dou awi shamtükjema, shem vebü lomohhen, shejao shem vebü payü aw kübü yangpükei yanghen.

¹⁶ Amphongü Kahvangei phopshem, hatü Kahvang Laangha amphong kü nyunyeih shei nenyingnyu je?

¹⁷ Hanei ami Kahvangei phopshem mangtükjema, Kahvangi hapa shennyak mahtükhen. Mehenangkü Kahvangei phopshemü daülangpü, hatü amphongü hapa phopshem nyüke.

¹⁸ Am laophü nyingi telutelemhah. Hapa den kü amphong nahpeih shei deihjema, am nahpü am leihen shingvaishi ngapa leihen vongbong.

¹⁹ Mehenangkü hapa kahdoknyü kihikonü Kahvang touei ngadou nyüke. Mehenangkü ha nyangei nyüke: “Büpai nahpüthü jomei glüp mü yeplangnyeih,”

²⁰ hatü shao, “Shembüpai nahpüthülei chudeih yahlak neshiü shei nyingei nyüke.”

²¹ Hanangkü üpaiyao shennyaki dükaokpü nangkü techangmei. Mehenangkü dou peü ammei,

²² Paul vaijao, Apollos vaijao, Cephas vaijao, kahdoknyü vaijao, yangnyu vaijao, dipü vaijao, shaangpü vaijao, hatü ngoikahen vaijao peü amphongei,

²³ hatü amphongü Khristalei hatü Khristayü Kahvangei.