1 KORINT 2 - DAÜLANGPÜ LAIHING (BSI)

Shophang kü Appü Khrista

¹ Jeihinaü hatü nyahinaüthü, mechem ngei am touei peipa, ammi neyaohen mü ngei am kü shahjo longpü nevaijü kihikon shah venei nepei.

² Jisu Khrista hatü büpa shophang kü appü jung mü lenei meheyao am kü nenyinghühen deihpeih.

³ Ngei am touei wong nekohpü, nyempü hatü kheüpü kü peipeih.

⁴ Ngei epüsheipü hatü venpü peü yawhpüyangpü kihikon shah nevai, shejao Laangha hatü ngan hupü kü nyupeih,

⁵ shejüang am hinglempü hangkulei kihikon shangkü nevai, shejao Kahvangei ngan shangkü nyuhen.

Kahvangei Kihikon

⁶ Shejao hapa den kübü kihikon, nevaijü mahdaihen demtükpü vanglem lembüthülei kihikon nevaijao hami behethü mü kihikon shah enyeih.

⁷ Shejao hami joshi hatü jaoshi nyupü Kahvangei kihikon jung enyeih, hatü hapayü denshemthü pangshekü Kahvangi jenei müknyinshekhang shingvaishi jetükpeih.

⁸ Hapa den vanglem lembüthü üpaiyao ha nenying; jomi paoh ha nyinglang meyü jomi müknyinshekhang Shembüpa shophang kü ne-aptükhen vaipeih.

⁹ Shejao nyangei nyupükei, “Kahvangi büpai bampüthü kü mehe temei nyu, hayü mepa mükiyao ne-ee, mepa dhaongiyao nedan, nevaijü üpa hangkulei mongdang kao deih-ei nele.”

¹⁰ Ha douthü Kahvangi Laangha homei ham kü shakei vamhüpeih; mehenangkü Laanghai lemphü yemnyeih; Kahvangei chüpü douthüao yemnyeih.

¹¹ Mehenangkü hangku hüki laophü kü nyupü laangha homei mon hangku hük meheang ha nyingnyeih. Hapa keiha Kahvang Laangha homei mon hingshangi Kahvangü meheang ha nyingnyeih.

¹² Shaang jenphongü kahdoknyü laangha neyah, shejao Kahvangi jen kü shuohpü thinthothü nyinghen Kahvang leipü Laangha yahpeih.

¹³ Hatü hami hangkulei kihikoni nyuhphopü shahthüi ha douthü jung ne-enyih, shejao laangha shennyakthü kü Laanghai nyuhpü laangha douthü nih-ei enyeih.

¹⁴ Üam kü Laangha nenyu, Kahvang leipü Laangha thinthothü danghen neaok; mehenangkü hathüyü jom shingvaishi ngadou, hatü hathü jung jomi nenyingaokpih; mehenangkü jomphongü meheshang laangha kü nyingdaiteke.

¹⁵ Laangha shennyakthüi dou peü yaoei shahphenaoknyeih, shejao üpaiyao jom kü shahphenhen neaoknyih.

¹⁶ Laihingi enyüke: “Büpa kü nyuh-aokhen mü Shembüpalei mong nyingpü üpa nyüpa?” Shejao ham kü Khristalei chudeih mongdang nyüpeih.