1 KORINT 16 - DAÜLANGPÜ LAIHING (BSI)

Vaipüthü Shing Thaipükukpü

¹ Shaang vaipüthü shing moila thaipü nangkü: Ngei Galatia attoithü kü mehe epa, ha düktuh.

² Hatyang kü shongpü nyih kü am peüi laophü kü peipü ittü lop yowei tuhtuh; shejüang ngei peishingkü lop nethaihen.

³ Mechem ngei ngoikahen, ammi mong hahpü shennyak hanei lai mü ammei moila Jerusalemei yah-ei leihen nangkü shomphahen.

⁴ Ngeiyao omshi daihen meihen vaijema jomphongao ngei mü daihen.

Paulei Yendai Küpjan

⁵ Macedonia homei daipheikü ngei am thümhen; mehenangkü ngei Macedonia homei daihen deihshi nyüpeih,

⁶ hatü üpai nyingpa, ngei am mü kanja themhen aok, nevaijü ünyü yangkü themhen aokpeih; shejüang ngei melemei daihen, ammi ngei shomhen.

⁷ Ngei shaang dailem kü am mü neponghüang; Shembüpai mongjema ngei am mü kansho hük themhen deihnyeih.

⁸ Shejao Pentecost nyih thahshi ngei Ephesialei themhen;

⁹ mehenangkü ngei shingvaishi dou meishi dükaokhen shaden bhashahshi apei nyüke, hatü vepathü longi nyüke.

¹⁰ Timoti peiküjema büpa am mü mehe kao nenyemi tuhtuh; mehenangkü ngei keiha büpai Shembüpalei dou longi düknyüke;

¹¹ hanangkü üpaiyao büpa teyakphong. Mehenangkü jeihinaüthü mü büpaao ngei touei peikahen shei omdannyeih; hanangkü büpa meishi jingei shomte.

¹² Shaang jenei jeihinaü Apollos nang keyü, ngei büpa kü jeihinaüthü mü am thümhen eshuohpeih, shejao büpa shaang peihenü lanshei nemongnyu. Hepak mei dangjü büpa peikahen.

Dohpü Shahjang hatü Selam

¹³ Thashimashi nyutuh, vaipü kü wong kohshi yaongtuh, am monglongtuh hatü wong kohtuh.

¹⁴ Ammi dükpü peü bampai düktuh.

¹⁵ Shaang, jeihinaü hatü nyahinaüthü, Akhaia kü shongei mong leppeyü Stephanas am shemong nanglakthü khih, hatü jomi vaipüthülei dousho kü lanei shuohpü ammi nyingei nyüke.

¹⁶ Jeihinaüthü, hapa keipü shennyaki müpü pheikü dou dükpüthü peü mütuh shei ngei enyeih.

¹⁷ Stephanas, Fortunatus hatü Akhaikus hathü peiküpü kü ngei mongongnyeih; mehenangkü jomi am neshiüpü kaw thapteke,

¹⁸ hatü jomi am kao hatü ngei kao mongdhüng vamhüteke. Hapa keipü shennyakthü nyingei yahte.

¹⁹ Asia kü nyupü attoithüi selamja. Aquila hatü Priska nyi mü jomei shemei nyupü attoi ami Shembüpa men kü am kü selamja.

²⁰ Jeihinaü hatü nyahinaüthü peüi selamja. Daülangpü om kü jüpteipai hüki hük mü selam shihteituh.

²¹ Ngei, Pauli hapa lai ngelei laki nyangnyeih.

²² Shembüpa kü nebampü shennyakü thaüvaütüktuh. Maranatha– Oh hamei Shembüpa, yiükei!

²³ Shembüpa Jisui bampü am mü nyute.

²⁴ Khrista Jisu kü ngei bampü am peü mü nyute.