1 KORINT 15 - DAÜLANGPÜ LAIHING (BSI)

Khrista Yangei Leipü

¹ Jeihinaü hatü nyahinaüthü, ngei am kü baongpü shahjangmei mepa ammi yah, hatü ha kü am yaongshi nyüpa, hapa ngei shao am kü shaang ehünyüke.

² Ngei am kü venpü shah kü wongshongi shümjema, ammi angkü vaipü nevaiphei keyü hapa shahjangmei homei am yangteke.

³ Mehenangkü ngei mehe dang, ha nyokei shongpü shongnyü vaishi ngei am kü jaiyei shuohtepih: hapayü Laihing kü nyupükei jenei mang shing Khrista di,

⁴ hatü büpa mahng vü, hatü Laihing kü nyupükei nyih jempabü kü yangei lei,

⁵ hatü büpa Cephas touei vam, hatü hapheikü anpünyi touei vam;

⁶ hapheikü hepak hük kü jeihinaü hatü nyahinaüthü jom kho nga dok kü nyeishi nyupü touei vam; hanei am didaijao longshi shing yemmü nyüke.

⁷ Hapheikü büpa Jakob touei vam, hapheikü phongshanthü peü touei vam.

⁸ Shompülei nelomi bühpükei nyupü ngei kao vamei huteke.

⁹ Mehenangkü ngeiyü phongshanthü khongkü peü mü maanpü, phongshan shei nyükhen neshangpü; mehenangkü ngei Kahvangei attoi kü shüveihampeih.

¹⁰ Shejao Kahvang phahji homei ngei shaang mehe nyu ha hih, hatü büpalei phahji ngei shingvaishi angsha neleidai. Halei meyü jomphong peü mü ngeiang nyeishi kheyei dükpeih– hapayü ngei nevai, shejao ngei mü nyupü Kahvang phahji homei.

¹¹ Hapayü ngei vaijao, jomphong vaijao hami ha chongvennyeih hatü ha kü am hinglempeih.

Dipü Kübü Yangei Leipü

¹² Shaang Khrista dipü kübü yangei leipeih shei chongvenjü mehekei amphong khongkü hanei ami dipü kübü yangei neleinyih shei enya?

¹³ Dipü kübü yangei leipü neshiüjema, Khrista dipü kübü yangei neleipü dan,

¹⁴ hatü Khrista yangei neleipü vaijema, hami chongvenpeyü angsha hatü amphong hinglempao angsha leidainyüke.

¹⁵ Ha mü nyeishi Kahvangi Khrista dipü kübü yangei leishihpeih shei denpü shuohpeyü Kahvang jung shahshem venbüthü leidainyüke. Dipü kübü yangei neleijema büpai yangei neleishihpü vaikahen.

¹⁶ Mehenangkü dipü kübü yangei neleijema, Khrista yangei neleipü dan.

¹⁷ Khrista yangei neleipü vaijema, am hinglempeyü angsha hatü am shaangao mang kü nyüke.

¹⁸ Shejema Khrista kü shiyei nyupüthüao mahdaiteke.

¹⁹ Shaangpü yangnyu shing mon Khrista kü monglempü vaijema, jenphongü nanglak peü mü nyeishi mongkü tünghenthü nyüke.

²⁰ Shejao hingmei mü Khrista dipü kübü yangei leidai; dipüthü khongkü shongpü betjük.

²¹ Mehenangkü shennyak hük homei dipü peipü keiha, shennyak hük homei dipü kübü yangei leihen peiteke;

²² mehenangkü Adam kü peü dipü keiha, Khrista kü peü yem leihühen.

²³ Shejao peüi laophü kü jiüpü ai yangei leihen: Khristayü shongpü betjük; hapheikü büpa yiüshingkü Khristalei lompüthü yangei leihen.

²⁴ Büpai vanglem lempü, wong hatü nganthü peü mahtükpheikü büpai ongching Pa Kahvang kü lanei shuohen, hapheikü dohpü ngoihen.

²⁵ Büpai laophülei vepathü büpalei la phangei mangtuh thahshi büpai vanglem lemhen.

²⁶ Mahtükhen dohpü vepayü dipü.

²⁷ Mehenangkü Kahvangi douthü peü büpalei la phangei tuhteke. Shejao mechem douthü peü la phangei tuhpeih shei ehenshang, üpai dou peü büpa phang kü tuhnya, ha kü büpa omshi neshiü shei leknyüke.

²⁸ Mechem douthü peü büpa phangkü tuhhen, hapheikü Ha büpa nyingi douthü peü büpa phangkü tuhshuohpüba phangkü nyuhen, shejüang Kahvangü peü shak kü peü nyuhen.

²⁹ Dipü kübü yangei leipü lanshei neshiüjema dipüthülei men kü baptükhahpüthü mehe dükhen? Dipü kübü lanshei yangei neleijema nanglakthüi jomphongei men kü mehekei baptüknya?

³⁰ Hepak ieshi jen nyingi mehekei vongshüh kü shühen?

³¹ Ngei nyihjeih dinyeih! Jeihinaü hatü nyahinaüthü, Khrista Jisu, jenei Shembüpa kü ngei am nangkü changmeipeyü hingshangpü.

³² Hangku monglempü kü monha ngei Ephesialei phaüyemthü mü hoklang meyü ngei hapai mehe nanglei danghen vaipa? Dipü kübü yangei neleijema, “Jeni hahshah, yingshah, mehenangkü jen ngenyih didaihen.”

³³ Am telutelemhah: “Nemeipü küphüi nyingnyoi meipü mahtüknyeih.”

³⁴ Meipü hatü jiüshangpü mongdeih touei peikei hatü hajük kü mang tethah; mehenangkü shennyak haneiyü Kahvang nyingpü neshiü. Hayü ngei am veühühen nangkü enyeih.

Yangei Leipü Büm

³⁵ Shejao hanei ami, “Dipüthü mekei yangei leihen? Menüng büm kohshi jom yangei leihen?” shei phehen aok.

³⁶ Ngapathü! Ammi mehe li hai, ha mangdi thahshi yem leiyei nekohnyih.

³⁷ Ammi mehe sheinya, hayü sheili vang lappai, wheat nevaijü lebü sheili vang mon, shejao pheilei koh-ei longhen pü nesheinyih.

³⁸ Shejao Kahvangi mongpü aimü hapa kü büm shuohnyeih, hatü sheili vang ieyei kü hapalei büm shuohnyeih.

³⁹ Phai peü aihük nevai, shejao hangku shing phai hük, yemhimak shing lebü, ouhiyüh shing lebü hatü nyahthü shing lebü nyüke.

⁴⁰ Vangsho leipü douthü hatü kahdoknyü leipü douthü nyüke, shejao vangsho leipü douthülei müknyinshekhangü hayaoha lem, hatü kahdoknyü leipü douthülei müknyinshekhangü hayaoha lem nyüke.

⁴¹ Vanghenyü kü müknyinshekhang hayaoha, lennyü kü hayaoha, lithathü kü hayaoha nyüke; hingmei, müknyinshekhang kü litha hüki hük mü laolao nyüke.

⁴² Hapa keiha dipü kübü yangei leipü nyuhen. Mehe hainya, hapayü mahdaibenüng; mehe yangei leinya, hayü nemahbenüng.

⁴³ Hapayü dhüm neshiüpü kü hainyeih, müknyinshekhang kü yangei leinyeih. Hapayü wong nekohpü kü hainyeih, ngan kü yangei leinyeih.

⁴⁴ Hapayü phai büm kü hainyeih, laangha büm kü yangei leinyeih. Phai büm nyujema, laangha bümao nyüke.

⁴⁵ Nyangei nyupü keiha, “Shongpü shennyak, Adamü yemmü nyupü yangnyu leiteke,” dohpü Adamü yangnyu shuohpü laangha leiteke.

⁴⁶ Shejao shongpü kü laangha nevai, shejao büm nyüke, hapheikü laangha nyüke.

⁴⁷ Shongpü shennyakü kahdok leipü, kahdok shennyak hük; nyipabü shennyakü vangsho leipü.

⁴⁸ Kahdoki lingpü shennyak keiha kahdoknyü shennyakthü nyüke; vangsho leipü peipü shennyak keiha vangsho leipüthü nyüke.

⁴⁹ Jeni kahdok leipü shennyakei lajei kopü keiha jeni vangsho leipü shennyakei lajei kohen.

⁵⁰ Jeihinaü hatü nyahinaüthü, ngei mehe enya, hayü hapa hih: iy hatü phai-i Kahvang ongching mükjüp danghen neaok, nevaijü mahbenüngi nemahbenüng dangnüng neaok.

⁵¹ Bangtuh, ngei shahjo hük am kü ephüshah: Jen peü shishi nenyuhen, shejao jen peü,

⁵² ngangahük kü müknyep mong-aa kü dohpü amit vüngjü yeiyadaihen. Mehenangkü amit vüngkahen, hatü diyei nyupüthü mechemao nedihen mü yangei leihen hatü jen peü yeiyadaihen.

⁵³ Mehenangkü hapa mahbenüng büm kü nemahbenüng owhen, hatü hapa dibenüng büm kü nedibenüng owhen.

⁵⁴ Mechem hapa mahbenüng bümi nemahbenüng owhen, hatü dibenüng bümi nedibenüng owhen, hahepak kü nyangei nyupükei epü hapa dhaümkahen: “Dipeyü aokpü dangpai lühtükteke.”

⁵⁵ “Oh dipü, nüng aokpü melei nyüpa? Oh dipü, nüngei leü melei nyüpa?”

⁵⁶ Dipülei leü-ü mang, hatü mangei nganü shahkungnyü nyüke.

⁵⁷ Shejao jenei Shembüpa, Jisu Khrista homei jen kü aokpü shuohpü Kahvangei men longtuh.

⁵⁸ Hanangkü ngei bampü jeihinaüthü, wongshongi yaongtuh, nejenleni nyutuh, düngei Shembüpalei dou kü chah-ei meihütuh; mehenangkü Shembüpa kü am nyiueinangtükpü angsha nevaidaipih.