1 KORINT 13 - DAÜLANGPÜ LAIHING (BSI)

Bampü Thintho

¹ Ngei hangku hatü vangsho phongshanthülei shah mü ejao, ngei kü bampü nenyujema, ngeiyü ngeü mohpü dam hatü melangnyiam kü kaongpü leidainyüke.

² Hatü ngei kü thihivam nganthü, hatü shahjo peü nyinghen thintho hatü nyingpü peü nyujao, hatü kahshang shintükaokhen mü ngei kü hinglempü nyujao ngei kü bampü nenyujema, ngeiyü kong.

³ Ngei angpü peü taopathü kü shuohtüktü ngelei büm aw kü jakhen lanei shuohjao, ngei kü bampü nenyujema, ngei meheyao nanglei neshiü.

⁴ Bampai nenteiaoknyeih; bampai yahyang shinshangnyeih; bampai mük nehühnyih; nevaijü bampai awdaei, nevaijü changmeiyei,

⁵ nevaijü nemei-i nedüknyih. Laophü shing mon neyemnyih, lomi mongshih nevamnyih, nevaijü ten jaoshi netuhnyih.

⁶ Bampai ten dükpü kü mongneongnyih, shejao shahhing kü mongongnyeih.

⁷ Hapai dou peü koaoknyeih, dou peü kü hinglemnyeih, dou peü kü monglemnyeih, dou peü kü munennyeih.

⁸ Bampü mechemao dohpü neshiü. Shejao tetpüvanpü nyujema dohdaihen; shahlem laolao epü nyujao hathüao dohdaihen; nyingpühingpü nyujao hathüao dohdaihen.

⁹ Mehenangkü jeni hanei mon nyingnyeih, hatü jeni hanei mon teteivanei enyeih;

¹⁰ shejao mechem changpüshapü peihenshang, nechangneshapü peihdaihen.

¹¹ Mechem ngei hashih nyupa, ngei hashih-i kei epeih, ngei hashih-i kei deihpeih, hatü ngei hashih-i kei deih-eilepeih. Mechem ngei behe leipa, ngei hashihlei yemnya deiaei kemei yaktüktih.

¹² Mehenangkü jeni shaangü aina kü kei neleki pumshi eenyüke, shejao hapheikü jeni dhe dhe gongei eehen. Shaang ngei hanei mon nyingnyeih, shejao Kahvangi ngei meishi nyingpükei ngei pheilei peü lomei nyinghen.

¹³ Shaang hathü jem aoei nyüpeih: hinglempü, monglempü, hatü bampü, shejao hathü peü mü longpeyü bampü.