1 KORINT 11 - DAÜLANGPÜ LAIHING (BSI)

¹ Ngei Khristalei dei-aei kapipü keiha amphongi ngelei yangnyu dei-aei kapituh.

Shokuh Kuhpü

² Lemphüli kü ammi ngei deih-ei dangpü nangkü, hatü ngei am kü shuohpü nyuhpüvenpü ammi noteipü nangkü ngei am kü mongmeinyeih.

³ Shejao ngei am kü nyinghüpü hükü Khristayü shennyak peü shak kü shangjing, hatü bahayü laophülei nyüha shak kü shangjing, hatü Kahvangü Khrista shak kü shangjing.

⁴ Baha üpai laophülei shangjingei lemhük jümtü phopnya nevaijü chongvennya, büpai Khrista dhüm neshiüi leitüknyeih,

⁵ shejao üpa nyühai laophülei shangjing kü nejümi phopnya, nevaijü chongvennya, pinnyüi laophülei baha dhüm neshiüi leitüknyeih– hapayü sho chaei kuptükpü mü aihük.

⁶ Nyüha hüki shokuh nekuhjema, pinnyüi laophülei sho kuptüktuh; shejao nyüha hüki laophülei sho japtükhen nevaijü kuptükhenü dhüm neshiü shei deihjema pinnyüi shokuh kuhhen vongbong.

⁷ Baha hüki shokuh kuhhen napü neshiü; mehenangkü büpayü Kahvang lajei hatü müknyinshekhang, shejao nyühayü bahalei müknyinshekhang.

⁸ Mehenangkü bahayü nyüha leipü lingpü nevai, shejao nyühayü baha leipü lingpeih.

⁹ Nevaijü nyühalei men kü baha lingpü nevai, shejao bahalei men kü nyüha lingpeih.

¹⁰ Ha vaipü nangkü hatü vangsho phongshanthü nangkü laophülei baha phangkü nyupü huhen nangkü shokuh kuhtuh.

¹¹ Shejoongpa Shembüpa kü nyüha hük baha neomi nenyu, hatü baha hük nyüha neomi nenyu.

¹² Mehenangkü baha leipü nyüha lingpü keiha bahayü nyüha homei bühnyeih. Shejao lemphü Kahvang leipü peinyeih.

¹³ Laophü nyingi shahphen yahtuh: Nyüha hüki shokuh nekuh-i Kahvang kü phophen jiüpü je?

¹⁴ Baha hük sho lushi banpai büpa dhüm neshiüi leinyeih shei nyingnyoi-i am kü nenyuhnyu je?

¹⁵ Shejao nyüha hük sho lushi tuhjema hapayü pinnyülei müknyinshekhang. Mehenangkü pinnyü kü sho lushi shuohpeyü pinnyü kü jümhen shuohpeih.

¹⁶ Shejao hanei ami shah dakteihüjema, hapa keipü jenei vanglem nevaijü Kahvangei attoi kü neshiü.

Shembüpa Mo

¹⁷ Shaang phangei nyupü nyuhpüvenpü nangkü ngei am kü menvih neshuohnyih; mehenangkü am khümnüng thaipeyü mei nevai, ten shingvaishi thainyüke.

¹⁸ Shongpüba kü, mechem am attoi am chemi thaihenshang amphong khongkü hanteipü nyüke shei ngei dannyüke, hatü hapayü vaiteke shei ngei hinglemnyeih.

¹⁹ Hingmei, amphong khongkü hanteipü nyuhen vaiteke, shejüang am üam khong jiüpü shangkü hapa lekei nyinghen.

²⁰ Am chemi thaipeyü hingmei mü Shembüpa Mo hahnüng thaipü nevaiang;

²¹ mehenangkü ammi hahshingkü hüki hük kü nedantei-i laophü laophüi hahnyüke, hatü hanei amü aeiyei hatü hanei amü chokei nyunyüke.

²² Meheang! Am hahhen yinghen shem neshiüpü je? Nevaijü ammi Kahvangei attoi nyonghütü meheyao neshiüpüthü veühünyu je? Ngei am kü mehe ephahen? Ha nangkü ngei am kü vihhen je? Ha nangkü ngei am kü nevihpih.

²³ Mehenangkü mehe ngei SHEMBÜPAleipü dang, ha ngei am kü shuohnyeih: Shembüpa Jisu yuhahpü ya büpai aan hük yah,

²⁴ hatü büpai menvih shuohtü büpai ha bhaokei e, “Hapayü am shingvaishi mangpü ngelei büm; ngei deih-ei dangei ha hahtuh.”

²⁵ Ha aihük mü aan hahpheikü büpai shao yungshong yah-ei e, “Hapa yungshongü ngelei iy kü vangpüshuwpü ja hük. Meshükpa ammi hapa yinghen, hajükpa ngei deih-ei dangei ha yingtuh.”

²⁶ Mehenangkü ammi meshükpa hapa aan hah, hatü hapa yungshong ying, büpa mangyiü thahshi ammi Shembüpa dipü baongnyüke.

²⁷ Hanangkü üami nechangnesha-i hapa Shembüpalei aan hahnya, hatü hapa yungshong yingnya, büpai Shembüpalei büm hatü iy khüei mang thahnyüke.

²⁸ Hanangkü peüi laophü nyingi dokei veipheikü mon hapa aan hahtuh, hatü hapa yungshong yingtuh.

²⁹ Mehenangkü üpai Shembüpalei büm shei nenyingi hahhen hatü yinghen, büpai laophü nyingkü shahphenpü hahnyüke hatü yingnyüke.

³⁰ Ha tata kü am longshi shing wong nekoh, hatü tüngnyüke, hatü hanei amü didaiteke.

³¹ Shejao jen nyingi dokei veijema, jen kü shah nephenhen.

³² Shejao mechem Shembüpai jen kü shahphenhen, jen kahdoknyü mü nenyonghühen shingvaishi jen kü ungei-aeinyeih.

³³ Hanangkü ngelei jeihinaü hatü nyahinaüthü, mechem am hahyinghen chemi thaitü hüki hük danei nyutuh.

³⁴ Am aeiyei nyujema, shemei hahtüktuh, shejüang am chemi thaijü hapayü am nyonghühen shingvaishi nechongkahen. Lebü douthü nangkeyü ngei peijü ephahen.