1 KORINT 10 - DAÜLANGPÜ LAIHING (BSI)

Israel Büshah Homei Shahvüng

¹ Jeihinaü hatü nyahinaüthü, jenei bühipathü peü phum phangkü, hatü jom peü yungching homei daipü ha ammi nenyingi nyemtenyu shei ngei deihnyüke,

² hatü jom peü Mosa phei müei phum hatü yungching kü baptükteke,

³ hatü peüi aihük laangha hahying hah,

⁴ hatü peüi aihük laangha yung ying. Mehenangkü jomphongü jom mü chemi daipü laangha yaong kübü yung ying, hatü hapa yaongü Khrista.

⁵ Shejoongpa jomphong longi mü Kahvang mongneong, hatü jahpanei jom mahtükkem.

⁶ Shaang hathüyü jomi kei jeni ten nelümhen shingvaishi jen shing lappü vaishi vampeih.

⁷ Jomphong hanei am keiha am lajei khümpü am telei; hapa nyangei nyüke, “Nanglakthüi hahhen yinghen uo, hatü jom ngahenjahen yaong.”

⁸ Jom hanei ami mükbongjuyung düktü nyihcha kü 23, 000 di; hapakei jeni nedükhen khih.

⁹ Jom hanei ami dükpükei jeni Khrista kü nedokhen khih, hatü jom biüi kaokei jütük.

¹⁰ Jom hanei ami langmaanpükei telangmaan; hanangkü jomü jüpü ami jütükpeih.

¹¹ Lappü hük huhen shingvaishi hathü dou jom kü vampeih, hatü jen kü nyuhhen shingvaishi nyangei tuhpeih. Mehenangkü jenü dohpü peikahen hepak kü nyüke.

¹² Hanangkü am wong kohshi yaongshi nyüpeih shei deihjema, am nedohen thashimashi nyutuh.

¹³ Peüi nepongbenüng dokpai am kü nedokangpih. Kahvangü hingshangpü, hatü ammi nedhangaokhen mü büpai am kü nedokhüpih, shejao ammi ha munenaokhen shingvaishi büpai hapa dokpü mü yanglemao yahphahen.

¹⁴ Hanangkü bampü küphüthü, lajeithü khümpü kübü nyaidaituh.

¹⁵ Ngeiyü sholi kohpü shennyakthü kü enyeih; ngei mehe enya, am nyingi shahphenhahtuh.

¹⁶ Moihimanpü yungshong mepa kü jeni menvih shuohnya, hayü Khristalei iy kü hean yahpü nevaipü je? Jeni bhaokpü aan hapayü jeni Khristalei phai kü hean yahpü nevaipü je?

¹⁷ Aan hük mon nyupü nangkü jen longi nyujao büm hük mon; mehenangkü jen peüi aan hük kü hean yahnyüpeih.

¹⁸ Israel nanglakthü deihhümao; jakpü moila hahpüthüyü moidülei chemi hean yahpüthü nevaipü je?

¹⁹ Shejema ngei mehe lappü enya? Lajeithü kü shuohpü moilayü lemhük je nevaijü lajeiyü lemhük je?

²⁰ Nevai, mehe nevaipü ami moilanya, hayü Kahvang kü nevai, kahshihthü kü moilanyüke. Ngei amphongü kahshihthü mü hean yahpü am nyemtevai shei deihnyeih.

²¹ Ammi Shembüpalei yungshong hatü kahshihlei yungshongao yingnüng neaok. Ammi Shembüpalei nükdü hatü kahshihlei nükdü nyiphen kü hean yah-ei hahnüng neaok.

²² Shembüpai mük nyemhühpha shei jeni deihnyu je? Jenü büpa mü wong kohpüba je?

Kahvang Müknyinshekhang Shing Peü Düktuh

²³ “Ngei shingvaishi dou peü dükhen shahkungi mongei nyüke, shejao dou nanglei nevai. Ngei shingvaishi dou peü dükhen shahkungi mongei nyüke, shejao dou peü lingei neleinyih.

²⁴ Ammi laophü mon meihen nevai, shejao mih meihen yemtuh.”

²⁵ Mongkü mehe deihnya, ha nang nephetei-i phai yushingei mehe yunya, ha hahtuh;

²⁶ mehenangkü, “Kahdoknyü hatü halei nyupü lemphü Shembüpalei.”

²⁷ Nevaipü hanei ami am kü hahyinghen nyükphüjema, hatü am halei daihüjema, ammei mongdeih nang meheyao shah nephe-i mepa temei shuoh, ha hahtuh.

²⁸ Shejao hanei ami am kü, “Hapayü lajei kü jeetükpeih” shei ephüjema, am kü ha epü shennyakei men kü hatü ammei mongdeih men kü ammi ha tehah.

²⁹ Ammi deihpü nang nevai, mih-i deihpü nang ngei enyeih. Mehekei ngelei bümei heanü mih-ei mongdeih-i shahphenhühen?

³⁰ Ngei Kahvang kü menvih shuoh-ei hahjema, hapa hahying nangkü ngei menvih shuoh-ei hahpü kü mehekei hanei ami ngei kü eelahen?

³¹ Hanangkü hahjao yingjao nevaijü nüngi mehe mehe dükhenshang, lemphüli Kahvang müknyinshekhang shingvaishi düktuh.

³² Jehoda am kü vaituh, Greek am kü vaituh nevaijü Kahvangei attoi kü vaituh, huluh teshuohhü;

³³ Jom yanghen nangkü ngei dükpü lemphü kü ngei meihen nevai shejao longshi shing meihen nangkü ngei dükpükei ami düktuh.