1 JOHAN 4 - DAÜLANGPÜ LAIHING (BSI)

Laanghathü Dokpü

¹ Bampü küphüthü, laangha peü kü ammi hingtelem, shejao hathüyü Kahvang leipü laanghathü vaila shei dokei veituh; mehenangkü shahshem thibüthü kahdoknyü kü longi vamei daiteke.

² Ammi Kahvang Laanghayü hapai nyinghen: Jisu Khrista phai leiyei peipeih shei lahpü laangha kemei Kahvang leipü,

³ hatü Jisu nelahpü laangha peü Kahvang leipü nevai. Hapayü peikünyüke shei ammi danei nyupü Khrista khüpü laangha nyüke; hatü shaang ha kahdoknyülei nyüke.

⁴ Maanpü hashihthü, amphongü Kahvang leipü nyüke hatü ammi hathü neüteke; mehenangkü üpa am kü nyu, büpayü kahdoknyülei nyupüba mao longpüba.

⁵ Jomphongü kahdoknyü leipü; hanangkü jomi mehe e, hapayü kahdoknyü leipü nyüke, hatü jomi epü kü kahdoknyüi bangnyüke.

⁶ Jenphongü Kahvang leipü. Üami Kahvang nying, jeni epü bangnyeih, hatü üam Kahvang leipü nevai jeni epü kü nebangnyih. Ha homei shahhing laangha hatü shahshem laangha jeni baong hanei nyingnyüke.

Kahvangü Bampü

⁷ Bampü küphüthü, jen hüki hük mü bamteishah; mehenangkü bampeyü Kahvang leipü nyüke; hatü üpai bamnya, büpayü Kahvangi bühpü hatü Kahvang nyingnyüke.

⁸ Üami nebamnya, Kahvang nenyingnyu; mehenangkü Kahvangü bampü nyüke.

⁹ Kahvang bampeyü hapakei jen touei shakei vampeih: Büpa homei jen yemmü nyuhen shingvaishi Kahvangi laophülei Halom kahdoknyülei shompeih.

¹⁰ Hapa bampü kü, jeni Kahvang kü bampü nevai, shejao büpai jen kü bampeih, hatü jenei mang shing mang tükhen moila shuohhen nangkü büpai laophülei Halom shompeih.

¹¹ Bampü küphüthü, Kahvangi jen kü longi bampü nangkü jenao hüki hük mü bamteihen vongbong.

¹² Üpaiyao Kahvang ne-ee; jen hüki hük mü bamteijema Kahvang jen kü nyunyeih, hatü büpa bampai jen kü changeishaei leihünyeih.

¹³ Hapai jen büpa kü nyunyeih hatü büpa jen kü nyunyeih shei jeni nyingnyüke; mehenangkü büpalei laangha büpai jen kü shuohteke.

¹⁴ Pa-i laophülei Ha kahdoknyü Yemleipüba vaihen shom shei jeni eeteke hatü hapa denpü shuohnyeih.

¹⁵ Jisu-ü Kahvang Ha shei üami lahnya hathü kü Kahvang nyunyeih, hatü jomphong Kahvang kü nyunyeih.

¹⁶ Hanangkü jen shingvaishi Kahvang bampü nyupü jeni nyingteke hatü hinglemnyeih. Kahvangü bampü hatü üami bampü kü nyunya Kahvang kü nyunyüke, hatü Kahvang jom kü nyunyeih.

¹⁷ Jen kü bampeyü hapakei changhüpeih: shahphenpü nyih jen monglonghen; mehenangkü büpa keiha jenao kahdoknyülei nyüke.

¹⁸ Bampü kü nyempü neshiü, shejao hingshangpü bampai nyempü changtüknyeih; mehenangkü nyempeyü hanghi ponghen kü nyüke, hatü üami nyemnya bampü kü changpüshapü mangngoi.

¹⁹ Büpai shongei jen kü bampü nangkü jeni büpa kü bamnyeih.

²⁰ Üami, “Ngei Kahvang kü bamnyeih” shei etü laophülei jeihinaü hatü nyahinaüthü kü jiühitnya, hathüyü shahshem; mehenangkü jomi eepü jeihinaü hatü nyahinaüthü kü nebamjema, jomi ne-eepü Kahvang kü bamnüng neaok.

²¹ Jeni büpa leipü dangpü shahkungü ha khih: Üami Kahvang kü bam, hathüi nyahinaü hatü jeihinaüthü kao bamhen vongbong.