Biblia Todo Logo
Bìoball air-loidhne

- Sanasan -

1 JOHAN 3 - DAÜLANGPÜ LAIHING (BSI)


Kahvang Hathü

1 Jenphong kü Kahvang hathü shei nyükhen mü Opai mekeipü bampü jen kü shuohpa veituh, hatü jenphongü hakei-üng vaitei. Kahdoknyüi jen nenyingpeyü jomi büpa nenyingpü nangkü nyüke.

2 Bampü küphüthü, shaang jenphongü Kahvangei hapeüthü nyüke; hatü jen mehe vaihen shao-üng shakei mangvam. Jeni nyingpeyü ha khih: mechem büpa shakei vamhenshang, jenphongü büpa kei nyuhen; mehenangkü büpa mekei nyu, hapakei jeni büpa eehen.

3 Hapa monglem nyupüthü peüi büpa daülangi nyupükei laophü nyingi daülangi nyutuh.

4 Üpai mang thahnya shahkung mangnyüke; mehenangkü mangü shahkung mangpü nyüke.

5 Büpayü mang yah-ei lüdainüng shakei vampeih shei ammi nying, hatü büpa kü mang neshiü.

6 Büpa kü nyupü üpaiyao mang nethahnyih; mang thahpü üpaiyao büpa ne-ee, nevaijü nenying.

7 Maanpü hashihthü, üpaiyao am lemnyong kü temühü. Büpa daülangi nyupükei üpai jiüpü dük, büpa daülangpü nyüke.

8 Mang thahpü peü kahshihlei hapeüthü; mehenangkü chongpanghinüng kahshih-i mang thahhampeih. Kahshihlei dou mangtükhen mükhong kü Kahvang Ha shakei vampeih.

9 Kahvangi bühpü üpayao sheüshi mang nethahnyih; mehenangkü Kahvangei sheili büpa kü nyunyeih; büpa Kahvangi bühpü nangkü büpai nedoh-i mang thah-ei nenyunyih.

10 Üpa Kahvangei ha, üpa kahshihlei ha hapakei jeni nyingdainyeih: Üpai jiüpü nedük nevaijü laophülei jeihinaü hatü nyahinaüthü kü nebam, büpayü Kahvangei ha nevai.


Hüki Hük mü Bamteituh

11 Mehenangkü jen hüki hük mü bamteihen vongbong shei chongpangpülei ammi hapa shahjang danteke.

12 Jenphongü laophülei naüpeü jütükpü kahshih leipü Kain kei nevaihen khih. Mehekei büpai chenaü jüpa? Mehenangkü büpai dükpü dou nejiü, shejao chenaüi dükpü dou jiüshi nyuteke.

13 Jeihinaü hatü nyahinaüthü, kahdoknyüi am kü jiühitpü kü am tethama.

14 Jen hüki hük mü bamteipü nangkü jen dipü kübü yangnyuyem touei daiteke shei jeni nyingnyüke. Üpai nebamnya, dipü kü nyunyüke.

15 Jeihinaü hatü nyahinaü kü jiühitpeyü shennyak jüpü am, hatü shennyak jüpü am kü yangnyuyem nenyupih shei ammi nyingei nyüke.

16 Jeni hapai bampü nyingnyüke: büpai jen shing büpalei yangnyu lanei shuoh, hapakei jeniyao hüki hük shing yangnyu lanei shuohteihen vongbong.

17 Hanei ami kahdoknyü mop angtü laophülei jeihinaü hatü nyahinaü taopü eetüktü nesheühjema mekei etü Kahvang bampü büpa kü nyuhen?

18 Maanpü hashihthü, jeni shah-i nevaijü epai mon nebamshah, shejao shahhing kü hatü doui bamteishah.


Kahvang Touei Mongyangpü

19 Hapa homei jenü shahhing kübü shei jeni nyinghen hatü büpa touei jen monglemhen.

20 Mechem jenei mongi jen nyonghühen, jen Kahvang touei monglongpü nyüke hatü büpai peü nyingei nyüke.

21 Bampüthü, jenei mongi jen nenyonghüjema, jen Kahvang touei monglongpü nyüke.

22 hatü jeni mehe yü, jeni büpa leipü dangnyeih; mehenangkü jeni büpalei shahkungthü bangnyeih hatü büpai monghahbenüng düknyeih.

23 Hapayü büpalei shahkungnyü: büpai jen kü shahkung shuohpükei jeni Cheha Jisu Khristalei men kü hinglemhen hatü hüki hük mü bamteihen vongbong.

24 Büpalei shahkungnyü bangpü peü büpa kü nyüke, hatü büpa jom kü nyunyeih, hatü büpai jen kü shuohpü Laangha homei büpa jen kü nyunyeih shei hapai jeni nyingnyüke.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan