1 JOHAN 2 - DAÜLANGPÜ LAIHING (BSI)

Khristayü Jenei Sheühbü

¹ Ngelei maanpü hashihthü, ammi mang nethahhen shingvaishi ngei hathü dou jung am kü nyangnyeih. Shejao hanei ami mang thahjema Pa mü daülangpü Jisu Khrista jenei sheühbü nyüpeih;

² hatü büpayü jenei mang shing mang tükhen moila shuohpüba, hatü hayü jenei mang mon nevai, shejao kahdoknyü kempülei mang shingvaishi moila shuohpeih.

³ Shaang jeni büpalei shahkungnyü bangjema, hapai jeni büpa nyingnyeih shei lekhen.

⁴ Üami, “Ngei büpa nyingnyeih” shei etü büpalei shahkungnyü nebangnya, büpayü shahshem, hatü henüng shennyak kü shahhing nenyu;

⁵ shejao üami büpalei shah bangnya, hingmei hapa shennyak kü Kahvang bampü changpüshapü ngoiteke. Hapai jenü büpa kü nyüke shei leknyüke.

⁶ Üami, “Ngei büpa kü nyunyeih” shei enya, hathüyü büpai kampükei kamhen vongbong.

Shahkungnyü Ja Hük

⁷ Bampü küphüthü, ngei am kü shahkung ja nenyangnyih, shejao shelei mebü nyupü shahkung chang nyangnyeih; hapa shahkung changü ammi danhampü shah hih.

⁸ Shejao ngei am kü shahkung ja hük nyangnyeih; hapa shahhingü büpa kü hatü am kü eenyüke; mehenangkü vangnyak peihdaiteke hatü hingshangpü vangngai khangteke.

⁹ Üami laophülei jeihinaü hatü nyahinaüthü kü jiühityaki, “Ngei vangngai kü nyüpeih” shei ehenshang, shaangao vangnyak kü nyüke.

¹⁰ Üami jeihinaü nevaijü nyahinaü hük kü bamnya, vangngai kü nyüke, hatü hapa keipü shennyak hük kü huluh shuohhen mü meheyao neshiü.

¹¹ Shejao üami jeihinaü hük kü jiühithen vangnyak kü nyüke, vangnyak kü kamnyüke, hatü daihen lem nenyingi nyüke; mehenangkü vangnyaki büpalei mük phüngtükteke.

¹² Maanpü hashihthü, ngei am kü nyangnyeih, mehenangkü büpalei men nangkü ammei mang peü tükteke.

¹³ Pathü, ngei am kü nyangnyeih, mehenangkü chongpangpülei nyupü büpa ammi nyingnyüke. Thehilathü, ngei am kü nyangnyeih, mehenangkü ammi ten neüteke.

¹⁴ Hashihthü, ngei am kü nyangnyeih, mehenangkü ammi Pa nyingnyüke. Pathü, ngei am kü nyangnyeih, mehenangkü chongpangpülei nyupü büpa ammi nyingnyüke. Thehilathü, ngei am kü nyangnyeih, mehenangkü am wong kohshi, hatü Kahvang shah am kü nyüke, hatü ammi ten neütükteke.

¹⁵ Amphongi kahdoknyü nevaijü kahdoknyü douthü kü tebam. Kahdoknyü kü bampüthü kü Pa-i bampü neshiü;

¹⁶ mehenangkü kahdoknyülei nyupü lemphü– phai-i yahhüpü, mük kü meipü, mophimo kü changmeipü hathüyü Pa leipü nevai, shejao kahdoknyü leipü peinyeih.

¹⁷ Kahdoknyü hatü hapai yahhahhüpü peihdainyüke, shejao Kahvangi mongpü dükpüthü den kü nyunyeih.

Khrista Khüpü

¹⁸ Bampü hashihthü, hapayü dohpü hepak nyüke. Khrista khüpü vamkünyüke shei ammi danei nyupükei shaang Khrista khüpüthü longi vamteke. Ha homei shaang jeni hapayü dohpü hepak shei nyingnyüke.

¹⁹ Jomü jen kübü lüdaipeih, shejao jomphongü jen khong nevai; jomphong paoh jen khong vailangmeyü jomphong jen mü nyuhah shepeih. Shejao jen toueipü lüdaipü homei jomphongü jen khong nevai shei lekei hunyüke.

²⁰ Shejao amphongü Laangha Daülangpai thiteiphuteke, hatü am peüi shahhing nyingei nyüke.

²¹ Ngei am kü nyangpeyü ammi shahhing nenyingpü nangkü nevai, shejao ammi ha nyingei nyüke, hatü shahhing kübü shahshem nevamnyih.

²² Shahshem epeyü üpaang? Hapayü Jisu-ü Khrista nevai shei epü shennyak khih. Hapayü Khrista khüpü, Pa hatü Ha nyiphen yaktüknyüke.

²³ Ha yaktükpü shennyak üpa kao Pa neshiü; üpai Ha lahnya, Pa-ao nyüke.

²⁴ Chongpangpülei ammi mehe dan, ha am kü nyuhütuh. Chongpangpülei ammi mehe dan, ha am kü nyujema, ammi Ha hatü Pa nyiphen kü nyuhen.

²⁵ Hatü büpai jen kü mehe lah, hayü vanyangyem yangnyu khih.

²⁶ Ngei hayü am lemnyongei mülanghen khepüthü nangkü nyangnyeih.

²⁷ Am nang keyü ammi büpa leipü thiteiphupü dangpü ha am kü nyüke, hanangkü am kü nyuhhen üpayao nadang neshiü. Shejao büpai thiteiphupai dou peü am kü nyuhnyüke, hatü hayü shahhing, shahshem nevai, hatü am kü nyuhpükei shahhing nyüke; ammi büpa kü nyutuh.

²⁸ Shaang, maanpü hashihthü, büpa kü nyutuh, shejüang mechem büpa shakei vamhen, jen monglempü nyuhen, hatü büpa yiüshingkü jeni büpa touei veü nedanghen.

²⁹ Ammi büpayü daülangpü shei nyingjema, mehe jiü ha dükpüthü peü büpa kübü bühpeih shei ammi nyingei nyüke.