1 JOHAN 1 - DAÜLANGPÜ LAIHING (BSI)

Yangnyu Shah

¹ Yangnyu shah nang mehe chongpangpülei nyu, mehe hami dan, mehe hamei müki ee, mehe kü hami vei, hatü mehe kü hamei laki dük, ha jung hami am kü baongnyeih.

² Hapa yangnyu shakei vam, ha hami eetih hatü ha kü denpü shuohnyeih, hatü hapa nedohnetenpü yangnyu Chepa mü nyupü jen touei shakei vampü jung am kü baongnyeih.

³ Amao ham mü mongjempü nyuhen shingvaishi mehe hami ee hatü dan, ha hami am kü baongnyeih; hatü hingmei ham mongjempeyü Pa hatü Ha Jisu Khrista mü nyüpeih.

⁴ Hamei mongong changhühen shingvaishi hami ha douthü jung nyangnyeih.

Kahvangü Vangngai

⁵ Kahvangü vangngai hatü büpa kü vangnyak lanshei neshiü shei hapa shahjang hami büpa leipü danpü am kü baongnyeih.

⁶ Jen vangnyak kü kamyaki jen büpa mü mongjemnyeih shei ejema jeni shahshem enyüke, hatü mehe shahhing ha nedüknyu;

⁷ shejao büpa vangngai kü nyupükei jeni vangngai kü kamjema, jen hüki hük mü mongjempü nyüpeih, hatü Cheha Jisulei iy homei mang peü kübü jen daütüknyüke.

⁸ Jen nyingi ham mang neshiüpih shei ejema, jen nyingi luhahnyüke, hatü jen kü shahhing nenyu.

⁹ Jeni jenei mangthü lahjema, jenei mang peü tükphahen hatü nedaüpü lemphü kübü daüphahen büpayü monglemaokpü hatü shahhing nyüke.

¹⁰ Jeni mang nethah-angpih shei ejema, jeni büpa shahshem leihünyüke, hatü büpalei shah jen kü nenyu.