ເຊຟານີຢາ 3 - ພຣະຄຳພີສັກສິນະຄອນເຢຣູຊາເລັມຮັບເຄາະກຳແລະຖືກໄຖ່ຄືນ 1 ເຄາະກຳເປັນຂອງນະຄອນເຢຣູຊາເລັມສາແລ້ວ ຄືເປັນເມືອງທີ່ເສື່ອມເສຍ ແລະເປັນກະບົດ ທີ່ກົດຂີ່ຂົ່ມເຫັງປະຊາຊົນຂອງຕົນເອງ. 2 ເມືອງນີ້ບໍ່ຍອມຮັບຟັງຖ້ອຍຄຳຂອງພຣະເຈົ້າ ຫລືບໍ່ຍອມຮັບເອົາການແອບສອນຂອງພຣະອົງ. ເປັນເມືອງທີ່ບໍ່ໄວ້ວາງໃຈໃນພຣະເຈົ້າຢາເວ ຫລືບໍ່ຍອມຂໍໃຫ້ພຣະອົງຊ່ວຍເຫລືອ. 3 ບັນດາຂ້າຣາຊການໃນເມືອງນີ້ເປັນດັ່ງຝູງສິງທີ່ຮ້ອງຄຳຣາມ; ບັນດາຜູ້ຕັດສິນຄວາມກໍເປັນດັ່ງໝາປ່າທີ່ອຶດຫິວໃນຕອນກາງຄືນ ໂລພາໂພດຈົນບໍ່ຍອມປະກະດູກໃຫ້ເຖິງຕອນເຊົ້າ. 4 ບັນດາຜູ້ທຳນວາຍຂາດຄວາມຮັບຜິດຊອບແລະສໍ້ໂກງ; ບັນດາປະໂຣຫິດຕ່າງກໍເຮັດໃຫ້ສິ່ງສັກສິດເປັນມົນທິນ ແລະບິດເບືອນກົດບັນຍັດຂອງພຣະເຈົ້າເພື່ອຜົນປະໂຫຍດຂອງພວກເຂົາເອງ. 5 ແຕ່ພຣະເຈົ້າຢາເວຍັງສະຖິດຢູ່ໃນເມືອງນີ້ ພຣະອົງເຮັດຖືກຕ້ອງ ແລະບໍ່ເຮັດຜິດຈັກເທື່ອ. ທຸກໆເຊົ້າພຣະອົງນຳຄວາມຍຸດຕິທຳມາສູ່ປະຊາຊົນຂອງພຣະອົງບໍ່ໄດ້ຂາດ. ແຕ່ເຖິງປານນັ້ນ ຄົນອະທຳໃນທີ່ນັ້ນກໍຍັງສືບຕໍ່ເຮັດຜິດ ແລະບໍ່ລະອາຍໃຈ. 6 ອົງພຣະຜູ້ເປັນເຈົ້າກ່າວວ່າ, “ເຮົາໄດ້ລຶບລ້າງຊົນຊາດທັງໝົດໃຫ້ສິ້ນສູນແລ້ວ; ເຮົາໄດ້ທຳລາຍເມືອງທັງຫລາຍຂອງພວກເຂົາ ແລະໄດ້ປະປ່ອຍໃຫ້ກຳແພງເມືອງກັບຫໍຄອຍຕ່າງໆ ຮົກຮ້າງເພພັງ. ເມືອງຕ່າງໆໄດ້ກາຍເປັນເມືອງຮ້າງ; ຕາມທ້ອງຖະໜົນຫົນທາງຕ່າງໆກໍຫວ່າງເປົ່າ ບໍ່ມີແມ່ນແຕ່ຄົນດຽວເລີຍເຫຼືອຢູ່. 7 ແລ້ວເຮົາກໍຄິດວ່າ ປະຊາຊົນຂອງເຮົາຈະມີຄວາມຢຳເກງເຮົາ ແລະຮັບເອົາການແອບສອນຂອງເຮົາ ຊຶ່ງພວກເຂົາຈະບໍ່ລືມໄລຈັກເທື່ອ. ແຕ່ບໍ່ພໍເທົ່າໃດ ພວກເຂົາກໍແຮ່ງປະພຶດຊົ່ວຊ້າຫລາຍຍິ່ງຂຶ້ນ.” 8 ພຣະເຈົ້າຢາເວກ່າວວ່າ, “ຄອຍຖ້າເບິ່ງ ຄອຍຖ້າວັນທີ່ເຮົາລຸກຂຶ້ນກ່າວໂທດຊົນຊາດທັງຫລາຍ. ເຮົາໄດ້ຕັດສິນໃຈເຕົ້າໂຮມບັນດາຊົນຊາດ ແລະອານາຈັກທັງຫລາຍແລ້ວ ເພື່ອໃຫ້ພວກເຂົາໄດ້ຊີມຣິດແຫ່ງຄວາມໂກດຮ້າຍຂອງເຮົາ. ທົ່ວແຜ່ນດິນໂລກຈະຖືກໄຟແຫ່ງຄວາມກີ້ວໂກດຂອງເຮົາທຳລາຍ. 9 ແລ້ວເຮົາກໍຈະປ່ຽນສົບປາກຂອງບັນດາຊົນຊາດຕ່າງໆໃຫ້ເປັນບໍຣິສຸດ ແລະພວກເຂົາທຸກຄົນຈະຮ້ອງອອກນາມຊື່ຂອງພຣະເຈົ້າຢາເວ ແລະຮັບໃຊ້ພຣະອົງດ້ວຍໃຈອັນດຽວກັນ. 10 ແມ່ນແຕ່ຈາກທີ່ຫ່າງໄກສຸດຂອງເອທິໂອເປຍ ຄືປະຊາຊົນທີ່ເຮົາໄດ້ກະຈັດກະຈາຍໄປນັ້ນ ພວກເຂົາກໍຈະນຳເຄື່ອງມາຖວາຍແກ່ເຮົາ. 11 ໃນວັນນັ້ນ ພວກເຈົ້າທີ່ເປັນປະຊາຊົນຂອງເຮົາ ຈະບໍ່ໄດ້ອັບອາຍຂາຍໜ້າອີກຕໍ່ໄປ ຍ້ອນໄດ້ກະບົດຕໍ່ສູ້ເຮົາ. ເຮົາຈະກຳຈັດທຸກຄົນ ທີ່ອວດດີແລະຈອງຫອງໃຫ້ໝົດສິ້ນໄປ ແລະພວກເຈົ້າຈະບໍ່ກະບົດຕໍ່ສູ້ເຮົາອີກຕໍ່ໄປ ທີ່ເທິງເນີນພູສັກສິດຂອງເຮົາ. 12 ເຮົາຈະປ່ອຍປະຊາຊົນໃຫ້ຢູ່ໃນທີ່ນັ້ນ ຄືຜູ້ຕໍ່າຕ້ອຍແລະຖ່ອມໃຈລົງ ພວກເຂົາຈະສະແຫວງຫາທີ່ລີ້ໄພໃນພຣະນາມແຫ່ງພຣະເຈົ້າຢາເວ. 13 ປະຊາຊົນອິດສະຣາເອນຜູ້ທີ່ລອດຊີວິດ ຈະບໍ່ເຮັດຜິດຕໍ່ຜູ້ໃດ, ຈະບໍ່ເວົ້າຕົວະ, ທັງຈະບໍ່ຊອກຫາຫລອກລວງຜູ້ໃດດ້ວຍ. ພວກເຂົາຈະຈະເລີນຮຸ່ງເຮືອງແລະໝັ້ນຄົງ ຄືບໍ່ຢ້ານກົວຜູ້ໃດ.” ບົດເພງແຫ່ງຄວາມຊົມຊື່ນຍິນດີ 14 ໂອ ລູກສາວຊີໂອນເອີຍ ຈົ່ງຊົມຊື່ນຍິນດີຮ້ອງລຳທຳເພງເຖີດ ໂອ ຊາດອິດສະຣາເອນເອີຍ ຈົ່ງຮ້ອງດັງໆ ໂອ ລູກສາວເຢຣູຊາເລັມເອີຍ ຈົ່ງຍິນດີດ້ວຍສຸດຫົວໃຈຂອງເຈົ້າເຖີດ. 15 ພຣະເຈົ້າຢາເວໄດ້ເຊົາລົງໂທດພວກເຈົ້າແລ້ວໃດ ພຣະອົງກຳຈັດສັດຕູທັງໝົດຂອງພວກເຈົ້າແລ້ວ. ກະສັດແຫ່ງອິດສະຣາເອນຄືພຣະເຈົ້າຢາເວສະຖິດຢູ່ທ່າມກາງພວກເຈົ້າ ບັດນີ້ ບໍ່ມີສິ່ງໃດທີ່ພວກເຈົ້າຈະຕ້ອງຢ້ານກົວອີກ. 16 ເມື່ອວັນນັ້ນມາເຖິງ ພວກເຂົາຈະເວົ້າຕໍ່ນະຄອນເຢຣູຊາເລັມວ່າ, “ນະຄອນຊີໂອນ ຢ່າຢ້ານ, ຢ່າເສຍກຳລັງໃຈເທາະ 17 ພຣະເຈົ້າຢາເວ ພຣະເຈົ້າຂອງພວກເຈົ້າ ຊົງສະຖິດຢູ່ກັບພວກເຈົ້າ ພວກເຈົ້າໄດ້ມີໄຊດ້ວຍຣິດອຳນາດຂອງພຣະອົງ ພຣະອົງຈະເປັນສຸກໃຈຍ້ອນພວກເຈົ້າທັງຫລາຍ ໃນຄວາມຮັກນັ້ນຈະຊົງໃຫ້ຊີວິດໃໝ່ແກ່ພວກເຈົ້າ. ພຣະອົງຈະຂັບຮ້ອງດີໃຈເໜືອພວກເຈົ້າທັງຫລາຍ 18 ຄືກັບປະຊາຊົນທີ່ເບີກບານໃຈໃນງານກິນລ້ຽງ.” “ເຮົາຈະເຮັດໃຫ້ເຄາະກຳຂອງພວກເຈົ້າ ໝົດສິ້ນສູນໄປ ແລະເຮັດໃຫ້ຄວາມອັບອາຍຂາຍໜ້າ ຂອງພວກເຈົ້າສູນຫາຍໄປສິ້ນ. 19 ເວລານັ້ນກຳລັງມາ ເຮົາຈະລົງໂທດພວກເຂົາ ຄືຜູ້ທີ່ກົດຂີ່ພວກເຈົ້າ; ເຮົາຈະຊ່ວຍກອບກູ້ເອົາຜູ້ຄົນພິການທັງຫລາຍ ແລະນຳເອົາພວກຊະເລີຍໃຫ້ກັບຄືນມາບ້ານ. ເຮົາຈະປ່ຽນຄວາມອັບອາຍມາເປັນກຽດແກ່ພວກເຂົາ ແລະທັງໂລກຈະຍ້ອງຍໍສັນລະເສີນພວກເຂົາ. 20 ເວລານັ້ນກຳລັງມາ ເຮົາຈະນຳພວກເຈົ້າທີ່ຖືກແຕກກະຈັດກະຈາຍໄປ ກັບຄືນມາບ້ານ. ເຮົາຈະເຮັດໃຫ້ພວກເຈົ້າມີຊື່ສຽງໂດ່ງດັງທົ່ວພິພົບ ເຮັດໃຫ້ພວກເຈົ້າຈະເລີນຮຸ່ງເຮືອງອີກເທື່ອໜຶ່ງໃດ.” ພຣະເຈົ້າຢາເວກ່າວດັ່ງນີ້ແຫຼະ. |
@ 2012 United Bible Societies. All Rights Reserved.