ຍອດເພງ 6 - ພຣະຄຳພີສັກສິພວກຍິງສາວກ່າວຕໍ່ເຈົ້າສາວ: 1 ເຈົ້າຜູ້ງາມຍິ່ງທ່າມກາງຍິງທັງຫລາຍເອີຍ ຄົນຮັກຂອງເຈົ້າຫາຍໜີໄປໃສກັນແທ້? ຈົ່ງບອກໃຫ້ພວກຂ້ອຍຮູ້ວ່າຄົນຮັກຂອງເຈົ້າໄປໃສ ເພື່ອວ່າພວກຂ້ອຍຈະຊ່ວຍຊອກຫາລາວໃຫ້ເຈົ້າ. ເຈົ້າສາວກ່າວຕໍ່ພວກຍິງສາວ: 2 ຄົນຮັກຂອງຂ້ອຍໄດ້ໜີໄປທີ່ສວນຂອງລາວ ບ່ອນທີ່ມີຕົ້ນຢາງຫອມນາໆຊະນິດເກີດທີ່ນັ້ນ. ໃນທີ່ນັ້ນ ລາວກຳລັງລ້ຽງຝູງສັດຂອງລາວ ແລະເກັບເອົາດອກຊ້ອນຢູ່ໃນທີ່ນັ້ນດ້ວຍ. ເຈົ້າສາວກ່າວກ່ຽວກັບເຈົ້າບ່າວ: 3 ຄົນຮັກນັ້ນເປັນຂອງຂ້ອຍ ຂ້ອຍກໍເປັນຂອງລາວ ລາວລ້ຽງຝູງສັດຂອງຕົນຢູ່ທ່າມກາງດອກຊ້ອນ. ບົດເພງທີຫ້າ ເຈົ້າບ່າວກ່າວຕໍ່ເຈົ້າສາວ: 4 ທີ່ຮັກຂອງອ້າຍ ນ້ອງນາງຊ່າງງາມຫລາຍ ງາມເທົ່າກັບຕີຣະຊາ ເມືອງແຫ່ງຄວາມງາມຍິ່ງ. ທັງໜ້າຮັກແພງດ້ວຍ ດັ່ງນະຄອນເຢຣູຊາເລັມ ແລະໜ້າຫລົງໄຫລດັ່ງເມືອງຍິ່ງໃຫຍ່ເຫຼົ່ານີ້. 5 ຈົ່ງຫັນໜ້ານ້ອງໜີຈາກອ້າຍສາເທາະ ເພາະສາຍຕານ້ອງກວນໃຈອ້າຍໃຫ້ໝອງໝົ່ນ. ຜົມນ້ອງປິວສະບັດ ດັ່ງຝູງແບ້ທີ່ກະໂດດໄປມາ ເຕັ້ນກະໂດດຢູ່ຕາມຮ່ອມພູກີເລອາດ. 6 ແຂ້ວນ້ອງຂາວແຈ້ງຊວນອ້າຍໃຫ້ຄິດເຖິງຝູງແກະ ທີ່ຫາກໍຖືກຕັດຂົນແລະອາບນໍ້າໃຫ້ສະອາດ. ບໍ່ມີຕົວໃດຂາດຈາກຄອກສັດຫາຍໄປ ເພາະທຸກຕົວມີຄູ່ຄອງຢ່າງເໝາະສົມທັງສິ້ນ. 7 ພວງແກ້ມນ້ອງທີ່ຊ້ອນຢູ່ທາງຫລັງຜ້າປົກ ກໍເບັ່ງບານແດງຜ່ອງໃສເຕັມໃບໜ້າ. 8 ກະສັດອາດມີເມຍຫົກສິບຄົນກໍໄດ້ ແລະມີເມຍນ້ອຍອີກແປດສິບຄົນ ທັງມີຍິງສາວສະໜົມເຊີຍຊົມໃນວັງ ທີ່ບໍ່ອາດນັບຈຳນວນໄດ້. 9 ສ່ວນອ້າຍຮັກນ້ອງພຽງແຕ່ຜູ້ດຽວ ນາງເປັນດັ່ງນົກເຂົາງາມເປັນຕາຮັກ. ນາງເປັນລູກສາວໂທນຂອງແມ່ແຕ່ພຽງຄົນດຽວ ເປັນລູກທີ່ແມ່ເພິ່ງພໍໃຈນຳຫລາຍດ້ວຍ. ເມື່ອຜູ້ຍິງທຸກຄົນຫລຽວເບິ່ງຕ່າງກໍຊົມເຊີຍ ເມຍໃຫຍ່ເມຍນ້ອຍຂອງກະສັດກໍຊົມເຊີຍນາງດ້ວຍ. 10 ຍິງສາວຄົນນີ້ເປັນຜູ້ໃດກັນນໍ? ເປັນຄົນເບີກບານໃຈດັ່ງຮຸ່ງອາລຸນຕອນເຊົ້າ; ນາງຊ່າງງາມແທ້ແລະບໍຣິສຸດຜຸດຜ່ອງ ດັ່ງຕາເວັນແລະດວງເດືອນສ່ອງແຈ້ງເຫລື້ອມໃສ. ເຈົ້າບ່າວກ່າວຕໍ່ເຈົ້າສາວ: 11 ອ້າຍໄດ້ລົງມາທີ່ສວນໝາກອາລະມັນ ເພື່ອເບິ່ງພືດພັນທີ່ຫາກໍປົ່ງຂຶ້ນໃນຮ່ອມພູນັ້ນ ເພື່ອມາເບິ່ງໃບອ່ອນຂອງເຄືອອະງຸ່ນ ແລະເບິ່ງຕົ້ນໝາກພິລາທີ່ມີດອກບານ. 12 ອ້າຍກຳລັງສັ່ນເພາະນ້ອງເຮັດໃຫ້ຫລົງຮັກສະເໜ່ຫາ ດັ່ງເຈົ້າຊາຍຕັ້ງໜ້າຕັ້ງຕາຂັບລົດມ້າສູ່ສະໜາມຮົບ. ພວກເພື່ອນກ່າວຕໍ່ເຈົ້າສາວ: 13 ຟ້ອນລຳເຖີດ ຟ້ອນລຳສາ ສາວຊາວຊູລຳເອີຍ ຈົ່ງໃຫ້ພວກຂ້ອຍແຍງເບິ່ງເຈົ້າຟ້ອນລຳແດ່. ເປັນຫຍັງພວກເຈົ້າຈຶ່ງຢາກເບິ່ງຂ້ອຍນໍ? ຂ້ອຍຟ້ອນຢູ່ທ່າມກາງຄົນທີ່ກຳລັງເບິ່ງຢູ່. |
@ 2012 United Bible Societies. All Rights Reserved.