ນາງຣຸດ 3 - ພຣະຄຳພີສັກສິນາງຣຸດພົບສາມີ 1 ຕໍ່ມາ ນາງນາໂອມີກໍເວົ້າກັບນາງຣຸດວ່າ, “ແມ່ຕ້ອງຊອກຫາຜົວໃຫ້ເຈົ້າ ເພື່ອເຈົ້າຈະມີຄອບຄົວເປັນຂອງຕົນເອງ. 2 ເຈົ້າຄົງຮູ້ດີແລ້ວວ່າໂບອາດຜູ້ທີ່ເຈົ້າໄປເກັບເອົາຮວງເຂົ້າ ຕົກເຮ່ຍນຳພວກຄົນງານຜູ້ຍິງຂອງເພິ່ນນັ້ນເປັນພີ່ນ້ອງຂອງເຮົາ. ບັດນີ້ ໃຫ້ເຈົ້າຟັງແມ່ໃຫ້ດີ ແລງມື້ນີ້ໂບອາດຈະໄປຟາດເຂົ້າ. 3 ສະນັ້ນ ເຈົ້າຈົ່ງອາບນໍ້າ, ທານໍ້າຫອມ ແລະນຸ່ງເຄື່ອງໂຕຈົບງາມທີ່ສຸດ ແລ້ວໃຫ້ເຈົ້າໄປໃນລານບ່ອນທີ່ເພິ່ນກຳລັງຟາດເຂົ້ານັ້ນ ແຕ່ຢ່າໃຫ້ເພິ່ນຮູ້ວ່າເຈົ້າຢູ່ທີ່ນັ້ນ ຈົນກວ່າເພິ່ນກິນແລະດື່ມແລ້ວ. 4 ແຕ່ຢ່າລືມສັງເກດເບິ່ງບ່ອນທີ່ເພິ່ນເຂົ້າໄປນອນ. ເວລາເພິ່ນນອນຫລັບແລ້ວ ໃຫ້ເຈົ້າເຂົ້າໄປເປີດຜ້າຫົ່ມທີ່ຕີນຂອງເພິ່ນແລະນອນຢູ່ທີ່ນັ້ນ. ເພິ່ນຈະບອກວ່າເຈົ້າຄວນຈະເຮັດຢ່າງໃດໃນຂັ້ນຕໍ່ໄປ.” 5 ນາງຣຸດຈຶ່ງເວົ້າວ່າ, “ລູກຈະເຮັດທຸກໆສິ່ງຕາມທີ່ແມ່ບອກ.” 6 ດັ່ງນັ້ນ ນາງຣຸດຈຶ່ງເຂົ້າໄປທີ່ລານຟາດເຂົ້າ ແລະເຮັດຕາມທີ່ຍ່າໄດ້ບອກນັ້ນທຸກຢ່າງ. 7 ເມື່ອໂບອາດກິນແລະດື່ມແລ້ວ ເພິ່ນກໍມີອາຣົມດີ. ສະນັ້ນ ເພິ່ນຈຶ່ງໄປນອນຢູ່ໃກ້ກອງເຂົ້າເດືອຍ. ນາງຣຸດຄ່ອຍຢ່ອງເຂົ້າໄປຢ່າງມິດໆ, ເປີດຜ້າຫົ່ມຂຶ້ນ ແລະນອນຢູ່ທີ່ຕີນຂອງເພິ່ນ. 8 ໃນຕອນກາງຄືນ ເມື່ອໂບອາດຮູ້ເມື່ອແລະພິກຕົວ ເພິ່ນກໍປະຫລາດໃຈທີ່ເຫັນຍິງຄົນໜຶ່ງນອນຢູ່ທີ່ຕີນຂອງຕົນ. 9 ເພິ່ນຈຶ່ງຖາມວ່າ, “ເຈົ້າແມ່ນໃຜ?” ນາງຕອບວ່າ, “ທ່ານເອີຍ ຂ້ານ້ອຍແມ່ນຣຸດ ເພາະທ່ານເປັນຍາດຕິພີ່ນ້ອງຜູ້ໃກ້ຊິດ ທ່ານຈຶ່ງມີໜ້າທີ່ເບິ່ງແຍງຂ້ານ້ອຍ. ດັ່ງນັ້ນ ຂໍທ່ານຈົ່ງແຕ່ງງານກັບຂ້ານ້ອຍເທີ້ນ.” 10 ເພິ່ນກ່າວວ່າ, “ຂໍພຣະເຈົ້າຢາເວອວຍພອນເຈົ້າເຖີດ ເຈົ້າສະແດງຄວາມສັດຊື່ຕໍ່ຄອບຄົວໃນຄັ້ງນີ້ ກໍຍິ່ງໃຫຍ່ກວ່າທີ່ເຈົ້າໄດ້ປະຕິບັດຕໍ່ຍ່າຂອງເຈົ້າ. ເຈົ້າອາດຊອກຫາຊາຍໜຸ່ມທີ່ຮັ່ງມີຫລືຍາກຈົນກໍໄດ້ ແຕ່ເຈົ້າບໍ່ໄດ້ເຮັດ. 11 ຣຸດເອີຍ ບັດນີ້ຢ່າກັງວົນເທາະ ຂ້ອຍຈະເຮັດທຸກສິ່ງຕາມທີ່ເຈົ້າຮ້ອງຂໍ ເພາະທຸກຄົນໃນເມືອງນີ້ກໍຮູ້ແລ້ວວ່າເຈົ້າເປັນຄົນດີ. 12 ເປັນຄວາມຈິງແທ້ ທີ່ຂ້ອຍເປັນພີ່ນ້ອງຜູ້ໃກ້ຊິດຂອງເຈົ້າ ແລະ ທັງມີໜ້າທີ່ຮັບຜິດຊອບເບິ່ງແຍງເຈົ້າ. ແຕ່ຍັງມີຊາຍຢູ່ອີກຄົນໜຶ່ງ ທີ່ເປັນພີ່ນ້ອງຜູ້ໃກ້ຊິດກັບເຈົ້າຫລາຍກວ່າຂ້ອຍ. 13 ຄືນນີ້ ຈົ່ງນອນຢູ່ບ່ອນນີ້ແຫຼະ ແລະໃນມື້ອື່ນເຊົ້າ ພວກເຮົາຈະຕ້ອງຖາມລາວເບິ່ງວ່າ ລາວຈະເປັນຜູ້ຮັບຜິດຊອບເບິ່ງແຍງເຈົ້າຫລືບໍ່? ຖ້າລາວຮັບກໍເປັນການດີຫລາຍ; ຖ້າລາວບໍ່ຮັບ ຂ້ອຍຂໍສາບານຕໍ່ພຣະເຈົ້າຢາເວອົງຊົງຊີວິດຢູ່ວ່າ ຂ້ອຍຈະຮັບຜິດຊອບໃນເລື່ອງນີ້. ຈົ່ງນອນສາ ແລະຢູ່ທີ່ນີ້ຈົນເຖິງມື້ອື່ນເຊົ້າ.” 14 ດັ່ງນັ້ນ ນາງຣຸດຈຶ່ງນອນຢູ່ທີ່ນັ້ນທີ່ຕີນຂອງໂບອາດ; ແຕ່ກ່ອນແຈ້ງພໍເຫັນຮຸ່ງ ນາງຈຶ່ງລຸກຂຶ້ນຈາກໄປ ເພາະໂບອາດບໍ່ຢາກໃຫ້ຜູ້ໃດຜູ້ໜຶ່ງຮູ້ວ່າ ນາງນອນຢູ່ໃນທີ່ນັ້ນ. 15 ໂບອາດບອກນາງວ່າ, “ຈົ່ງແກ້ເສື້ອຊັ້ນນອກຂອງເຈົ້າພືອອກ.” ນາງຣຸດກໍເຮັດຕາມແລະເພິ່ນໄດ້ຖອກເຂົ້າເດືອຍໃສ່ເກືອບເຖິງຊາວກິໂລກຼາມ ແລະຊ່ວຍຍົກເຂົ້ານັ້ນໃສ່ບ່າໃຫ້ນາງຣຸດແບກເມືອໃນເມືອງ. 16 ເມື່ອນາງຮອດເຮືອນ ແມ່ຍ່າຈຶ່ງຖາມວ່າ, “ລູກເອີຍ ເປັນຢ່າງໃດ?” ນາງຣຸດບອກຍ່າທຸກສິ່ງ ຕາມທີ່ໂບອາດໄດ້ກະທໍາສຳລັບນາງ 17 ແລະເວົ້າຕໍ່ໄປວ່າ, “ເພິ່ນຍັງບອກລູກວ່າລູກບໍ່ຄວນກັບມາຫາແມ່ມືເປົ່າ; ສະນັ້ນ ເພິ່ນຈຶ່ງເອົາເຂົ້າທັງໝົດນີ້ໃຫ້ລູກ.” 18 ນາງນາໂອມີເວົ້າກັບນາງຣຸດວ່າ, “ບັດນີ້ຣຸດເອີຍ ຈົ່ງອົດທົນເບິ່ງຈົນກວ່າລູກຈະຮູ້ວ່າ ເລື່ອງນີ້ຈະເປັນໄປຢ່າງໃດ? ມື້ນີ້ ໂບອາດຈະຢູ່ຢ່າງບໍ່ສະບາຍໃຈ ຈົນກວ່າລາວຈະຈັດການກັບເລື່ອງນີ້ໃຫ້ຮຽບຮ້ອຍສາກ່ອນ.” |
@ 2012 United Bible Societies. All Rights Reserved.