ເພງ^ສັນລະເສີນ 99 - ພຣະຄຳພີສັກສິພຣະເຈົ້າເປັນເຈົ້າກະສັດອົງສູງສຸດ 1 ພຣະເຈົ້າຢາເວເປັນເຈົ້າກະສັດ ແລະມະນຸດກໍສະທ້ານຢ້ານກົວ. ພຣະອົງນັ່ງເທິງບັນລັງເໜືອເຄຣຸບ ແລະແຜ່ນດິນກໍສະທ້ານຫວັ່ນໄຫວ. 2 ພຣະເຈົ້າຢາເວຊົງຍິ່ງໃຫຍ່ໃນຊີໂອນ ຄືພຣະອົງເປັນອົງສູງສຸດເໜືອທົ່ວທຸກຊົນຊາດ. 3 ທຸກຄົນຈະຍ້ອງຍໍສັນລະເສີນພຣະນາມອັນຍິ່ງໃຫຍ່ແລະສູງສົ່ງ ຊຶ່ງເປັນທີ່ຄວນຢ້ານຢຳແລະບໍຣິສຸດດ້ວຍ. 4 ກະສັດຜູ້ຊົງອຳນາດຍິ່ງໃຫຍ່ ເພາະພຣະອົງຮັກການກະທຳທີ່ເປັນທຳ ແລະໃຫ້ມີຄວາມຍຸດຕິທຳໃນຊາດອິດສະຣາເອນ ພຣະອົງໄດ້ນຳຄວາມຊອບທຳແລະຄວາມເປັນທຳມາໃຫ້. 5 ຈົ່ງຍ້ອງຍໍສັນລະເສີນພຣະເຈົ້າຢາເວ ພຣະເຈົ້າຂອງພວກເຮົາ ຈົ່ງນະມັດສະການອົງບໍຣິສຸດຕໍ່ໜ້າພຣະບັນລັງເຖີດ. 6 ທັງໂມເຊແລະອາໂຣນຕ່າງກໍເປັນປະໂຣຫິດ ແລະຊາມູເອນກໍໄດ້ເປັນຜູ້ໜຶ່ງທີ່ພາວັນນາອະທິຖານຕໍ່ນາມຊື່ຂອງພຣະອົງ, ຕ່າງກໍໄດ້ຮ້ອງຫາພຣະເຈົ້າຢາເວໃຫ້ຊ່ວຍຊູ ຝ່າຍພຣະອົງກໍໄດ້ຕອບພວກເພິ່ນ. 7 ຈາກເສົາເມກພຣະອົງໄດ້ກ່າວກັບພວກເພິ່ນ ພວກເພິ່ນໄດ້ເຊື່ອຟັງກົດບັນຍັດແລະຂໍ້ຄຳສັ່ງຂອງພຣະອົງ. 8 ຂ້າແດ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍເອີຍ ພຣະອົງຊົງຕອບຄຳພາວັນນາອະທິຖານປະຊາຊົນຂອງພຣະອົງແລ້ວ. ພຣະອົງໄດ້ຊີ້ໃຫ້ເຫັນວ່າພຣະອົງເປັນພຣະເຈົ້າທີ່ໃຫ້ອະໄພ ແມ່ນວ່າພຣະອົງລົງໂທດຍ້ອນການບາບກໍຕາມ. 9 ຈົ່ງຍ້ອງຍໍສັນລະເສີນພຣະເຈົ້າຢາເວ ພຣະເຈົ້າຂອງພວກເຮົາ ຈົ່ງນະມັດສະການທີ່ເນີນພູສັກສິດຂອງພຣະອົງ. ດ້ວຍວ່າ, ພຣະເຈົ້າຢາເວ ພຣະເຈົ້າຂອງພວກເຮົາ ເປັນອົງບໍຣິສຸດ. |
@ 2012 United Bible Societies. All Rights Reserved.