ເພງ^ສັນລະເສີນ 98 - ພຣະຄຳພີສັກສິພຣະເຈົ້າເປັນຜູ້ປົກຄອງໂລກນີ້ 1 ຈົ່ງຮ້ອງເພງບົດໃໝ່ຖວາຍແກ່ ພຣະເຈົ້າຢາເວ ເພາະສິ່ງອັນໜ້າງຶດງໍ້ອັດສະຈັນທີ່ພຣະອົງໄດ້ກະທຳນັ້ນ. ຍ້ອນຣິດເດດອຳນາດແລະພຣະກຳລັງອັນບໍຣິສຸດ ພຣະອົງໄດ້ນຳໄຊຊະນະມາສູ່ພຣະອົງເອງ. 2 ພຣະເຈົ້າຢາເວໄດ້ປະກາດໄຊຊະນະຂອງພຣະອົງ ໃຫ້ບັນດາຊົນຊາດຮູ້ວ່າພຣະອົງຊ່ວຍໃຫ້ພົ້ນໄດ້. 3 ພຣະອົງໄດ້ຮັກສາຄຳສັນຍາຂອງພຣະອົງໄວ້ກັບຄອບຄົວອິດສະຣາເອນ ດ້ວຍຄວາມສັດຊື່ແລະຄວາມຮັກອັນໝັ້ນຄົງນັ້ນ. ສ່ວນປະຊາຊົນທົ່ວທຸກບ່ອນຕ່າງກໍໄດ້ຮູ້ໄດ້ເຫັນ ໄຊຊະນະທີ່ພຣະເຈົ້າຂອງພວກເຮົານຳມານັ້ນ. 4 ທົ່ວທັງແຜ່ນດິນໂລກເອີຍ ຈົ່ງຍ້ອງຍໍສັນລະເສີນພຣະເຈົ້າຢາເວ ຈົ່ງໂຮຮ້ອງຍິນດີເປັນການສັນລະເສີນເຖີດ. 5 ຈົ່ງດີດກິດຕາ ແລະຈົ່ງບັນເລງເພງສັນລະເສີນ ຖວາຍຄຳສັນລະເສີນແກ່ພຣະເຈົ້າຢາເວ 6 ຈົ່ງໂຮຮ້ອງຍິນດີທັງເປົ່າແກແລະເຂົາສັດ ສັນລະເສີນອົງພຣະຜູ້ເປັນເຈົ້າຂອງພວກເຮົາຄືຈອມກະສັດຂອງພວກເຮົາ. 7 ທະເລກັບທຸກສິ່ງຢູ່ໃນນັ້ນກໍສະໜັ່ນຫວັ່ນໄຫວ ແຜ່ນດິນໂລກແລະທຸກຄົນກໍຮ້ອງລຳທຳເພງຂຶ້ນ. 8 ຈົ່ງຕົບມືກັນເຖີດ ແມ່ນໍ້າທັງຫລາຍເອີຍ ເນີນພູຈົ່ງພາກັນຮ້ອງດ້ວຍຄວາມຍິນດີ 9 ຕໍ່ໜ້າພຣະເຈົ້າຢາເວ ເພາະພຣະອົງກຳລັງຈະມາຕັດສິນແຜ່ນດິນໂລກ ເພື່ອພິພາກສາຕັດສິນໂລກດ້ວຍຄວາມຊອບທຳແລະຊົນຊາດທັງຫຼາຍດ້ວຍຄວາມສັດຊື່. |
@ 2012 United Bible Societies. All Rights Reserved.