ເພງ^ສັນລະເສີນ 94 - ພຣະຄຳພີສັກສິພຣະເຈົ້າເປັນຜູ້ຕັດສິນທຸກຄົນ 1 ຂ້າແດ່ພຣະເຈົ້າຢາເວ ພຣະອົງເປັນພຣະເຈົ້າແຫ່ງການຕອບແທນ ຂໍໃຫ້ຣັດສະໝີຂອງພຣະອົງສ່ອງແຈ້ງມາ. 2 ພຣະອົງເປັນຜູ້ຕັດສິນມະນຸດທຸກໆຄົນ ໂຜດລຸກຂຶ້ນລົງໂທດຄົນຈອງຫອງຕາມທີ່ເຂົາສົມຄວນໄດ້ຮັບ. 3 ຂ້າແດ່ພຣະເຈົ້າຢາເວ ສ່ວນຄົນຊົ່ວຮ້າຍນັ້ນຈະດີໃຈໄປດົນນານເທົ່າໃດ? ພວກເຂົາຈະຢູ່ອີກດົນປານໃດນໍ? 4 ຜູ້ຂ້າຄົນນັ້ນຈະຈອງຫອງໄປເຫິງປານໃດ? ຄູຍໂມ້ເຖິງອາດຊະຍາກຳຂອງພວກເຂົາໄປອີກນານເທົ່າໃດ? 5 ຂ້າແດ່ພຣະເຈົ້າຢາເວ ພວກເຂົາຢຽບຢໍ່າປະຊາຊົນຂອງພຣະອົງ ກົດຂີ່ພວກທີ່ເປັນຂອງພຣະເຈົ້າ. 6 ພວກເຂົາຂ້າແມ່ໝ້າຍແລະລູກກຳພ້າທັງຫລາຍ ແລະຄົນຕ່າງດ້າວທີ່ຢູ່ໃນດິນແດນດ້ວຍ. 7 ພວກເຂົາເວົ້າກັນວ່າ, “ພຣະເຈົ້າຢາເວບໍ່ເຫັນພວກເຮົາດອກ ພຣະເຈົ້າແຫ່ງອິດສະຣາເອນບໍ່ສົນໃຈດອກ.” 8 ປະຊາຊົນຂອງຂ້ອຍເອີຍ ເຫດໃດຈຶ່ງໂງ່ຢ່າງນີ້? ເມື່ອໃດພວກເຈົ້າຈະຮໍ່າຮຽນເປັນຄົນສະຫລາດ? 9 ພຣະອົງຊົງສ້າງຫູພວກເຮົາໄວ້ ພຣະອົງຈະບໍ່ໄດ້ຍິນຊັ້ນບໍ? ພຣະອົງສ້າງຕາພວກເຮົາ ພຣະອົງຈະເຫັນບໍ່ໄດ້ຫລື? 10 ພຣະອົງວາງລະບຽບໃຫ້ແກ່ຊົນຊາດທັງຫລາຍ ພຣະອົງຈະບໍ່ລົງໂທດພວກເຂົາຫລື? ພຣະອົງເປັນຄູສັ່ງສອນມະນຸດທຸກຄົນ ພຣະອົງບໍ່ມີຄວາມຮູ້ໃດໆຫລື? 11 ພຣະເຈົ້າຢາເວຮູ້ວ່າພວກເຂົາຄິດຢ່າງໃດ ທັງຮູ້ເຫດຜົນຂອງພວກເຂົາວ່າບໍ່ມີປະໂຫຍດ. 12 ຂ້າແດ່ພຣະເຈົ້າຢາເວ ຄວາມສຸກເປັນຂອງຜູ້ທີ່ພຣະອົງຕີສອນ ຄືຜູ້ທີ່ພຣະອົງສັ່ງສອນກົດບັນຍັດໃຫ້ນັ້ນ. 13 ພຣະອົງໃຫ້ພວກເຂົາໄດ້ພັກຜ່ອນ ຈາກວັນແຫ່ງຄວາມຍາກລຳບາກ ຈົນກວ່າພຣະອົງຈະຂຸດຂຸມດັກຈັບຄົນຊົ່ວຮ້າຍ. 14 ພຣະເຈົ້າຢາເວຈະບໍ່ປະປ່ອຍປະຊາຊົນຂອງພຣະອົງ ຈະບໍ່ປະຖິ້ມຄົນໃດໆຜູ້ທີ່ເປັນຂອງພຣະອົງ. 15 ຄວາມຍຸດຕິທຳນັ້ນຈະກັບໄປຫາ ຄົນຊອບທຳ ແລະຄົນທ່ຽງທຳກໍຈະສະໜັບສະໜູນການນີ້. 16 ແມ່ນໃຜໄດ້ຢືນຕໍ່ຕ້ານຄົນຊົ່ວຮ້າຍແທນຂ້າພະເຈົ້າ? ແມ່ນໃຜໄດ້ເຂົ້າຂ້າງຂ້າພະເຈົ້າຕໍ່ສູ້ຄົນເຮັດຊົ່ວ? 17 ຖ້າພຣະເຈົ້າຢາເວບໍ່ໄດ້ຊ່ວຍເຫລືອຂ້ານ້ອຍໄວ້ທັນ ປານນີ້ກໍຄົງລົງສູ່ແດນແຫ່ງຄວາມງຽບ. 18 ຂ້າແດ່ພຣະເຈົ້າຢາເວ ຂ້ານ້ອຍກຳລັງລົ້ມ ແຕ່ຄວາມຮັກອັນໝັ້ນຄົງຂອງພຣະອົງ ກໍຊ່ວຍຊູຂ້ານ້ອຍໃຫ້ລຸກຂຶ້ນ. 19 ເມື່ອໃດທີ່ຂ້ານ້ອຍອຸກອັ່ງກັງວົນໃນຈິດໃຈ ພຣະອົງກໍເລົ້າໂລມຂ້ານ້ອຍໃຫ້ມີໃຈຊົມຊື່ນ. 20 ຜູ້ປົກຄອງທີ່ຊົ່ວຮ້າຍຈະຮ່ວມມືກັບພຣະອົງໄດ້ຫລື? ຄືຜູ້ທີ່ແຕ່ງກົດບັນຍັດອັນບໍ່ຍຸດຕິທຳນັ້ນ. 21 ພວກເຂົາວາງແຜນປອງຮ້າຍຕໍ່ສູ້ຄົນດີ ລົງໂທດຄົນບໍ່ມີຄວາມຜິດໃຫ້ເຖິງແກ່ຊີວິດ. 22 ແຕ່ພຣະເຈົ້າຢາເວເປັນປ້ອມປ້ອງກັນອັນເຂັ້ມແຂງຂອງຂ້ານ້ອຍ ແລະພຣະເຈົ້າຂອງຂ້ານ້ອຍເປັນຫີນດານຄຸ້ມຄອງຮັກສາ ຊຶ່ງຂ້ານ້ອຍເຂົ້າໄປລີ້ໄພ. 23 ຍ້ອນຄວາມຊົ່ວຮ້າຍ ພຣະອົງຈະລົງໂທດພວກເຂົາ ຍ້ອນການບາບຂອງພວກເຂົາ ພຣະອົງຈະທຳລາຍພວກເຂົາຖິ້ມ. ພຣະເຈົ້າຢາເວ ພຣະເຈົ້າຂອງຂ້ານ້ອຍ ຈະທຳລາຍພວກເຂົາຖິ້ມ. |
@ 2012 United Bible Societies. All Rights Reserved.