ເພງ^ສັນລະເສີນ 90 - ພຣະຄຳພີສັກສິໝວດທີ 4 (ເພງສັນລະເສີນ 90–106) ສະພາບນິລັນດອນຂອງພຣະເຈົ້າແລະຄວາມອະນິຈັງຂອງມະນຸດ 1 ຂ້າແດ່ອົງພຣະຜູ້ເປັນເຈົ້າ ພຣະອົງເປັນທີ່ເພິ່ງ ຂອງພວກຂ້ານ້ອຍຕະຫລອດໄປ. 2 ກ່ອນທີ່ພູຜາປ່າໄມ້ຖືກສ້າງຂຶ້ນມາ ກ່ອນທີ່ໂລກເຮົາດຳລົງຄົງຕົວຢູ່ຢ່າງນີ້ ພຣະອົງເປັນພຣະເຈົ້າອົງເປັນຢູ່ຊົ່ວນິຣັນການ ແລະເປັນພຣະເຈົ້າທີ່ດຳລົງຢູ່ສືບໄປເປັນນິດ. 3 ພຣະອົງບອກໃຫ້ມະນຸດຄືນໄປສູ່ບ່ອນທີ່ເຂົາມາ ແລະປ່ຽນມະນຸດໃຫ້ກັບຄືນເປັນຂີ້ຝຸ່ນດິນອີກ. 4 ສຳລັບພຣະອົງແລ້ວພັນປີກໍເທົ່າກັບວັນໜຶ່ງ ເໝືອນດັ່ງມື້ວານນີ້ທີ່ຜ່ານໄປສັ້ນໆໃນຕອນກາງຄືນ. 5 ພຣະອົງກວາດພວກຂ້ານ້ອຍໜີໄປເໝືອນດັ່ງນໍ້າຖ້ວມ ຊີວິດຈຶ່ງເປັນດັ່ງຄວາມຝັນເທົ່ານັ້ນ. ພວກຂ້ານ້ອຍເປັນດັ່ງຕົ້ນຫຍ້າທີ່ເກີດຂຶ້ນມາ ຄືຫຍ້າທີ່ປົ່ງຂຶ້ນມາໃນເວລາຕອນເຊົ້າ 6 ຊຶ່ງໃຫຍ່ຂຶ້ນແລ້ວກໍແຕກດອກອອກບານ ແລະຫ່ຽວແຫ້ງຕາຍໄປໃນເວລາຕອນຄໍ່າມາຮອດ. 7 ພວກຂ້ານ້ອຍຖືກທຳລາຍໂດຍຄວາມໂກດຮ້າຍຂອງພຣະອົງ ແລະຫວາດຫວັ່ນຕົກໃຈກົວຍ້ອນພຣະອົງກິ້ວໂກດ. 8 ພຣະອົງເປີດເຜີຍການບາບຂອງພວກຂ້ານ້ອຍຕໍ່ໜ້າພຣະອົງ ຄືການບາບອັນລັບລີ້ຊຶ່ງພຣະອົງເຫັນໄດ້. 9 ຄວາມໂກດຮ້າຍຂອງພຣະອົງນັ້ນ ເຮັດໃຫ້ຊີວິດຂ້ານ້ອຍສັ້ນລົງ ມັນເຊື່ອມສະຫຼາຍໄປດັ່ງສາຍລົມ. 10 ພວກຂ້ານ້ອຍມີຊີວິດຢູ່ພຽງແຕ່ເຈັດສິບປີ ອາດຮອດແປດສິບປີຖ້າມີເຫື່ອແຮງຢູ່ ແຕ່ຊ່ວງໄລຍະອາຍຸນັ້ນກໍພົບຄວາມລຳບາກ ແລະເຮັດໃຫ້ລະທົມທຸກໃຈ ໃນບໍ່ຊ້າຊີວິດຈະຈົບລົງແລະຕາຍໄປເທົ່ານັ້ນ. 11 ໃຜຮູ້ຣິດແຫ່ງຄວາມໂກດຮ້າຍອັນເຕັມຂະນາດຂອງພຣະອົງໄດ້? ຜູ້ໃດຮູ້ວ່າຄວາມໂກດຮ້າຍຂອງພຣະອົງ ໄດ້ນຳພາຄວາມໜ້າຢ້ານສໍ່າໃດແທ້? 12 ຂໍຊົງໂຜດສັ່ງສອນຂ້ານ້ອຍດ້ວຍວ່າຊີວິດນີ້ສັ້ນຫລາຍ ເພື່ອວ່າພວກຂ້ານ້ອຍຈະກາຍເປັນຄົນສະຫລາດ. 13 ຂ້າແດ່ພຣະເຈົ້າຢາເວ ພຣະອົງຈະໂກດຮ້າຍຢູ່ອີກດົນປານໃດ? ໂຜດເມດຕາອີດູຜູ້ຮັບໃຊ້ຂອງພຣະອົງດ້ວຍ 14 ໃນທຸກໆເຊົ້າໂຜດໃຫ້ພວກຂ້ານ້ອຍເຕັມໄປ ດ້ວຍຄວາມຮັກອັນໝັ້ນຄົງຂອງພຣະອົງດ້ວຍ ເພື່ອວ່າຈະໄດ້ຮ້ອງເພງແລະຊົມຊື່ນຍິນດີ ຕະຫລອດຊົ່ວຊີວິດຂອງພວກຂ້ານ້ອຍນັ້ນ. 15 ບັດນີ້ ໂຜດປະທານຄວາມສຸກແກ່ພວກຂ້ານ້ອຍ ໃຫ້ສົມກັບຄວາມໂສກເສົ້າທີ່ພວກຂ້ານ້ອຍໄດ້ຮັບດ້ວຍ ຕາມໄລຍະເວລາແຫ່ງປີທັງຫຼາຍ ທີ່ພວກຂ້ານ້ອຍຈົມຢູ່ໃນຄວາມທຸກລຳບາກ. 16 ຂໍຊົງໂຜດໃຫ້ພວກຂ້ານ້ອຍຜູ້ຮັບໃຊ້ຂອງພຣະອົງ ໄດ້ເຫັນຄວາມຍິ່ງໃຫຍ່ຂອງພຣະອົງ ຄືສິ່ງອັດສະຈັນທີ່ພຣະອົງໄດ້ກະທຳນັ້ນ ຂໍຊົງໂຜດໃຫ້ເຊື້ອສາຍຂອງຂ້ານ້ອຍໄດ້ເຫັນເໝືອນກັນ ໃນຣິດທານຸພາບຂອງພຣະອົງນັ້ນ. 17 ອົງພຣະຜູ້ເປັນເຈົ້າ ພຣະເຈົ້າຂອງພວກຂ້ານ້ອຍເອີຍ ຂໍຊົງໂຜດປະທານພຣະພອນໃຫ້ດຳລົງຢູ່ນຳພວກຂ້ານ້ອຍແດ່ທ້ອນ ຂໍຊົງໂຜດປະທານຄວາມສຳເລັດຜົນໃຫ້ພວກຂ້ານ້ອຍ ໃນທຸກສິ່ງທີ່ພວກຂ້ານ້ອຍກະທຳນັ້ນ. |
@ 2012 United Bible Societies. All Rights Reserved.