ເພງ^ສັນລະເສີນ 85 - ພຣະຄຳພີສັກສິຄຳພາວັນນາອະທິຖານຂໍໃຫ້ປະເທດຊາດສະຫງົບສຸກ 1 ຂ້າແດ່ພຣະເຈົ້າຢາເວ ຂໍຊົງໂຜດເມດຕາດິນແດນຂອງພຣະອົງ ພຣະອົງໄດ້ໂຜດໃຫ້ອິດສະຣາເອນຮຸ່ງເຮືອງຂຶ້ນໃໝ່. 2 ພຣະອົງໄດ້ອະໄພການບາບໃຫ້ປະຊາຊົນ ແລະຍົກໂທດຍົກຜິດທຸກຢ່າງໃຫ້ເຂົາເຈົ້າ. 3 ຄວາມໂກດຮ້າຍຂອງພຣະອົງກໍບໍ່ມີຕໍ່ພວກເຂົາຕໍ່ໄປ ຄວາມກິ້ວໂກດຂອງພຣະອົງກໍຖືກຖອນຖິ້ມແລ້ວ. 4 ຂ້າແດ່ພຣະເຈົ້າແຫ່ງຄວາມພົ້ນຂອງພວກຂ້ານ້ອຍ ຂໍຊົງໂຜດນຳພວກຂ້ານ້ອຍຄືນບ້ານ ໂຜດລະຖິ້ມຄວາມບໍ່ພໍໃຈ ທີ່ພຣະອົງມີ ຕໍ່ພວກຂ້ານ້ອຍນັ້ນເຖີດ. 5 ພຣະອົງຈະໂກດຮ້າຍຕະຫລອດໄປຊັ້ນບໍ? ຄວາມໂກດຮ້າຍຈະບໍ່ສຸດເປັນຈັກເທື່ອຫລືນີ້? 6 ຂໍຊົງໂຜດເຮັດໃຫ້ພວກຂ້ານ້ອຍເຂັ້ມແຂງຂຶ້ນໃໝ່ແດ່ ແລະປະຊາຊົນຂອງພຣະເຈົ້າຈະຍ້ອງຍໍສັນລະເສີນພຣະອົງ. 7 ໂຜດໃຫ້ຄວາມຮັກອັນໝັ້ນຄົງຂອງພຣະເຈົ້າຢາເວໄດ້ດຳລົງ ຢູ່ນຳແລະຊ່ວຍພວກຂ້ານ້ອຍໃຫ້ພົ້ນໄພດ້ວຍ. 8 ຂ້ານ້ອຍຟັງສິ່ງທີ່ພຣະເຈົ້າພຣະເຈົ້າຢາເວຈະກ່າວ ພຣະອົງຊົງສັນຍາໃຫ້ຄວາມສັນຕິສຸກແກ່ພວກຂ້ານ້ອຍນັ້ນ ຄືໃຫ້ປະຊາຊົນຂອງພຣະອົງມີຄວາມສະຫງົບສຸກ ຖ້າພວກຂ້ານ້ອຍບໍ່ເຮັດສິ່ງທີ່ໂງ່ຈ້າອີກ. 9 ແທ້ຈິງແລ້ວ ພຣະອົງຕຽມພ້ອມທີ່ຈະຊ່ວຍຊູ ຜູ້ຖວາຍກຽດແກ່ພຣະອົງໃຫ້ພົ້ນໄພໄດ້ ແລະສະຫງ່າຣາສີຂອງພຣະອົງຈະດຳລົງຢູ່ຕໍ່ໄປ ໃນດິນແດນຂອງພວກຂ້ານ້ອຍນັ້ນ. 10 ຄວາມຮັກກັບຄວາມສັດຊື່ຈະພົບພໍ້ກັນ ຄວາມຊອບທຳແລະສັນຕິສຸກຈະກອດກັນໄວ້. 11 ຄວາມສັດຊື່ຂອງຄົນຈະຟົ້ງຈາກແຜ່ນດິນຂຶ້ນໄປ ແລະສະຫວັນຈະສ່ອງຄວາມຊອບທຳຂອງພຣະເຈົ້າລົງມາ. 12 ພຣະເຈົ້າຢາເວຈະເຮັດໃຫ້ພວກເຮົາຈະເລີນຮຸ່ງເຮືອງ ດິນແດນຂອງພວກເຮົາຈະໄດ້ເກັບກ່ຽວຢ່າງດີ. 13 ຄວາມຊອບທຳຈະໄປກ່ອນໜ້າພຣະອົງ ແລະຈັດຕຽມຫົນທາງໄວ້ສຳລັບພຣະອົງດ້ວຍ. |
@ 2012 United Bible Societies. All Rights Reserved.