ເພງ^ສັນລະເສີນ 80 - ພຣະຄຳພີສັກສິພຣະຜູ້ລ້ຽງອິດສະຣາເອນ ຈົ່ງຟັງເຖີດ 1 ໂອ ພຣະຜູ້ລ້ຽງຂອງອິດສະຣາເອນເອີຍ ຂໍຊົງໂຜດຮັບຟັງພວກຂ້ານ້ອຍດ້ວຍເຖີດ ຜູ້ລ້ຽງຝູງແກະຂອງພຣະອົງເອີຍ ໂຜດຟັງ ຄືຜູ້ນັ່ງເທິງບັນລັງເໜືອບັນດາເຄຣຸບ 2 ຜູ້ປາກົດພຣະອົງເອງແກ່ເຜົ່າເອຟຣາອິມ ແກ່ເຜົ່າເບັນຢາມິນແລະເຜົ່າມານາເຊນັ້ນ. ຂໍຊົງໂຜດໃຫ້ພວກຂ້ານ້ອຍເຫັນພຣະກຳລັງແດ່ ແລະມາຊ່ວຍພວກຂ້ານ້ອຍໃຫ້ພົ້ນແດ່ທ້ອນ. 3 ຂ້າແດ່ພຣະເຈົ້າ ຂໍຊົງໂຜດນຳພວກຂ້ານ້ອຍກັບຄືນມາ ຂໍຊົງໂຜດເມດຕາ ແລ້ວພວກຂ້ານ້ອຍກໍຈະໄດ້ພົ້ນ. 4 ຂ້າແດ່ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ ດົນປານໃດທີ່ຍັງຊົງໂກດຮ້າຍ ຕໍ່ຄຳພາວັນນາອະທິຖານຂອງປະຊາຊົນພຣະອົງນັ້ນ? 5 ພຣະອົງໄດ້ເຮັດໃຫ້ພວກຂ້ານ້ອຍກິນເຂົ້າກັບນໍ້າຕາ ແລະເອົານໍ້າຕາເຕັມຈອກໃຫຍ່ມາໃຫ້ດື່ມ. 6 ພຣະອົງປ່ອຍໃຫ້ຊົນຊາດໃກ້ຄຽງມາຮຸກຮານດິນແດນ ແລະໃຫ້ພວກຂ້ານ້ອຍຖືກພວກເຂົາດູໝິ່ນ. 7 ຂ້າແດ່ພຣະເຈົ້າອົງຊົງຣິດອຳນາດຍິ່ງໃຫຍ່ເອີຍ ຂໍຊົງໂຜດນຳພວກຂ້ານ້ອຍກັບຄືນມາແດ່ທ້ອນ ຂໍຊົງໂຜດໃຫ້ຄວາມເມດຕາແກ່ພວກຂ້ານ້ອຍແດ່ ແລ້ວພວກຂ້ານ້ອຍກໍຈະພົ້ນໄພ. 8 ພຣະອົງໄດ້ເອົາເຄືອອະງຸ່ນອອກມາຈາກປະເທດເອຢິບ ແລ້ວພຣະອົງໄດ້ຂັບໄລ່ຊົນຊາດຕ່າງໆໜີ ຈາກດິນແດນຂອງພວກເຂົາແລະເອົາເຄືອອະງຸ່ນ ມາປູກໄວ້ແທນໃນດິນແດນນັ້ນ. 9 ພຣະອົງໄດ້ຖາງປ່າແລະພວນດິນຄືນໃໝ່ໃຫ້ດີ ສຳລັບໃຫ້ເຄືອອະງຸ່ນປົ່ງງາມດີ ມັນມີຮາກຢັ່ງລົງເລິກຫລາຍແລະແຜ່ຜາຍອອກໄປ ທົ່ວທັງຜືນແຜ່ນດິນນັ້ນ. 10 ຫົ່ມຂອງມັນປົກຫຸ້ມພູໄວ້ໄດ້ ແລະເຄືອຂອງມັນກໍປົກຄຸມຕົ້ນສົນໃຫຍ່ທີ່ສຸດໄດ້. 11 ສ່ວນງ່າໄດ້ແຜ່ໄປຮອດທະເລເມດີແຕຣາເນ ແລະໄປໄກສຸດຈົນຮອດແມ່ນໍ້າເອີຟຣັດ. 12 ເປັນຫຍັງພຣະອົງຈຶ່ງທຳລາຍຮົ້ວອ້ອມນັ້ນລົງ? ບັດນີ້ ໃຜໆຜ່ານໄປກໍລັກເອົາໝາກຂອງມັນໄດ້. 13 ແລ້ວຝູງໝູປ່າກໍໄດ້ມາຢຽບຢໍ່າທຳລາຍມັນລົງ ແລະສັດປ່າທັງຫລາຍກໍມາກັດກິນມັນດ້ວຍ. 14 ຂ້າແດ່ພຣະເຈົ້າອົງຊົງຣິດອຳນາດຍິ່ງໃຫຍ່ເອີຍ ຂໍຊົງໂຜດຫລຽວລົງຈາກສະຫວັນແລະມາຊ່ວຍຊູດ້ວຍ 15 ຂໍຊົງໂຜດມາຊ່ວຍເຄືອອະງຸ່ນທີ່ພຣະອົງຊົງໄດ້ປູກໄວ້ໃຫ້ພົ້ນໄພ ຄືເບ້ຍອະງຸ່ນທີ່ພຣະອົງໄດ້ໃຫ້ຈະເລີນໃຫຍ່ຈົນເຂັ້ມແຂງນັ້ນ. 16 ສັດຕູຂອງພວກຂ້ານ້ອຍໄດ້ຕັດມັນລົງແລະຈູດມັນຖິ້ມ ຂໍພຣະອົງຫລຽວເບິ່ງດ້ວຍຄວາມໂກດຮ້າຍແລະທຳລາຍພວກເຂົາດ້ວຍ 17 ຂໍຊົງໂຜດປົກປ້ອງຄຸ້ມຄອງປະຊາຊົນຂອງພຣະອົງທີ່ຊົງເລືອກເອົາ ຄືຊົນຊາດທີ່ພຣະອົງໄດ້ເຮັດໃຫ້ເຂັ້ມແຂງນັ້ນ. 18 ພວກຂ້ານ້ອຍຈະບໍ່ຫັນໜີໄປອີກຈັກເທື່ອ ຂໍຊົງໂຜດໃຫ້ມີຊີວິດຢູ່ແລະຈະໄດ້ຍ້ອງຍໍສັນລະເສີນພຣະອົງ. 19 ຂ້າແດ່ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ເອີຍ ຂໍຊົງໂຜດນຳພວກຂ້ານ້ອຍໃຫ້ກັບຄືນມາແດ່ທ້ອນ ຂໍຊົງໂຜດໃຫ້ຄວາມເມດຕາແກ່ພວກຂ້ານ້ອຍ ແລ້ວພວກຂ້ານ້ອຍກໍຈະໄດ້ພົ້ນໄພ. |
@ 2012 United Bible Societies. All Rights Reserved.