ເພງ^ສັນລະເສີນ 8 - ພຣະຄຳພີສັກສິສະຫງ່າຣາສີຂອງພຣະເຈົ້າແລະກຽດສັກສີຂອງມະນຸດ 1 ໂອ ຂ້າແດ່ພຣະເຈົ້າຢາເວ ອົງພຣະຜູ້ເປັນເຈົ້າຂອງພວກຂ້ານ້ອຍເອີຍ ພຣະນາມຂອງພຣະອົງປະເສີດເລີດລໍ້າທົ່ວທັງແຜ່ນດິນໂລກ! ພຣະອົງໄດ້ຊົງຕັ້ງສະຫງ່າຣາສີຂອງພຣະອົງເໜືອຟ້າສະຫວັນ. 2 ພຣະອົງໃຫ້ປາກຂອງເດັກນ້ອຍແລະເດັກອ່ອນທັງຫລາຍສົ່ງສຽງສັນລະເສີນ. ເພື່ອເຮັດໃຫ້ພວກສັດຕູຂອງພຣະອົງ ແລະພວກທີ່ກະທຳການແກ້ແຄ້ນ ມິດງຽບໄປ. 3 ເມື່ອຂ້ານ້ອຍຫລຽວເບິ່ງຟ້າສະຫວັນທີ່ພຣະອົງໄດ້ສ້າງຂຶ້ນມາ ເດືອນດາວທີ່ພຣະອົງຕັ້ງໄວ້ໃນບ່ອນຂອງມັນນັ້ນ 4 ມະນຸດສຳຄັນຫຍັງແດ່ທີ່ພຣະອົງຕ້ອງຄິດເຖິງພວກເຂົາ ມະນຸດທີ່ຕາຍເປັນ ສຳຄັນຫຍັງທີ່ພຣະອົງຕ້ອງຫ່ວງໃຍພວກເຂົາ? 5 ແຕ່ພຣະອົງໄດ້ສ້າງພວກເຂົາໃຫ້ຕໍ່າກວ່າພຣະເຈົ້າໜ້ອຍດຽວ ມີຖານະຮອງຈາກພຣະອົງ ພຣະອົງໄດ້ສວມມົງກຸດອັນມີກຽດຕິຍົດ ແລະສະຫງ່າຣາສີໃຫ້ພວກເຂົາດ້ວຍ. 6 ພຣະອົງໄດ້ແຕ່ງຕັ້ງພວກເຂົາໃຫ້ປົກຄອງ ທຸກໆສິ່ງທີ່ພຣະອົງໄດ້ສ້າງມານັ້ນຄື: 7-8 ຝູງແກະຝູງງົວຝູງສັດປ່ານາໆຊະນິດ ຝູງນົກ ຝູງປາ ສິ່ງທີ່ມີຊີວິດໃນທ້ອງທະເລນັ້ນ. 9 ໂອ ຂ້າແດ່ອົງພຣະຜູ້ເປັນເຈົ້າ ພຣະເຈົ້າຂອງພວກຂ້ານ້ອຍເອີຍ ພຣະນາມຂອງພຣະອົງຍິ່ງໃຫຍ່ລືຊາປາກົດໃນທົ່ວແຜ່ນດິນໂລກ. |
@ 2012 United Bible Societies. All Rights Reserved.