ເພງ^ສັນລະເສີນ 79 - ພຣະຄຳພີສັກສິຄຳຮ້ອງທຸກເພາະນະຄອນເຢຣູຊາເລັມຖືກທຳລາຍ 1 ຂ້າແດ່ພຣະເຈົ້າເອີຍ ຄົນບໍ່ນັບຖືພຣະເຈົ້າ ໄດ້ຮຸກຮານດິນແດນຂອງພຣະອົງ ໄດ້ເຮັດໃຫ້ພຣະວິຫານອັນສັກສິດຂອງພຣະອົງເສື່ອມເສຍສັກສີ ແລະນະຄອນເຢຣູຊາເລັມກໍຖືກທຳລາຍ. 2 ພວກເຂົາໄດ້ປະຊາກສົບປະຊາຊົນຂອງພຣະອົງໃຫ້ຝູງແຮ້ງກິນ ແລະສັດປ່າກໍກິນຊາກສົບຜູ້ຮັບໃຊ້ຂອງພຣະອົງ. 3 ເລືອດຄົນທີ່ສັດຊື່ຕໍ່ພຣະອົງນັ້ນຫລັ່ງໄຫລອອກມາ ດັ່ງສາຍທາລາທົ່ວນະຄອນເຢຣູຊາເລັມແລ້ວ. 4 ຊົນຊາດທີ່ຢູ່ອ້ອມຮອບໄດ້ດູໝິ່ນພວກຂ້ານ້ອຍ ພວກເຂົາຕ່າງກໍຫົວຂວັນແລະຫຍໍ້ຫຍັນໃສ່ພວກຂ້ານ້ອຍດ້ວຍ. 5 ຂ້າແດ່ພຣະເຈົ້າຢາເວ ພຣະອົງຈະໂກດຮ້າຍພວກຂ້ານ້ອຍຕະຫຼອດໄປບໍ? ສິ່ງນັ້ນຈະເປັນໄຟເຜົາຜານສືບຕໍ່ໄປຫລືນີ້? 6 ຈົ່ງໂກດຮ້າຍຊົນຊາດທີ່ບໍ່ເຊື່ອພຣະອົງສາ ຄືປະຊາຊົນທີ່ບໍ່ພາວັນນາອະທິຖານໃນພຣະນາມຂອງພຣະອົງ. 7 ເພາະພວກເຂົາໄດ້ຂ້າປະຊາຊົນຂອງພຣະອົງ ທຳລາຍດິນແດນໃຫ້ຮົກຮ້າງເພພັງໄປສິ້ນ. 8 ຂໍຢ່າລົງໂທດພວກຂ້ານ້ອຍ ຍ້ອນການບາບຂອງພວກປູ່ຍ່າຕາຍາຍ ເພາະພວກຂ້ານ້ອຍສິ້ນຫວັງ ໂຜດເມດຕາແດ່ທ້ອນ. 9 ຂ້າແດ່ພຣະເຈົ້າແຫ່ງຄວາມພົ້ນຂອງພວກຂ້ານ້ອຍ ຂໍຊົງໂຜດຊ່ວຍເຫລືອພວກຂ້ານ້ອຍ ເພື່ອເຫັນແກ່ສະຫງ່າຣາສີແຫ່ງພຣະນາມຂອງພຣະອົງ. ຂໍຊ່ວຍກູ້ເອົາພວກຂ້ານ້ອຍແລະອະໄພບາບໃຫ້ແດ່ ເພື່ອເຫັນແກ່ພຣະນາມຂອງພຣະອົງ. 10 ເປັນຫຍັງບັນດາຊົນຊາດຈຶ່ງຖາມຂ້ານ້ອຍວ່າ, “ພຣະເຈົ້າຂອງພວກເຈົ້າຢູ່ໃສ?” ຂໍຊົງໂຜດລົງໂທດພວກເຂົາໃຫ້ໄດ້ເຫັນແດ່ທ້ອນ ເພາະການນອງເລືອດຂອງຜູ້ຮັບໃຊ້ຂອງພຣະອົງນັ້ນ. 11 ຂໍຊົງໂຜດຟັງສຽງເຈັບປວດຄວນຄາງຂອງພວກນັກໂທດ ແລະໂດຍຣິດອຳນາດອັນຍິ່ງໃຫຍ່ ໂຜດໄວ້ຊີວິດຜູ້ຖືກໂທດປະຫານ. 12 ຂ້າແດ່ອົງພຣະຜູ້ເປັນເຈົ້າ ຂໍຊົງໂຜດແກ້ແຄ້ນຊົນຊາດອື່ນເຈັດຄັ້ງ ຍ້ອນການດູໝິ່ນນິນທາທີ່ພວກເຂົາເຮັດຕໍ່ພຣະອົງນັ້ນ. 13 ແລ້ວພວກຂ້ານ້ອຍທີ່ເປັນປະຊາຊົນຂອງພຣະອົງນັ້ນ ຄືເປັນຝູງແກະຂອງພຣະອົງຈະໂມທະນາຂອບພຣະຄຸນພຣະອົງ ຕະຫລອດໄປເປັນນິດ ແລະຈະຍ້ອງຍໍສັນລະເສີນພຣະອົງ ທຸກຍຸກທຸກສະໄໝ. |
@ 2012 United Bible Societies. All Rights Reserved.