ເພງ^ສັນລະເສີນ 75 - ພຣະຄຳພີສັກສິພຣະເຈົ້າຜູ້ຕັດສິນຄວາມ 1 ຂ້າແດ່ພຣະເຈົ້າເອີຍ ພວກຂ້ານ້ອຍຂໍຖວາຍຄຳໂມທະນາຂອບພຣະຄຸນພຣະອົງ, ພວກຂ້ານ້ອຍຂໍຖວາຍຄຳໂມທະນາຂອບພຣະຄຸນພຣະອົງ ແລະປະກາດວ່າພຣະອົງຍິ່ງໃຫຍ່ທີ່ສຸດ ແລະບອກເຖິງ ການອັດສະຈັນ ຊຶ່ງພຣະອົງໄດ້ກະທຳນັ້ນ. 2 ພຣະເຈົ້າຊົງກ່າວວ່າ, “ເຮົາໄດ້ຕັ້ງເວລາໄວ້ສຳລັບການພິພາກສາ ເຮົາຈະຕັດສິນຢ່າງຍຸດຕິທຳ. 3 ເຖິງແມ່ນວ່າສັບພະທຸກສິ່ງທີ່ມີຊີວິດນັ້ນ ສັ່ນສະທ້ານຢ້ານກົວກໍຕາມ ແຜ່ນດິນໂລກຄອນແຄນກໍຕາມ ແຕ່ເຮົາຈະຮັກສາພື້ນຖານມັນໃຫ້ໝັ້ນຄົງຢູ່. 4 ເຮົາບອກຄົນຊົ່ວຮ້າຍບໍ່ໃຫ້ຈອງຫອງ 5 ແລະບອກພວກເຂົາໃຫ້ຢຸດອວດອ້າງ.” 6 ການຕັດສິນນັ້ນບໍ່ໄດ້ມາຈາກທິດຕາເວັນອອກ ຫລືທິດຕາເວັນຕົກ ທິດເໜືອຫລືທິດໃຕ້; 7 ແຕ່ແມ່ນພຣະເຈົ້າເປັນຜູ້ຕັດສິນຄວາມໂດຍລົງໂທດ ໃສ່ບາງຄົນແລະປ່ອຍບາງຄົນໃຫ້ພົ້ນຜິດໄດ້. 8 ພຣະເຈົ້າຢາເວຖືຈອກຢູ່ໃນມືຊຶ່ງເຕັມໄປ ດ້ວຍເຫຼົ້າອະງຸ່ນປຸກແຫ່ງຄວາມໂກດຮ້າຍ. ພຣະອົງເທເຫຼົ້ານັ້ນ ແລະຄົນຊົ່ວຮ້າຍທັງຫລາຍໄດ້ດື່ມທຸກຄົນ ພວກເຂົາດື່ມກັນໝົດຈົນຢອດສຸດທ້າຍ. 9 ແຕ່ຂ້ານ້ອຍຈະບໍ່ຢຸດກ່າວເຖິງພຣະເຈົ້າຂອງຢາໂຄບ ຫລືເຊົາຮ້ອງເພງຍ້ອງຍໍສັນລະເສີນພຣະອົງຈັກເທື່ອ. 10 ພຣະອົງຈະທຳລາຍອຳນາດຂອງຄົນຊົ່ວຮ້າຍ ແຕ່ອຳນາດຂອງຄົນຊອບທຳຈະທະວີຂຶ້ນ. |
@ 2012 United Bible Societies. All Rights Reserved.