ເພງ^ສັນລະເສີນ 74 - ພຣະຄຳພີສັກສິຄຳຈົ່ມທຸກເພາະພຣະວິຫານຖືກທຳລາຍ 1 ຂ້າແດ່ພຣະເຈົ້າ ເຫດໃດຈຶ່ງປະຖິ້ມຢ່າງນີ້? ຈະຄຽດຮ້າຍປະຊາຊົນຂອງພຣະອົງສືບໄປຫລືນີ້? 2 ຂໍຊົງໂຜດຈົດຈຳປະຊາຊົນຂອງພຣະອົງ ທີ່ພຣະອົງໄດ້ເລືອກເອົາແຕ່ດົນນານມາແລ້ວ ຄືພວກທີ່ພຣະອົງໄດ້ນຳອອກຈາກການເປັນທາດ ມາເປັນຊົນເຜົ່າຂອງພຣະອົງນັ້ນ. ຈົ່ງລະນຶກຄິດເຖິງພູເຂົາຊີໂອນ ຊຶ່ງຄັ້ງໜຶ່ງພຣະອົງເຄີຍສະຖິດຢູ່. 3 ຈົ່ງຍ່າງເລາະເບິ່ງສິ່ງຫັກເພພັງທັງໝົດນັ້ນດູ ສັດຕູຂອງພວກຂ້ານ້ອຍໄດ້ທຳລາຍທຸກສິ່ງໃນພຣະວິຫານໝົດສິ້ນ. 4 ພວກສັດຕູຂອງພຣະອົງໄດ້ໂຮຮ້ອງຢ່າງມີໄຊໃນສະຖານທີ່ບໍຣິສຸດຂອງພຣອົງ. ພວກເຂົາໄດ້ປັກທຸງໄວ້ໃນທີ່ນັ້ນ ເພື່ອເປັນເຄື່ອງໝາຍແຫ່ງໄຊຊະນະ. 5 ພວກເຂົານັ້ນ ເປັນເໝືອນຄົນຕັດໄມ້ ທີ່ກຳລັງປໍ້າຕົ້ນໄມ້ດ້ວຍຂວານຂອງພວກເຂົາ. 6 ດ້ວຍຂວານແລະຄ້ອນຕີນັ້ນ ພວກເຂົາໄດ້ລົງມື ທັບປະຕູໄມ້ທີ່ແກະສະຫລັກຈົນໝຸ່ນທະລາຍ. 7 ພວກເຂົາໄດ້ຈູດພຣະວິຫານຂອງພຣະອົງ ແລະໄດ້ທຳລາຍຄວາມສັກສິດແຫ່ງສະຖານທີ່ແຫ່ງພຣະນາມຂອງພຣະອົງນັ້ນເຖິງດິນ. 8 ພວກເຂົາໄດ້ກ່າວໃນໃຈວ່າ, “ພວກເຮົາຈະຢຽບຢໍ່າພວກເຂົາໃຫ້ໝົດສິ້ນໄປ.” ພວກເຂົາຈູດເຜົາສະຖານທີ່ຊຸມນຸມໃນດິນແດນທຸກໆບ່ອນ. 9 ພວກຂ້ານ້ອຍບໍ່ເຫັນໝາຍສຳຄັນທັງຫຼາຍຕໍ່ໄປ ບໍ່ມີຜູ້ທຳນວາຍຈັກຄົນທີ່ຫລົງເຫລືອຢູ່ໃນທ່າມກາງພວກຂ້ານ້ອຍ ແລະບໍ່ມີໃຜຮູ້ວ່າຍັງດົນປານໃດ. 10 ຂ້າແດ່ພຣະເຈົ້າ ສັດຕູຈະຫົວຂວັນໃສ່ດົນປານໃດ? ພວກເຂົາຈະໝິ່ນປະໝາດພຣະອົງສືບໄປຫລືນີ້? 11 ດ້ວຍເຫດໃດພຣະອົງຈຶ່ງບໍ່ຍື່ນມືເຂົ້າມາຊ່ວຍພວກຂ້ານ້ອຍ? ເພາະເຫດໃດພຣະອົງຈຶ່ງເອົາມືຂັດຫລັງໄວ້? 12 ພຣະອົງຄືກະສັດຂອງພວກຂ້ານ້ອຍແຕ່ເດີມ ພຣະອົງໄດ້ໃຫ້ຄວາມພົ້ນເທິງແຜ່ນດິນໂລກ. 13 ທະເລຖືກແຍກດ້ວຍຣິດທານຸພາບຂອງພຣະອົງ ແລະຢຽບທຳລາຍຫົວມັງກອນ ສັດໃຫຍ່ໃນທະເລ 14 ຄືໄດ້ຢຽບຫົວໂຕມັງກອນຊື່ວ່າ ເລວີອາທານ ແລະເອົາຊາກສົບນັ້ນໃຫ້ເປັນອາຫານຂອງສັດ ທີ່ຖິ່ນແຫ້ງແລ້ງກັນດານພຸ້ນ. 15 ພຣະອົງໄດ້ເຮັດໃຫ້ລຳນໍ້າແລະນໍ້າພຸຫລັ່ງໄຫລ ພຣະອົງເຮັດໃຫ້ແມ່ນໍ້າບົກແຫ້ງລົງໄດ້. 16 ພຣະອົງໄດ້ສ້າງກາງເວັນແລະກາງຄືນ ດວງອາທິດແລະດວງເດືອນກໍໄດ້ຖືກຕັ້ງໄວ້. 17 ພຣະອົງຈັດເຂດຕ່າງໆໄວ້ໃນແຜ່ນດິນໂລກ ຍາມຮ້ອນແລະຍາມໜາວກໍໄດ້ຖືກກຳນົດໄວ້. 18 ຂ້າແດ່ພຣະເຈົ້າຢາເວເອີຍ ແຕ່ໂຜດຈົດຈຳວ່າ ພວກສັດຕູໄດ້ຫົວຂວັນໃສ່ພຣະອົງ ພວກເຂົາດູໝິ່ນຫຍໍ້ຫຍັນພຣະນາມຂອງພຣະອົງ 19 ຂໍຢ່າລືມໄລປະຊາຊົນຂອງພຣະອົງຜູ້ທີ່ທຸກຍາກໄປຕະຫຼອດການ ຂໍຢ່າປະປ່ອຍຊີວິດນົກເຂົາຂອງພຣະອົງໃຫ້ແກ່ສັດຮ້າຍ. 20 ຂໍຊົງໂຜດຈື່ຈຳພັນທະສັນຍາຂອງພຣະອົງ ທີ່ມີໄວ້ກັບພວກຂ້ານ້ອຍແດ່ທ້ອນ ເພາະຕາມດິນແດນທຸກແຫ່ງທີ່ມືດນັ້ນ ກໍເຕັມແຕ່ການຮຸນແຮງ. 21 ຂໍຢ່າໃຫ້ຄົນທີ່ຖືກຂົ່ມເຫັງນັ້ນໄດ້ຮັບຄວາມອັບອາຍ ຂໍໃຫ້ຄົນທຸກແລະຄົນຂັດສົນໄດ້ຍ້ອງຍໍສັນລະເສີນພຣະອົງເຖີດ. 22 ຂ້າແດ່ພຣະເຈົ້າ ຂໍຊົງໂຜດລຸກຂຶ້ນຕໍ່ສູ້ຄະດີຂອງພຣະອົງ ແລະຈື່ວ່າຄົນບໍ່ນັບຖືພຣະອົງ ຫົວຂວັນໃສ່ພຣະອົງທຸກໆວັນ. 23 ຂໍຢ່າຊົງລືມສຽງໂຮຮ້ອງຢ່າງຮ້າຍກາດຂອງພວກສັດຕູຂອງພຣະອົງ ພວກເຂົາຮ້ອງຢ່າງລຽນຕິດຕໍ່ສູ້ພຣະອົງຢູ່. |
@ 2012 United Bible Societies. All Rights Reserved.