ເພງ^ສັນລະເສີນ 71 - ພຣະຄຳພີສັກສິຄຳພາວັນນາອະທິຖານຂອງຜູ້ອາວຸໂສ 1 ຂ້າແດ່ພຣະເຈົ້າຢາເວ ຂ້ານ້ອຍມາຫາ ເພື່ອຂໍໃຫ້ພຣະອົງປົກປ້ອງຄຸ້ມຄອງ ຂໍຢ່າປະປ່ອຍຂ້ານ້ອຍ ໃຫ້ພ່າຍແພ້ເລີຍ 2 ເພາະພຣະອົງຊົງຊອບທຳ ໂຜດມາຊ່ວຍຂ້ານ້ອຍ ແລະກອບກູ້ເອົາຂ້ານ້ອຍດ້ວຍ ໂຜດຫງ່ຽງຫູຟັງແລະຊ່ວຍໃຫ້ຂ້ານ້ອຍພົ້ນແດ່ທ້ອນ 3 ໂຜດເປັນບ່ອນລີ້ອັນປອດໄພສຳລັບຂ້ານ້ອຍ ແລະໂຜດເປັນປ້ອມ ອັນໝັ້ນຄົງ ເພື່ອຄຸ້ມຄອງຂ້ານ້ອຍ ເພາະພຣະອົງເປັນທີ່ເພິ່ງ ແລະທີ່ປ້ອງກັນຂອງຂ້ານ້ອຍ. 4 ຂ້າແດ່ພຣະເຈົ້າຂອງຂ້ານ້ອຍ ຂໍຊົງໂຜດຊ່ວຍກູ້ຈາກຄົນຊົ່ວຮ້າຍ ຈາກອຳນາດຂອງຄົນໂຫດຮ້າຍແລະຊົ່ວຊາມ. 5 ຂ້າແດ່ອົງພຣະຜູ້ເປັນເຈົ້າພຣະເຈົ້າຢາເວເອີຍ ຂ້ານ້ອຍມອບຄວາມຫວັງໄວ້ກັບພຣະອົງ ຂ້ານ້ອຍໄດ້ໄວ້ວາງໃຈໃນພຣະອົງ ຕັ້ງແຕ່ຂ້ານ້ອຍຍັງເປັນຄົນໜຸ່ມ. 6 ຂ້ານ້ອຍເພິ່ງພຣະອົງຊົ່ວຊີວິດສືບມາ ພຣະອົງຈຶ່ງໄດ້ຮັກສາຂ້ານ້ອຍໄວ້ ຕັ້ງແຕ່ມື້ເກີດກໍຄຸ້ມຄອງຕະຫລອດມາ ຈຶ່ງຂໍຍ້ອງຍໍສັນລະເສີນພຣະອົງຕໍ່ໄປເລື້ອຍໆ. 7 ຊີວິດຂ້ານ້ອຍໄດ້ເປັນຕົວຢ່າງໃຫ້ຫລາຍຄົນ ເພາະພຣະອົງເປັນທີ່ປ້ອງກັນອັນເຂັ້ມແຂງໃຫ້ແກ່ຂ້ານ້ອຍ. 8 ຕະຫລອດວັນຂ້ານ້ອຍຍ້ອງຍໍສັນລະເສີນພຣະອົງ ແລະກ່າວເຖິງສະຫງ່າຣາສີຂອງພຣະອົງ. 9 ດຽວນີ້ຂ້ານ້ອຍເຖົ້າແກ່ຊະຣາ ຂໍຢ່າປະປ່ອຍຂ້ານ້ອຍ ດຽວນີ້ກໍອ່ອນແຮງ ຂໍຢ່າປະຖິ້ມຂ້ານ້ອຍເລີຍ. 10 ເຫຼົ່າສັດຕູຢາກເອົາຊີວິດຂ້ານ້ອຍເສຍ ພວກເຂົາເວົ້າກັນແລະວາງອຸບາຍຕໍ່ສູ້ຂ້ານ້ອຍຢູ່. 11 ພວກເຂົາເວົ້າກັນວ່າ, “ພຣະເຈົ້າປະຖິ້ມລາວແລ້ວ ໃຫ້ພວກເຮົາຕາມໄປຈັບເອົາລາວເທາະ ເພາະບໍ່ມີຜູ້ໃດທີ່ຈະມາຊ່ວຍເຫລືອເອົາລາວ ຫລືຊ່ວຍກູ້ເອົາລາວໄວ້ອີກແລ້ວ.” 12 ຂ້າແດ່ພຣະເຈົ້າ ຂໍຢ່າຢູ່ຫ່າງໄກຈາກຂ້ານ້ອຍເລີຍເທາະ ຂ້າແດ່ພຣະເຈົ້າຂອງຂ້ານ້ອຍເອີຍ ຂໍຊົງໂຜດຟ້າວມາຊ່ວຍເຫຼືອຂ້ານ້ອຍດ້ວຍ. 13 ຂໍໃຫ້ຄົນທີ່ໂຈມຕີຂ້ານ້ອຍພ່າຍແພ້ເສຍ ແລະໃຫ້ຖືກທຳລາຍດ້ວຍ ຂໍໃຫ້ຄົນທີ່ຊອກທຳຮ້າຍຂ້ານ້ອຍຖືກອັບອາຍ ແລະໃຫ້ພວກເຂົາເສື່ອມເສຍກຽດຕິຍົດ. 14 ຂ້ານ້ອຍມີຫວັງຢູ່ໃນພຣະອົງເລື້ອຍໄປ ແລະຈະຍ້ອງຍໍສັນລະເສີນພຣະອົງຫລາຍກວ່າເກົ່າ. 15 ຂ້ານ້ອຍຈະກ່າວເຖິງພຣະຄຸນຄວາມດີ ແລະຈະເວົ້າເຖິງຄວາມພົ້ນຢູ່ຕະຫລອດວັນ ຄືຄວາມຊ່ວຍໃຫ້ພົ້ນໄພຂອງພຣະອົງ ເຖິງແມ່ນວ່າຂ້ານ້ອຍບໍ່ສາມາດເຂົ້າໃຈໄດ້ທັງໝົດກໍຕາມ. 16 ຂ້ານ້ອຍຈະເຂົ້າໄປໃນຣິດອຳນາດພຣະອົງ ຄືອົງພຣະຜູ້ເປັນເຈົ້າ ພຣະເຈົ້າ ຂ້ານ້ອຍຈະປະກາດເຖິງພຣະຄຸນຄວາມດີ ຄືຄຸນຄວາມດີຂອງພຣະອົງແຕ່ເທົ່ານັ້ນ. 17 ຂ້າແດ່ພຣະເຈົ້າ ພຣະອົງໄດ້ສັ່ງສອນຂ້ານ້ອຍຕັ້ງແຕ່ຍັງໜຸ່ມມາ ແລະຂ້ານ້ອຍຍັງສືບຕໍ່ກ່າວ ເຖິງກິດຈະການອັນອັດສະຈັນຂອງພຣະອົງຢູ່ສະເໝີ. 18 ຂ້າແດ່ພຣະເຈົ້າເອີຍ ບັດນີ້ຂ້ານ້ອຍເຖົ້າແກ່ ແລະຜົມຫງອກກໍຫລາຍແລ້ວ ຂໍຢ່າປະຖິ້ມຂ້ານ້ອຍໄປເລີຍ ໃນຂະນະທີ່ຂ້ານ້ອຍປະກາດເຖິງຣິດອຳນາດ ແລະຄວາມຍິ່ງໃຫຍ່ຂອງພຣະອົງແກ່ຄົນລຸ້ນຕໍ່ໄປຟັງ ຂໍພຣະອົງຢູ່ນຳຂ້ານ້ອຍດ້ວຍ. 19 ຂ້າແດ່ພຣະເຈົ້າ ຄວາມຊອບທຳຂອງພຣະອົງກໍສູງສົ່ງຫລາຍ ສູງສຸດຈົນຈຸຟ້າສະຫວັນ ພຣະອົງໄດ້ກະທຳສິ່ງທີ່ຍິ່ງໃຫຍ່ຫລາຍປະການ ຊຶ່ງບໍ່ມີຜູ້ໃດເລີຍເປັນເໝືອນພຣະອົງ. 20 ພຣະອົງໄດ້ໃຫ້ຂ້ານ້ອຍລຳບາກແລະທົນທຸກ ແຕ່ພຣະອົງຈະເສີມສ້າງເຫື່ອແຮງຂຶ້ນໃໝ່. ພຣະອົງຈະຮັກສາຂ້ານ້ອຍໄວ້ແລະໃຫ້ພົ້ນໄພ ຈາກບ່ອນເລິກແຫ່ງຂຸມຝັງສົບນັ້ນ. 21 ພຣະອົງຈະເຮັດໃຫ້ຂ້ານ້ອຍມີກຽດຫລາຍ ມີຫລາຍກວ່າທີ່ຂ້ານ້ອຍເຄີຍມີມາກ່ອນ ທັງຈະປະເລົ້າປະໂລມຂ້ານ້ອຍຄືນໃໝ່ອີກ. 22 ແມ່ນແທ້ ຂ້ານ້ອຍຈະດີດກິດຕາຍ້ອງຍໍສັນລະເສີນພຣະອົງ ຂ້າແດ່ພຣະເຈົ້າຂອງຂ້ານ້ອຍ ຂ້ານ້ອຍຈະຍ້ອງຍໍສັນລະເສີນຄວາມສັດຊື່ຂອງພຣະອົງ ດ້ວຍກິດຕາ ຂ້ານ້ອຍຈະຮ້ອງຍ້ອງຍໍພຣະອົງ ຄືອົງບໍຣິສຸດຂອງຊາດອິດສະຣາເອນນັ້ນ. 23 ຂ້ານ້ອຍຈະໂຮຮ້ອງຢ່າງຊົມຊື່ນຍິນດີ ໃນຂະນະທີ່ດີດກິດຕາຖວາຍແດ່ພຣະອົງນັ້ນ ຂ້ານ້ອຍຈະຮ້ອງເພງດ້ວຍສຸດຈິດສຸດໃຈ ເພາະພຣະອົງໄດ້ຊ່ວຍຂ້ານ້ອຍໃຫ້ໄດ້ພົ້ນ. 24 ຂ້ານ້ອຍຈະເວົ້າເຖິງ ຄວາມຊອບທຳຂອງພຣະອົງຕະຫລອດວັນ ເພາະຜູ້ທີ່ພະຍາຍາມທຳຮ້າຍຂ້ານ້ອຍ ໄດ້ພ່າຍແພ້ແລະເສຍກຽດແລ້ວ. |
@ 2012 United Bible Societies. All Rights Reserved.