ເພງ^ສັນລະເສີນ 69 - ພຣະຄຳພີສັກສິຄຳຮ້ອງໄຫ້ຂໍຄວາມຊ່ວຍເຫລືອ 1 ຂ້າແດ່ພຣະເຈົ້າ ຂໍຊົງໂຜດຊ່ວຍຂ້ານ້ອຍດ້ວຍ ເພາະນໍ້າມາກຂຶ້ນຖ້ວມຮອດຄໍແລ້ວ. 2 ຂ້ານ້ອຍກຳລັງຈົມລົງໃນຂີ້ຕົມທີ່ບໍ່ມີພື້ນຢັນ ຂ້ານ້ອຍຈົມຢູ່ໃນນໍ້າເລິກ ແລະຄື້ນກໍກຳລັງດຶງຂ້ານ້ອຍລົງ. 3 ຂ້ານ້ອຍອິດອ່ອນຍ້ອນຮ້ອງຂໍໃຫ້ຊ່ວຍເຫລືອ ຈົນລຳຄໍຂ້ານ້ອຍເຈັບປວດຍ້ອນ. ສ່ວນສາຍຕາຂ້ານ້ອຍນັ້ນກໍອ່ອນແຮງລົງ ເພາະມົວແຕ່ແນມຫາພຣະອົງມາຊ່ວຍ. 4 ພວກທີ່ກຽດຊັງຂ້ານ້ອຍໂດຍບໍ່ມີເຫດຜົນຫຍັງ ກໍມີຫລາຍກວ່າເສັ້ນຜົມທີ່ຫົວຂອງຂ້ານ້ອຍ. ສັດຕູຂອງຂ້ານ້ອຍຫາເລື່ອງໃສ່ໂດຍເວົ້າຕົວະ ພວກເຂົາແຂງແຮງຫລາຍໝາຍທີ່ຈະທຳລາຍ. ສິ່ງທີ່ຂ້ານ້ອຍບໍ່ໄດ້ລັກຫລືໂລບເອົາໄປ ຊໍ້າຖືກບັງຄັບໃຫ້ສົ່ງຄືນສິ່ງນັ້ນ. 5 ຂ້າແດ່ພຣະເຈົ້າ ຂ້ານ້ອຍເຊື່ອງຄວາມຜິດບາບຈາກພຣະອົງບໍ່ໄດ້ດອກ ຂ້ານ້ອຍໂງ່ຈ້າສໍ່າໃດ ພຣະອົງກໍຮູ້ແລ້ວ. 6 ໂອ ຂ້າແດ່ອົງພຣະຜູ້ເປັນເຈົ້າ ພຣະເຈົ້າອົງຊົງຣິດອຳນາດຍິ່ງໃຫຍ່ເອີຍ ຂໍຢ່າໃຫ້ຜູ້ໄວ້ວາງໃຈໃນພຣະອົງຖືກອັບອາຍຍ້ອນຂ້ານ້ອຍ ໂອ ຂ້າແດ່ພຣະເຈົ້າແຫ່ງຊາດອິດສະຣາເອນເອີຍ ຂໍຢ່າໃຫ້ຜູ້ນະມັດສະການພຣະອົງເສຍຍ້ອນຂ້ານ້ອຍດ້ວຍ. 7 ແມ່ນເຫັນແກ່ພຣະອົງ ຂ້ານ້ອຍຈຶ່ງຖືກໝິ່ນປະໝາດ ແລະຖືກອັບອາຍຂາຍໜ້າດ້ວຍ. 8 ຂ້ານ້ອຍເປັນດັ່ງຄົນແປກໜ້າຕໍ່ພີ່ນ້ອງຂອງຕົນ ເປັນດັ່ງຄົນຕ່າງດ້າວຕໍ່ຄອບຄົວຂອງຕົນເອງດ້ວຍ. 9 ການອຸທິດຕົວຕໍ່ພຣະວິຫານລຸກໄໝ້ຄືໄຟຢູ່ພາຍໃນ ຄຳໝິ່ນປະໝາດຂອງຜູ້ທີ່ເຍາະເຍີ້ຍພຣະອົງກໍຖືກຂ້ານ້ອຍແລ້ວ. 10 ເມື່ອຂ້ານ້ອຍອົດອາຫານແລະຖ່ອມຕົວລົງ ຄົນກໍໝິ່ນປະໝາດຂ້ານ້ອຍຫຼາຍຂຶ້ນ; 11 ເມື່ອຂ້ານ້ອຍນຸ່ງຜ້າກະສອບເຂົ້າໄວ້ທຸກ ຄົນກໍຫົວຂວັນເຍາະເຍີ້ຍຂ້ານ້ອຍຊໍ້າ. 12 ຄົນເວົ້າເລື່ອງຂ້ານ້ອຍນັ້ນຕາມຫົນທາງ ແລະຄົນຂີ້ເຫລົ້າກໍແຕ່ງເພງຮ້ອງສຽດສີໃສ່ຂ້ານ້ອຍ. 13 ຂ້າແດ່ພຣະເຈົ້າຢາເວ ຂ້ານ້ອຍຈະພາວັນນາອະທິຖານຫາພຣະອົງ ຂ້າແດ່ພຣະເຈົ້າ ໂຜດຕອບຕາມເວລາທີ່ພຣະອົງໄດ້ຊົງເລືອກໄວ້ ດ້ວຍຄວາມຮັກອັນຍິ່ງໃຫຍ່ໂຜດຕອບຂ້ານ້ອຍ ໂຜດຮັກສາຄຳສັນຍາທີ່ວ່າຈະຊ່ວຍໃຫ້ພົ້ນ. 14 ໂຜດຊ່ວຍກູ້ຂ້ານ້ອຍຈາກການຈົມລົງໃນບຶງຂີ້ຕົມ ໃຫ້ປອດໄພຈາກນໍ້າເລິກແລະສັດຕູແດ່ທ້ອນ. 15 ຂໍຢ່າໃຫ້ນໍ້ານອງໄຫລຖ້ວມຂ້ານ້ອຍ ຂໍຢ່າໃຫ້ລົ້ມລົງໃນຂຸມຝັງສົບເລີຍ. 16 ຂ້າແດ່ພຣະເຈົ້າຢາເວ ໃນພຣະຄຸນຄວາມດີ ແຫ່ງຄວາມຮັກອັນໝັ້ນຄົງຂອງພຣະອົງນັ້ນ ຂໍຊົງຕອບຂ້ານ້ອຍດ້ວຍ ແລະໃນຄວາມເມດຕາອັນຍິ່ງໃຫຍ່ຂອງພຣະອົງ ໂຜດຕອບແລະຫັນມາຫາຂ້ານ້ອຍດ້ວຍ 17 ຂໍຢ່າຫັນໜີຈາກຜູ້ຮັບໃຊ້ຂອງພຣະອົງເລີຍ ບັດນີ້ ຂໍຊົງໂຜດຕອບດ້ວຍ ເພາະເດືອດຮ້ອນທີ່ສຸດແລ້ວ 18 ຂໍຊົງໂຜດມາຫາດ້ວຍແລະຊ່ວຍໃຫ້ພົ້ນໄພແດ່ ໂຜດຊ່ວຍກູ້ເອົາຂ້ານ້ອຍໃຫ້ພົ້ນຈາກພວກສັດຕູຂອງຂ້ານ້ອຍດ້ວຍ. 19 ພຣະອົງຮູ້ວ່າຂ້ານ້ອຍຖືກໝິ່ນປະໝາດສໍ່າໃດ ແລະທັງຖືກອັບອາຍຂາຍໜ້າສໍ່າໃດດ້ວຍ. ນອກນີ້ຂ້ານ້ອຍກໍຍັງຖືກເສຍກຽດຫລາຍ ພຣະອົງເຫັນສັດຕູທັງໝົດຂອງຂ້ານ້ອຍໄດ້. 20 ຄຳໝິ່ນປະໝາດເຮັດໃຫ້ຈິດໃຈຂອງຂ້ານ້ອຍເມື່ອຍອິດອ່ອນຫລາຍ ແລະເຮັດໃຫ້ຂ້ານ້ອຍໝົດຫວັງດ້ວຍ. ຂ້ານ້ອຍຫວັງວ່າຈະມີຜູ້ເຫັນອົກເຫັນໃຈ ຫວັງຕໍ່ຜູ້ເລົ້າໂລມໃຈແຕ່ກໍບໍ່ເຫັນປານນີ້. 21 ເມື່ອຂ້ານ້ອຍຫິວເຂົ້າ ພວກເຂົາພັດຍື່ນຢາພິດໃຫ້ກິນ ເມື່ອຫິວນໍ້າ ພວກເຂົາພັດເອົານໍ້າສົ້ມໃຫ້ດື່ມ. 22 ຂໍໃຫ້ງານລ້ຽງອັນໃຫຍ່ໂຕນັ້ນທຳລາຍພວກເຂົາລົງ ຂໍໃຫ້ການລ້ຽງອັນສັກສິດເຮັດໃຫ້ພວກເຂົາຫຼົ້ມຈົມເຖີດ. 23 ຂໍພຣະອົງເຮັດໃຫ້ພວກເຂົາຕາບອດໄປ ຂໍໃຫ້ຫລັງຂອງພວກເຂົາກົ່ງຢູ່ເລື້ອຍໆໄປ. 24 ຈົ່ງຖອກເທຄວາມໂກດຮ້າຍຂອງພຣະອົງໃສ່ພວກເຂົາ ຈົ່ງປ່ອຍຄວາມໂກດແຄ້ນໄລ່ຄຸບພວກເຂົາເຖີດ. 25 ຂໍໃຫ້ຄ້າຍພັກຂອງພວກເຂົາເປັນຖິ່ນແຫ້ງແລ້ງກັນດານ ຂໍຢ່າໃຫ້ມີຜູ້ໃດລອດຕາຍໃນຜ້າເຕັນຂອງເຂົາເຈົ້າ. 26 ເພາະພວກເຂົາຂົ່ມເຫັງພວກທີ່ພຣະອົງໄດ້ລົງໂທດທັນ ພວກເຂົາເວົ້າເລື່ອງທົນທຸກຂອງຜູ້ທີ່ຊົງໃຫ້ເຈັບປວດ. 27 ຂໍຊົງໂຜດບັນທຶກບາບທັງໝົດຂອງພວກເຂົາໄວ້ດ້ວຍ ຂໍຢ່າໃຫ້ພວກເຂົາມີສ່ວນໃນຄວາມພົ້ນ. 28 ໃນທະບຽນແຫ່ງຊີວິດຂໍໃຫ້ຊື່ຂອງພວກເຂົາຖືກລຶບ ຂໍຢ່າຈົດຊື່ຂອງພວກເຂົາເຂົ້າໃນທະບຽນແຫ່ງບັນດາຄົນຊອບທຳ. 29 ຂ້າແດ່ພຣະເຈົ້າ ແຕ່ຂ້ານ້ອຍຍັງເຈັບປວດສິ້ນຫວັງ ໂຜດຍົກຂ້ານ້ອຍຂຶ້ນແລະຊ່ວຍໃຫ້ພົ້ນໄພດ້ວຍ. 30 ຂ້ານ້ອຍຈະຍ້ອງຍໍສັນລະເສີນພຣະນາມຂອງພຣະເຈົ້າດ້ວຍບົດເພງ ຂ້ານ້ອຍຈະປະກາດໂດຍການໂມທະນາຂອບພຣະຄຸນ ຣິດທານຸພາບຂອງພຣະອົງ. 31 ການນີ້ຈະເຮັດໃຫ້ພຣະເຈົ້າຢາເວພໍໃຈກວ່າການຖວາຍບູຊາງົວ ຫລືຖວາຍບູຊາງົວເຖິກເປັນໂຕແກ່ພຣະອົງນັ້ນ. 32 ເມື່ອພວກທີ່ຖືກກົດຂີ່ໄດ້ເຫັນການນີ້ກໍຈະດີໃຈ ຜູ້ທີ່ສະແຫວງຫາພຣະເຈົ້າກໍໄດ້ຄຳເລົ້າໂລມໃຈດ້ວຍ. 33 ພຣະເຈົ້າຢາເວຮັບຟັງຜູ້ຂັດສົນພາວັນນາອະທິຖານຫາພຣະອົງ ແລະບໍ່ລືມໄລປະຊາຊົນຂອງພຣະອົງຢູ່ໃນຄຸກ. 34 ໂອ ຟ້າສະຫວັນກັບແຜ່ນດິນໂລກເອີຍ ທະເລກັບທຸກສິ່ງໃນນັ້ນເອີຍ ຈົ່ງຍ້ອງຍໍສັນລະເສີນພຣະອົງ 35 ພຣະອົງຈະຊ່ວຍນະຄອນເຢຣູຊາເລັມໃຫ້ພົ້ນໄພ ແລະສ້າງເມືອງຂອງຢູດາຂຶ້ນໃໝ່. ທີ່ນັ້ນປະຊາຊົນຕ່າງກໍຈະໄດ້ຢູ່ອາໄສ ເປັນກຳມະສິດດິນແດນສຳລັບເຂົາເຈົ້າ. 36 ພວກລູກຫລານຂອງຜູ້ຮັບໃຊ້ພຣະອົງຈະໄດ້ຮັບມູນມໍຣະດົກ ແລະພວກທີ່ຮັກພຣະອົງກໍຈະໄດ້ຢູ່ໃນທີ່ນັ້ນ. |
@ 2012 United Bible Societies. All Rights Reserved.