ເພງ^ສັນລະເສີນ 66 - ພຣະຄຳພີສັກສິບົດເພງຍ້ອງຍໍສັນລະເສີນແລະການໂມທະນາຂອບພຣະຄຸນ 1 ປະຊາຊົນທົ່ວໂລກເອີຍ ຈົ່ງຍ້ອງຍໍສັນລະເສີນພຣະເຈົ້າ ຈົ່ງໂຮຮ້ອງຍິນດີສັນລະເສີນເຖີດ 2 ຈົ່ງຮ້ອງເພງຖວາຍແກ່ພຣະນາມ ອັນຊົງສະຫງ່າຣາສີຂອງພຣະອົງ ຈົ່ງຖວາຍຄຳຍ້ອງຍໍສັນລະເສີນພຣະອົງ ຢ່າງຊົມຊື່ນຍິນດີເຖີດ 3 ຈົ່ງເວົ້າຕໍ່ພຣະເຈົ້າວ່າ, “ສິ່ງທີ່ພຣະອົງກະທຳນັ້ນກໍອັດສະຈັນທີ່ສຸດ ຄືຣິດທານຸພາບຍິ່ງໃຫຍ່ ຈົນສັດຕູກົ້ມຂາບຕໍ່ໜ້າພຣະອົງດ້ວຍຄວາມຢ້ານ. 4 ທຸກຄົນທີ່ແຜ່ນດິນໂລກນະມັດສະການພຣະອົງ ພວກເຂົາຮ້ອງເພງຍ້ອງຍໍສັນລະເສີນພຣະອົງ. ພວກເຂົາຮ້ອງເພງຍ້ອງຍໍສັນລະເສີນພຣະນາມຂອງພຣະອົງ.” 5 ຈົ່ງມາເບິ່ງສິ່ງທີ່ພຣະເຈົ້າໄດ້ຊົງກະທຳ ການອັດສະຈັນທີ່ຊົງກະທຳທ່າມກາງມະນຸດ. 6 ພຣະອົງໄດ້ປ່ຽນທະເລເລິກໃຫ້ເປັນດິນແຫ້ງໄປ ປູ່ຍ່າຕາຍາຍຂອງພວກເຮົາໄດ້ຍ່າງຂ້າມນໍ້ານັ້ນ ຢູ່ທີ່ນັ້ນພວກເພິ່ນຕ່າງກໍຊົມຊື່ນຍິນດີ ເພາະສິ່ງທີ່ພຣະອົງໄດ້ກະທຳນັ້ນ. 7 ພຣະອົງປົກຄອງດ້ວຍຣິດທານຸພາບຂອງພຣະອົງສືບໆໄປ ແລະພຣະເນດຂອງພຣະອົງເຝົ້າເບິ່ງຊົນຊາດທັງຫຼາຍ ບໍ່ໃຫ້ລຸກຂຶ້ນຕໍ່ສູ້ພຣະອົງ. 8 ຈົ່ງຍ້ອງຍໍສັນລະເສີນພຣະເຈົ້າຂອງພວກເຮົາເຖີດ ບັນດາຊົນຊາດເອີຍ ຈົ່ງໃຫ້ທຸກຄົນໄດ້ຍິນສຽງຍ້ອງຍໍສັນລະເສີນນັ້ນ. 9 ພຣະອົງໄດ້ໃຫ້ພວກເຮົາມີຊີວິດຢູ່ ແລະບໍ່ໄດ້ປ່ອຍໃຫ້ພວກເຮົາລົ້ມລົງ. 10 ຂ້າແດ່ພຣະເຈົ້າ ພຣະອົງທົດລອງເບິ່ງພວກຂ້ານ້ອຍ ເໝືອນດັ່ງເງິນຖືກຊຳລະດ້ວຍໄຟສັນໃດ ພຣະອົງກໍຊົງຊຳລະພວກຂ້ານ້ອຍສັນນັ້ນ. 11 ພຣະອົງປະໃຫ້ພວກຂ້ານ້ອຍຖືກແຮ້ວທີ່ພວກເຂົາດັກ ແລະວາງພາລະໜັກໃສ່ຫລັງດ້ວຍ. 12 ພຣະອົງປະໃຫ້ສັດຕູຢຽບຢໍ່າພວກຂ້ານ້ອຍ ລົງຢູ່ໃຕ້ພື້ນຕີນເຂົາເຈົ້າ ພວກຂ້ານ້ອຍໄດ້ຜ່ານນໍ້າຖ້ວມແລະໄຟ ແຕ່ບັດນີ້ພຣະອົງນຳມາເຖິງທີ່ປອດໄພແລ້ວ. 13 ຂ້ານ້ອຍຈະນຳເຄື່ອງເຜົາບູຊາມາສູ່ເຮືອນ ທີ່ພຣະອົງສະຖິດແລະຖວາຍຕາມທີ່ໄດ້ສັນຍາໄວ້. 14 ຂ້ານ້ອຍຈະຖວາຍແກ່ພຣະອົງຕາມທີ່ຂ້ານ້ອຍໄດ້ເວົ້າໄວ້ ເມື່ອຂ້ານ້ອຍຕົກຢູ່ໃນຄວາມເດືອດຮ້ອນ. 15 ຂ້ານ້ອຍຈະເຜົາແກະຖວາຍທີ່ແທ່ນບູຊາ ຂ້ານ້ອຍຈະຖວາຍແບ້ກັບງົວເຖິກ ແລະຄວັນໄຟກໍຈະຂຶ້ນສູ່ທ້ອງຟ້າ. 16 ທຸກຄົນທີ່ຢຳເກງພຣະເຈົ້າ ຈົ່ງມາຟັງເອົາສາ ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ. 17 ຂ້ອຍໄດ້ຂໍຮ້ອງພຣະອົງໃຫ້ຊ່ວຍເຫລືອ ຂ້ອຍຍ້ອງຍໍສັນລະເສີນພຣະອົງດ້ວຍບົດເພງຕ່າງໆ. 18 ຖ້າຂ້ອຍເມີນເສີຍຕໍ່ບາບທີ່ຂ້ອຍໄດ້ເຮັດເອງ ພຣະເຈົ້າຢາເວກໍຄົງບໍ່ຟັງສຽງຂ້ອຍດອກ. 19 ແຕ່ພຣະເຈົ້າໄດ້ຍິນສຽງຂ້ອຍຢ່າງແທ້ຈິງ ພຣະອົງໄດ້ຍິນຄຳພາວັນນາອະທິຖານຂອງຂ້ອຍ. 20 ຂໍໃຫ້ພຣະເຈົ້າເປັນທີ່ຍ້ອງຍໍສັນລະເສີນ ເພາະພຣະອົງຊົງຟັງຄຳພາວັນນາອະທິຖານຂອງຂ້ອຍ ຫລືບໍ່ໄດ້ຖອນຄວາມຮັກອັນໝັ້ນຄົງໜີໄປຈາກຂ້ອຍ. |
@ 2012 United Bible Societies. All Rights Reserved.