ເພງ^ສັນລະເສີນ 64 - ພຣະຄຳພີສັກສິຄຳພາວັນນາອະທິຖານຂໍການຄຸ້ມຄອງ 1 ຂ້າແດ່ພຣະເຈົ້າ ຂ້ານ້ອຍເດືອດຮ້ອນແລ້ວ ໂຜດຟັງຄຳພາວັນນາອະທິຖານຂອງຂ້ານ້ອຍດ້ວຍ ເພາະຂ້ານ້ອຍຢ້ານກົວເຫຼົ່າສັດຕູ ໂຜດຊ່ວຍກູ້ເອົາຊີວິດຂອງຂ້ານ້ອຍດ້ວຍ. 2 ຂໍຊົງໂຜດຄຸ້ມຄອງຂ້ານ້ອຍຈາກແຜນອຸບາຍຂອງຄົນຊົ່ວຮ້າຍ ຈາກຝຸງຄົນທີ່ຊົ່ວຮ້າຍທັງຫລາຍນັ້ນ. 3 ພວກເຂົາຝຶກຝົນລີ້ນໃຫ້ແຫຼມຄົມດັ່ງດາບ ທັ່ງຄຳເວົ້າອອກມາດັ່ງຍິງໜ້າລູກທະນູ. 4 ພວກເຂົາວ່ອງໄວໃນການແຜ່ຄວາມຕົວະຍົວະຢ່າງຂາດຄວາມອາຍ ແລະພວກເຂົາທຳລາຍຄົນດີດ້ວຍຄຳເວົ້າອັນໂຫດຮ້າຍຢ່າງບໍ່ຢ້ານກົວ. 5 ພວກເຂົາໜູນໃຈກັນແລະກັນເຖິງແຜນການຊົ່ວຂອງພວກເຂົາ ພວກເຂົາປຶກສາກັນເຖິງບ່ອນທີ່ພວກເຂົາຈະຫ້າງແຮ້ວໃສ່. ແລ້ວພວກເຂົາກໍເວົ້າຕໍ່ກັນແລະກັນ ເຖິງແຜນການອັນຊົ່ວຊ້າຂອງພວກເຂົາວ່າ, “ບໍ່ມີຜູ້ໃດດອກ ທີ່ເຫັນພວກເຮົາໄດ້.” 6 ພວກເຂົາວາງແຜນຊົ່ວແລະເວົ້າວ່າ, “ເປັນແຜນການທີ່ດີເລີດ.” ຈິດໃຈແລະຄວາມນຶກຄິດຂອງມະນຸດ ກໍເລິກລັບບໍ່ມີຜູ້ໃດຢັ່ງຮູ້ໄດ້ເລີຍ. 7 ແຕ່ພຣະເຈົ້າຍິງລູກໜ້າຂອງພຣະອົງໃສ່ພວກເຂົາ ແລະໃນທັນໃດພວກເຂົາກໍບາດເຈັບ. 8 ພຣະອົງຈະທຳລາຍພວກເຂົາຍ້ອນຄຳເວົ້າຂອງພວກເຂົາເອງ ທຸກຄົນທີ່ເຫັນພວກເຂົາຕ່າງກໍແກວ່ງຫົວ. 9 ພວກເຂົາຈະຢ້ານເມື່ອຄິດເຖິງສິ່ງທີ່ພຣະເຈົ້າໄດ້ກະທຳ ແລະຈະບອກເຖິງກິດຈະການຂອງພຣະອົງ. 10 ສ່ວນຄົນຊອບທຳນັ້ນຈະຊົມຊື່ນຍິນດີ ຍ້ອນສິ່ງທີ່ພຣະເຈົ້າຢາເວໄດ້ກະທຳນັ້ນ. ພວກເຂົາຈະພົບຄວາມປອດໄພໃນພຣະອົງ ຄົນຊອບທຳທຸກຄົນຈະຍ້ອງຍໍສັນລະເສີນພຣະອົງ. |
@ 2012 United Bible Societies. All Rights Reserved.