ເພງ^ສັນລະເສີນ 61 - ພຣະຄຳພີສັກສິຄຳພາວັນນາອະທິຖານຂໍການປົກປ້ອງຄຸ້ມຄອງ 1 ຂ້າແດ່ພຣະເຈົ້າ ຂໍຊົງໂຜດຟັງສຽງຮ້ອງຫາດ້ວຍ ຂໍຊົງໂຜດຟັງຄຳພາວັນນາອະທິຖານຂອງຂ້ານ້ອຍດ້ວຍ 2 ຂ້ານ້ອຍຮ້ອງຫາພຣະອົງເພາະຄວາມໝົດຫວັງ ແລະຂ້ານ້ອຍກໍກຳລັງຢູ່ຫ່າງໄກຈາກບ້ານ. 3 ໂຜດນຳຂ້ານ້ອຍໄປສູ່ບ່ອນທີ່ປອດໄພ ເປັນບ່ອນທີ່ຂ້ານ້ອຍລີ້ໄພຢູ່ໄດ້ ເພາະພຣະອົງຄືປ້ອມປ້ອງກັນຂອງຂ້ານ້ອຍ ເປັນບ່ອນທີ່ແໜ້ນໜາຕໍ່ສູ້ສັດຕູຂອງຂ້ານ້ອຍໄດ້. 4 ຊົ່ວຊີວິດຂອງຂ້ານ້ອຍນີ້ ຂໍຊົງໂຜດໃຫ້ໄດ້ຢູ່ໃນພຣະວິຫານຂອງພຣະອົງ ຂໍໃຫ້ຂ້ານ້ອຍໄດ້ພົບທີ່ປອດໄພໃຕ້ຮົ່ມປີກຂອງພຣະອົງດ້ວຍ. 5 ຂ້າແດ່ພຣະເຈົ້າ ພຣະອົງໄດ້ຍິນຄຳທີ່ຂ້ານ້ອຍສັນຍາ ແລະມອບສິ່ງທີ່ເປັນຂອງຜູ້ຢຳເກງພຣະນາມຂອງພຣະອົງໃຫ້ແກ່ຂ້ານ້ອຍ. 6 ຂໍຊົງໂຜດຕື່ມອາຍຸຍືນຍາວໃຫ້ກະສັດແດ່ ແລະໃຫ້ເພິ່ນມີຊີວິດຢູ່ໄດ້ນານແສນນານ 7 ຂ້າແດ່ພຣະເຈົ້າ ຂໍຊົງໂຜດໃຫ້ເພິ່ນໄດ້ປົກຄອງສືບໄປ ຢູ່ຊ້ອງໜ້າພຣະອົງ ໂຜດຄຸ້ມຄອງເພິ່ນ ດ້ວຍຄວາມຮັກອັນໝັ້ນຄົງຂອງພຣະອົງ ແລະໃນຄວາມສັດຊື່ຂອງພຣະອົງດ້ວຍ. 8 ສະນັ້ນ ຂ້ານ້ອຍຈຶ່ງຖວາຍບົດເພງຍ້ອງຍໍສັນລະເສີນສະເໝີໄປ ແລະນຳເຄື່ອງຖວາຍປະຈຳວັນມາໃຫ້ພຣະອົງຕາມທີ່ຂ້ານ້ອຍໄດ້ສັນຍາໄວ້. |
@ 2012 United Bible Societies. All Rights Reserved.