ເພງ^ສັນລະເສີນ 60 - ພຣະຄຳພີສັກສິຄຳພາວັນນາອະທິຖານຂໍຊ່ວຍໃຫ້ພົ້ນໄພ 1 ຂ້າແດ່ພຣະເຈົ້າ ພຣະອົງປະຕິເສດພວກຂ້ານ້ອຍ ພຣະອົງໃຫ້ພວກຂ້ານ້ອຍພ່າຍແພ້ ພຣະອົງໄດ້ໂກດຮ້າຍພວກຂ້ານ້ອຍ ບັດນີ້ໂຜດເຊົາແລະຄືນມາຫາພວກຂ້ານ້ອຍເຖີດ. 2 ພຣະອົງໄດ້ເຮັດໃຫ້ດິນແດນສັ່ນສະເທືອນ ແລະໄດ້ເຮັດໃຫ້ພື້ນດິນແຕກຍະອອກ ບັດນີ້ ໂຜດປິ່ນປົວບາດແຜຂອງດິນແດນນີ້ ເພາະມັນກຳລັງແຕກແຍກອອກຈາກກັນ. 3 ພຣະອົງໄດ້ໃຫ້ປະຊາຊົນນັ້ນທົນທຸກໜັກ ຍ່າງໂຊເຊເໝືອນກັບຄົນເມົາເຫຼົ້າ. 4 ພຣະອົງຕັກເຕືອນພວກທີ່ຢຳເກງພຣະອົງ ເພື່ອວ່າພວກເຂົາຈະໄດ້ຫລົບໜີຈາກການທຳລາຍ. 5 ດ້ວຍຣິດທານຸພາບຂອງພຣະອົງ ຂໍຊົງໂຜດຊ່ວຍໃຫ້ພວກຂ້ານ້ອຍພົ້ນໄພ ເພື່ອວ່າພຣະອົງຈະໄດ້ຊ່ວຍກູ້ເອົາປະຊາຊົນທີ່ພຣະອົງຊົງຮັກ. 6-7 ຈາກພຣະວິຫານນັ້ນ ພຣະເຈົ້າ ໄດ້ກ່າວວ່າ, “ໃນຄວາມມີໄຊ ເຮົາຈະແຍກເອົາຊີເຄມໄວ້ ແບ່ງຮ່ອມພູຊຸກໂກດໃຫ້ປະຊາຊົນຂອງເຮົາ ກີເລອາດເປັນຂອງເຮົາທັງເຜົ່າມານາເຊດ້ວຍ ເຜົ່າເອຟຣາອິມຄືໝວກປ້ອງກັນຫົວເຮົາ ແລະເຜົ່າຢູດາຄືຕະບອງແຫ່ງຣາຊອຳນາດ. 8 ແຕ່ເຮົາຈະໃຊ້ໂມອາບຄືຊາມລ້າງສ່ວຍ ແລະໂຍນເກີບຂອງເຮົາໃສ່ເອໂດມ ໝາຍເຖິງວ່າເຮົາເປັນພຣະເຈົ້າຂອງດິນແດນ. ຊາວຟີລິດສະຕິນຄິດວ່າຈະໂຮຮ້ອງມີໄຊຫລືນີ້?” 9 ຜູ້ໃດຈະນຳພາໄປສູ່ເມືອງທີ່ມີປ້ອມປ້ອງກັນ? ຜູ້ໃດຈະພາໄປທີ່ເອໂດມພຸ້ນ? 10 ຂ້າແດ່ພຣະເຈົ້າ ພຣະອົງໄດ້ປະຖິ້ມພວກຂ້ານ້ອຍໄປແທ້ບໍ? ຂ້າແດ່ພຣະເຈົ້າ ພຣະອົງຈະບໍ່ໄປກັບກອງທັບຂອງພວກຂ້ານ້ອຍອີກຫລືນີ້? 11 ຂໍຊົງໂຜດຊ່ວຍເຫຼືອພວກຂ້ານ້ອຍໃນການຕໍ່ສູ້ສັດຕູແດ່ທ້ອນ ເພາະການຊ່ວຍເຫຼືອຂອງມະນຸດນັ້ນໃຊ້ການຫຍັງບໍ່ໄດ້ເລີຍ. 12 ເມື່ອພຣະເຈົ້າສະຖິດຢູ່ນຳ ພວກຂ້ານ້ອຍຈະມີໄຊຊະນະ ແລະຈະຜາບແພ້ສັດຕູທັງຫລາຍຂອງພວກຂ້ານ້ອຍ. |
@ 2012 United Bible Societies. All Rights Reserved.