ເພງ^ສັນລະເສີນ 59 - ພຣະຄຳພີສັກສິຄຳພາວັນນາອະທິຖານຂໍຄວາມປອດໄພ 1 ຂ້າແດ່ພຣະເຈົ້າ ຂໍຊົງໂຜດຊ່ວຍໃຫ້ຂ້ານ້ອຍພົ້ນຈາກສັດຕູແດ່ ໂຜດຄຸ້ມຄອງຂ້ານ້ອຍໃຫ້ພົ້ນຈາກຄົນໂຈມຕີດ້ວຍ 2 ໂຜດຊ່ວຍໃຫ້ຂ້ານ້ອຍພົ້ນຈາກຄົນຊົ່ວເຫຼົ່ານັ້ນສາ ຊ່ວຍໃຫ້ພົ້ນຈາກພວກຄົນຄາດຕະກອນເຫຼົ່ານັ້ນດ້ວຍ. 3 ຂ້າແດ່ພຣະເຈົ້າຢາເວ ເບິ່ງດູ! ພວກເຂົາລໍຖ້າທີ່ຈະສັງຫານຂ້ານ້ອຍ ຄົນໂຫດຮ້າຍໂຮມກັນຕໍ່ສູ້ຂ້ານ້ອຍຢູ່. ແຕ່ບໍ່ແມ່ນຍ້ອນການບາບຂອງຂ້ານ້ອຍ ຫລືຍ້ອນຄວາມຜິດທີ່ຂ້ານ້ອຍໄດ້ເຮັດ 4 ທັງບໍ່ແມ່ນເພາະຄວາມຜິດພາດຂອງຂ້ານ້ອຍ ທີ່ພວກເຂົາຟ້າວໄປສູ່ບ່ອນຂອງພວກເຂົານັ້ນ. 5 ຂ້າແດ່ພຣະເຈົ້າຢາເວ ພຣະເຈົ້າອົງຊົງຣິດອຳນາດຍິ່ງໃຫຍ່ ພຣະເຈົ້າແຫ່ງຊາດອິດສະຣາເອນເອີຍ ຂໍຊົງໂຜດມາຊ່ວຍຂ້ານ້ອຍດ້ວຍ ຈົ່ງລຸກຂຶ້ນເພື່ອລົງໂທດຄົນອະທຳ ຢ່າສຳແດງຄວາມເມດຕາຕໍ່ຄົນທໍລະຍົດທີ່ຊົ່ວຊ້າເຫຼົ່ານັ້ນ. 6 ພວກເຂົາກັບມາຕອນແລງຕ່າງກໍເຫົ່າຫອນຄືໝາ ໃນຂະນະທີ່ເຂົ້າໄປໃນເມືອງນັ້ນ. 7 ໂຜດຟັງຄຳດູຖູກແລະນາບຂູ່ຂອງພວກເຂົາ ລີ້ນກໍເປັນດັ່ງດາບໃນປາກຂອງເຂົາເຈົ້າ, ແຕ່ພວກເຂົາຄິດວ່າບໍ່ມີໃຜຈັກຄົນເລີຍ ທີ່ສາມາດໄດ້ຍິນພວກເຂົາ. 8 ຂ້າແດ່ພຣະເຈົ້າຢາເວ ແຕ່ພຣະອົງຫົວຂວັນໃສ່ພວກເຂົາ ເຍາະເຍີ້ຍໃສ່ທຸກຄົນທີ່ບໍ່ນັບຖືພຣະອົງ. 9 ຂ້ານ້ອຍເຊື່ອໝັ້ນໃນຣິດອຳນາດຂອງພຣະອົງ ໂອ ຂ້າແດ່ພຣະເຈົ້າເອີຍ ພຣະອົງຊົງເປັນປ້ອມປ້ອງກັນ. 10 ພຣະເຈົ້າຮັກຂ້ານ້ອຍ ຈຶ່ງຈະສະເດັດມາຫາໂດຍໄວ ພຣະອົງຈະໃຫ້ຂ້ານ້ອຍເຫັນສັດຕູພ່າຍແພ້. 11 ຂໍຢ່າສັງຫານພວກເຂົາເລີຍເທາະ ເພາະຢ້ານປະຊາຊົນຂອງຂ້ານ້ອຍລືມໄລ. ໂຜດເຮັດໃຫ້ພວກເຂົາແຕກກະຈັກກະຈາຍ ໂດຍພະລັງອຳນາດຂອງພຣະອົງ ແລະເຮັດໃຫ້ພວກເຂົາພ່າຍແພ້ ຂ້າແດ່ອົງພຣະຜູ້ເປັນເຈົ້າ ພຣະຜູ້ຄຸ້ມຄອງຂອງພວກຂ້ານ້ອຍ. 12 ຄຳເວົ້າທຸກຄຳຂອງພວກເຂົາລ້ວນແຕ່ເປັນບາບໝົດ ເພາະບາບອາໄສຢູ່ໃນສົບປາກຂອງເຂົາເຈົ້າ; ໃນຄວາມຈອງຫອງນັ້ນ ຂໍໃຫ້ພວກເຂົາຖືກຈັບໄປ ເພາະວ່າພວກເຂົາມັກສາບແຊ່ງແລະຂີ້ຕົວະ 13 ໃນຄວາມໂກດຮ້າຍນັ້ນ ຈົ່ງທຳລາຍພວກເຂົາເສຍ ຈົ່ງທຳລາຍພວກເຂົາທຸກຄົນໃຫ້ໝົດສິ້ນເສຍເຖີດ. ແລ້ວທຸກຄົນກໍຈະຮູ້ວ່າພຣະເຈົ້າປົກຄອງອິດສະຣາເອນ ແລະການປົກຄອງຂອງພຣະອົງກໍແຜ່ໄປສຸດປາຍແຜ່ນດິນໂລກ. 14 ສັດຕູກັບມາຕອນແລງຕ່າງກໍເຫົ່າຫອນຄືໝາ ໃນຂະນະທີ່ເຂົ້າໄປໃນເມືອງນັ້ນ. 15 ດັ່ງຝູງໝາທີ່ທ່ອງທ່ຽວຊອກຢູ່ຫາກິນ ເມື່ອບໍ່ມີອາຫານພໍກໍເຫົ່າຫອນຢູ່ຢ່າງນັ້ນ. 16 ຂ້ານ້ອຍຈະຂັບຮ້ອງເຖິງຣິດທານຸພາບ ແຕ່ວ່າທຸກໆເຊົ້າຂ້ານ້ອຍຈະຮ້ອງເພງຖວາຍແດ່ພຣະອົງ ທີ່ກ່າວເຖິງຄວາມຮັກອັນໝັ້ນຄົງຂອງພຣະອົງ ພຣະອົງເປັນທີ່ເພິ່ງແລະທີ່ຊົ້ນໃນເວລາເດືອດຮ້ອນຂອງຂ້ານ້ອຍ. 17 ໂອ ພຣະເຈົ້າພຣະຜູ້ປ້ອງກັນຂອງຂ້ານ້ອຍເອີຍ ຂ້ານ້ອຍຈະຍ້ອງຍໍສັນລະເສີນພຣະອົງ ພຣະເຈົ້າເປັນທີ່ເພິ່ງ ເປັນຜູ້ທີ່ຊົງຮັກຂອງຂ້ານ້ອຍ. |
@ 2012 United Bible Societies. All Rights Reserved.