ເພງ^ສັນລະເສີນ 57 - ພຣະຄຳພີສັກສິຄຳພາວັນນາອະທິຖານຂໍຄວາມຊ່ວຍເຫລືອ 1 ຂ້າແດ່ພຣະເຈົ້າ ຂໍຊົງໂຜດເມດຕາແລະອີດູແດ່ ເພາະມາເພິ່ງຄວາມປອດໄພໃນພຣະອົງ. ຢູ່ໃຕ້ປີກຂອງພຣະອົງນັ້ນຂ້ານ້ອຍໄດ້ພົບຄວາມຄຸ້ມຄອງ ຈົນກວ່າລົມພະຍຸຮ້າຍຜ່ານພົ້ນໄປແລ້ວ. 2 ຂ້ານ້ອຍຮ້ອງຫາພຣະເຈົ້າອົງສູງສຸດ ຄືອົງທີ່ປະທານສິ່ງສາລະພັດທີ່ຂ້ານ້ອຍຂາດຢູ່ນັ້ນ. 3 ຈາກສະຫວັນພຣະອົງຈະຕອບທັງຊ່ວຍໃຫ້ພົ້ນໄພ ແລະປາບພວກທີ່ກົດຂີ່ຂ້ານ້ອຍໃຫ້ພ່າຍແພ້. ພຣະເຈົ້າຈະສຳແດງໃຫ້ເຫັນຄວາມຮັກອັນໝັ້ນຄົງຂອງພຣະອົງ ແລະຄວາມສັດຊື່ຂອງພຣະອົງທີ່ມີແກ່ຂ້ານ້ອຍນັ້ນ. 4 ຂ້ານ້ອຍຖືກປິດລ້ອມໂດຍເຫຼົ່າສັດຕູ ຜູ້ເປັນດັ່ງໂຕສິງທີ່ກັດກິນມະນຸດ. ແຂ້ວມັນນັ້ນຄ້າຍຄືຫອກແລະລູກສອນ ລີ້ນມັນຄ້າຍຄືກັບດາບອັນຄົມໆ. 5 ຂ້າແດ່ພຣະເຈົ້າ ຂໍຊົງໂຜດສຳແດງຄວາມຍິ່ງໃຫຍ່ຂອງພຣະອົງປາກົດທີ່ຟ້າສະຫວັນ ແລະສະຫງ່າຣາສີຂອງພຣະອົງປາກົດທົ່ວໄປເທິງແຜ່ນດິນໂລກ. 6 ສັດຕູໄດ້ກາງຕາໜ່າງເພື່ອຈັບຂ້ານ້ອຍໄປ ຂ້ານ້ອຍຈຶ່ງໝູບລົງເປັນທຸກໃຈຫຼາຍ. ພວກເຂົາຂຸດຫລຸມໃສ່ທາງທີ່ຂ້ານ້ອຍໄປ ແຕ່ແມ່ນພວກເຂົາເອງທີ່ຕົກໃນຫລຸມນັ້ນ. 7 ຂ້າແດ່ພຣະເຈົ້າ ຂ້ານ້ອຍເຊື່ອໝັ້ນໃນພຣະອົງຢ່າງໝົດໃຈ ແລະຈະຮ້ອງເພງຍ້ອງຍໍສັນລະເສີນພຣະອົງ 8 ຈິດວິນຍານຂອງຂ້ອຍເອີຍ ຈົ່ງຕື່ນຂຶ້ນເຖີດ ກິດຕາແລະກະຈັບປີ່ ຂອງຂ້ອຍ ພິນໃຫຍ່ແລະພິນນ້ອຍ ຈົ່ງຕື່ນຂຶ້ນມາ ຈົ່ງຂຶ້ນມາບັນເລງເພງ ຂ້ອຍຈະປຸກຕາເວັນໃຫ້ລຸກຂຶ້ນ. 9 ຂ້າແດ່ອົງພຣະຜູ້ເປັນເຈົ້າ ຂ້ານ້ອຍຈະໂມທະນາຂອບພຣະຄຸນພຣະອົງ ໃນທ່າມກາງບັນດາຊົນຊາດ ຂ້ານ້ອຍຈະຍ້ອງຍໍສັນລະເສີນພຣະອົງ ໃນທ່າມກາງປະຊາຊົນທຸກຊາດພາສາດ້ວຍ. 10 ຄວາມຮັກອັນໝັ້ນຄົງຂອງພຣະອົງຂຶ້ນສູ່ຟ້າສະຫວັນ ແລະຄວາມສັດຊື່ຂອງພຣະອົງກໍຈຸທ້ອງຟ້າ. 11 ຂ້າແດ່ພຣະເຈົ້າ ຂໍຊົງໂຜດສຳແດງຄວາມຍິ່ງໃຫຍ່ຂອງພຣະອົງປາກົດທີ່ຟ້າສະຫວັນເບື້ອງເທິງ ແລະພຣະສະຫງ່າຣາສີປາກົດທົ່ວໄປເທິງແຜ່ນດິນໂລກ. |
@ 2012 United Bible Societies. All Rights Reserved.