ເພງ^ສັນລະເສີນ 55 - ພຣະຄຳພີສັກສິຄຳພາວັນນາອະທິຖານຂອງຄົນຖືກເພື່ອນຫັກຫລັງ 1 ຂ້າແດ່ພຣະເຈົ້າ ຂໍໂຜດຟັງຄຳພາວັນນາອະທິຖານຂອງຂ້ານ້ອຍດ້ວຍ ແລະຢ່າສູ່ຫັນໜີຈາກຄຳຮ້ອງຂໍຂອງຂ້ານ້ອຍເລີຍ 2 ຂໍຊົງໂຜດສະດັບຮັບຟັງແລະໂຜດຕອບຂ້ານ້ອຍດ້ວຍ ຍ້ອນຄວາມວິຕົກກັງວົນຂ້ານ້ອຍຈຶ່ງເກີດຄວາມອິດເມື່ອຍ. 3 ຂ້ານ້ອຍຢ້ານຕໍ່ການຂູ່ເຂັນຂອງພວກສັດຕູ ຢ້ານຖືກຢຽບຢໍ່າເພາະຄົນຊົ່ວຮ້າຍກົດຂີ່. ພວກເຂົາເຮັດໃຫ້ຂ້ານ້ອຍເດືອດຮ້ອນໜັກຫລາຍ ທັງໂກດຮ້າຍແລະກຽດຊັງຂ້ານ້ອຍດ້ວຍ. 4 ສະນັ້ນ ຂ້ານ້ອຍຈຶ່ງສະທ້ານຢ້ານກົວ ແລະຄວາມຢ້ານຕາຍກໍບີບຄັ້ນຢູ່. 5 ຄວາມຢ້ານຈັບກຸມໄວ້ແລະສັ່ນເຊັນທັງຕົວ ແລະຄວາມຢ້ານໃຫຍ່ກໍຄຸມຂ້ານ້ອຍໄວ້. 6 ຂ້ານ້ອຍຢາກມີປີກດັ່ງນົກເຂົາ ແລະຈະບິນໜີໄປຫາທີ່ພັກຜ່ອນ. 7 ຂ້ານ້ອຍຈະໄດ້ບິນໜີໄປໄກແສນໄກ ອາໄສຢູ່ທີ່ຖິ່ນແຫ້ງແລ້ງກັນດານພຸ້ນ. 8 ຂ້ານ້ອຍຈະໄດ້ພົບບ່ອນຊົ້ນຢ່າງໄວວາ ຈາກລົມບ້າພັດແຮງແລະລົມພະຍຸຮ້າຍ. 9 ຂ້າແດ່ອົງພຣະຜູ້ເປັນເຈົ້າ ຂໍຊົງໂຜດໃຫ້ຄຳເວົ້າຂອງເຫຼົ່າສັດຕູ ເກີດສັບສົນວຸ້ນວາຍແລະບໍ່ເຂົ້າໃຈກັນ. ເພາະຂ້ານ້ອຍເຫັນແຕ່ການຮຸນແຮງ ແລະການຈາລະຈົນເກີດຂຶ້ນຢູ່ໃນເມືອງ 10 ປິດອ້ອມເມືອງໄວ້ທັງເວັນທັງຄືນຢູ່ທີ່ນັ້ນເຕັມໄປແຕ່ ການຂ້າຟັນກັນແລະຄວາມເດືອດຮ້ອນ. 11 ສ່ວນການທຳລາຍນັ້ນກໍມີຢູ່ທຸກແຫ່ງຫົນ ການຂົ່ມຂູ່ ແລະການຫລອກລວງກໍມີໄປທົ່ວຕາມທ້ອງຖະໜົນ. 12 ຖ້າສັດຕູຜູ້ໜຶ່ງດູໝິ່ນນິນທາຂ້ອຍກໍຊ່າງເຂົາ ຂ້ອຍກໍອົດທົນຕໍ່ຄຳເວົ້ານັ້ນໄດ້ ຖ້າຄູ່ແຂ່ງຜູ້ໜຶ່ງເວົ້າອວດໃສ່ຂ້ອຍກໍຊ່າງເຂົາ ຂ້ອຍກໍຫລົບຫລີກຈາກເຂົາໄດ້. 13 ແຕ່ແມ່ນເຈົ້າທີ່ເປັນໝູ່ຄູ່ຂອງຂ້ອຍນີ້ເອງ ເປັນທັງຜູ້ຮ່ວມງານແລະເພື່ອນຜູ້ໃກ້ຊິດດ້ວຍ. 14 ພວກເຮົາເຄີຍເວົ້າຢ່າງມ່ວນຊື່ນນຳກັນ ນະມັດສະການໃນວິຫານຂອງພຣະເຈົ້ານຳກັນດ້ວຍ. 15 ຂໍໃຫ້ສັດຕູນັ້ນຕາຍໄປກ່ອນເວລາຂອງພວກເຂົາສາ ຂໍໃຫ້ລົງໄປສູ່ແດນມໍຣະນາທັງເປັນເຖີດ. ຄວາມຊົ່ວຮ້າຍຢູ່ໃນເຮືອນຂອງພວກເຂົາ ແລະຢູ່ໃນຈິດໃຈຂອງພວກເຂົາດ້ວຍ. 16 ແຕ່ຂ້ອຍເອີ້ນຫາພຣະເຈົ້າ, ແລະພຣະເຈົ້າຢາເວກໍຊ່ວຍຂ້ອຍໃຫ້ພົ້ນ. 17 ຂ້ອຍຄາງຈົ່ມທຸກທັງເຊົ້າທັງທ່ຽງແລະໃນເວລາກາງຄືນ ແລະສຽງຮ້ອງທຸກກໍຂຶ້ນໄປເຖິງພຣະອົງແລ້ວ. 18 ພຣະອົງຈະນຳພາຂ້ອຍໃຫ້ຄືນມາຢ່າງປອດໄພ ຈາກສະໜາມຮົບທີ່ຂ້ອຍໄດ້ຕໍ່ສູ້ສັດຕູຫລາຍຄົນນັ້ນ. 19 ພຣະເຈົ້າ ອົງທີ່ໄດ້ປົກຄອງແຕ່ນິຣັນດອນມາ ຈະຟັງຂ້ອຍຮ້ອງຂໍແລະເອົາຊະນະເຂົາເຈົ້າ. ດ້ວຍວ່າ, ພວກເຂົາປະຕິເສດທີ່ຈະປ່ຽນແປງ ແລະພວກເຂົາກໍບໍ່ຢຳເກງພຣະອົງດ້ວຍ. 20 ໝູ່ເກົ່າຂອງຂ້ອຍໄດ້ໂຈມຕີໝູ່ຂອງລາວເອງ ຄືໄດ້ລະເມີດຄຳສັນຍາທີ່ຕົນໄດ້ເຮັດໄວ້. 21 ຄຳເວົ້າລາວນັ້ນນໍ້ານົມຂຸ້ນກໍບໍ່ນີ້ມປານ ແຕ່ຈິດໃຈລາວພັດມີແຕ່ຄວາມຂົມຂື່ນ. ຄຳເວົ້າລາວນັ້ນລ່ຽນໄຫລເໝືອນນໍ້າມັນພືດ ແຕ່ມັນພັດເປັນດັ່ງມີດຄົມໆໃຊ້ປາດຊີ້ນ. 22 ຈົ່ງມອບຄວາມເດືອດຮ້ອນຂອງເຈົ້າໄວ້ກັບພຣະເຈົ້າຢາເວສາ ພຣະອົງຈະປົກປ້ອງຄຸ້ມຄອງເຈົ້າໄວ້. ພຣະອົງບໍ່ເຄີຍປະຖິ້ມຄົນສັດຊື່ຜູ້ໃດຜູ້ໜຶ່ງເລີຍ ໂດຍໃຫ້ລາວຖືກພ່າຍແພ້. 23 ຂ້າແດ່ພຣະເຈົ້າ ພຣະອົງຈະນຳຜູ້ທີ່ຂ້າຄົນແລະຄົນຂີ້ຕົວະ ໃຫ້ເຂົ້າໄປສູ່ຂຸມຝັງສົບພຸ້ນ ກ່ອນທີ່ອາຍຸເຄິ່ງໜຶ່ງຂອງພວກເຂົາໝົດໄປ ສ່ວນຂ້ານ້ອຍໄວ້ວາງໃຈໃນພຣະອົງ. |
@ 2012 United Bible Societies. All Rights Reserved.