ເພງ^ສັນລະເສີນ 54 - ພຣະຄຳພີສັກສິຄຳພາວັນນາອະທິຖານເພື່ອຂໍໃຫ້ປົກປ້ອງຄຸ້ມຄອງ 1 ຂ້າແດ່ພຣະເຈົ້າ ຂໍຊ່ວຍຂ້ານ້ອຍໃຫ້ພົ້ນໂດຍພຣະນາມຂອງພຣະອົງແດ່ ແລະໂຜດໃຫ້ເປັນອິດສະລະໂດຍພຣະກຳລັງຂອງພຣະອົງ. 2 ຂ້າແດ່ພຣະເຈົ້າ ເມື່ອຂ້ານ້ອຍກ່າວທູນຂໍ ໂຜດຟັງຄຳພາວັນນາອະທິຖານຂອງຂ້ານ້ອຍດ້ວຍ. 3 ຄົນຈອງຫອງຕ່າງກໍພາກັນຫັນມາ ເພື່ອໂຈມຕີຂ້ານ້ອຍໃຫ້ໄດ້ ແລະຄົນໂຫດຮ້າຍກໍຊອກສັງຫານເຊັ່ນກັນ ເປັນຄົນທີ່ບໍ່ສົນໃຈໃນເລື່ອງພຣະເຈົ້າ. 4 ແຕ່ພຣະເຈົ້າຄືຜູ້ຊ່ວຍເຫຼືອຂອງຂ້ານ້ອຍເລື້ອຍມາ. ອົງພຣະຜູ້ເປັນເຈົ້າເປັນຜູ້ຄໍ້າຈູນຊີວິດຂອງຂ້ານ້ອຍໄວ້. 5 ຂໍໃຫ້ພຣະອົງໃຊ້ການຊົ່ວຮ້າຍຂອງພວກເຂົາລົງໂທດສັດຕູຂອງຂ້ານ້ອຍ. ພຣະອົງຈະທຳລາຍພວກເຂົາເພາະພຣະອົງຊົງສັດຊື່. 6 ຂ້າແດ່ພຣະເຈົ້າຢາເວ ຂ້ານ້ອຍຈະຖວາຍເຄື່ອງບູຊາຢ່າງຊື່ນໃຈຍິນດີ ຈະໂມທະນາຂອບພຣະຄຸນເພາະພຣະອົງຊົງມີຄຸນຄວາມດີ. 7 ພຣະອົງໄດ້ຊ່ວຍກູ້ຂ້ານ້ອຍໃຫ້ພົ້ນຈາກຄວາມເດືອດຮ້ອນທັງໝົດຂອງຂ້ານ້ອຍ ແລະຂ້ານ້ອຍກໍໄດ້ເຫັນສັດຕູຂອງຂ້ານ້ອຍພ່າຍແພ້. |
@ 2012 United Bible Societies. All Rights Reserved.