ເພງ^ສັນລະເສີນ 53 - ພຣະຄຳພີສັກສິຄວາມຊົ່ວຮ້າຍຂອງມະນຸດ ( ພສສ 14 ) 1 ຄົນໂງ່ຈ້າເວົ້າຕໍ່ກັນວ່າ, “ໂລກນີ້ບໍ່ມີພຣະເຈົ້າ.” ພວກເຂົາຕ່າງກໍເຮັດໃຫ້ຕົນຊົ່ວລົງທັງນັ້ນ ພວກເຂົາໄດ້ເຮັດສິ່ງທີ່ໜ້າຢ້ານກົວຫລາຍ ບໍ່ມີຜູ້ໜຶ່ງຜູ້ໃດເຮັດໃນສິ່ງທີ່ຖືກຕ້ອງ. 2 ພຣະເຈົ້າຫລຽວລົງຈາກສະຫວັນ ເພື່ອເບິ່ງມວນມະນຸດຊາດ ແລະເພື່ອຢາກຮູ້ວ່າມີຜູ້ໃດແດ່ສະຫລາດພໍ ທີ່ສະແຫວງຫາພຣະເຈົ້າ. 3 ແຕ່ທຸກຄົນລ້ວນແຕ່ເຮັດຜິດຄືກັນໝົດ ບໍ່ມີຈັກຄົນດຽວເຮັດໃນສິ່ງທີ່ຖືກຕ້ອງ. 4 “ພວກເຂົາບໍ່ມີປັນຍາບໍ? ຄົນຊົ່ວເຫຼົ່ານີ້ເປັນຄົນໂງ່ຈ້າກັນຫລືນີ້? ພວກເຂົາມີຊີວິດຢູ່ໂດຍປຸ້ນຈີ້ປະຊາຊົນຂອງເຮົາ ແລະກໍບໍ່ເຄີຍພາວັນນາອະທິຖານຫາພຣະເຈົ້າຈັກເທື່ອ.” 5 ແຕ່ແລ້ວຄົນຊົ່ວຮ້າຍກໍຈະຢ້ານກົວຫລາຍ ເໝືອນກັບວ່າພວກເຂົາບໍ່ເຄີຍເປັນມາກ່ອນ ດ້ວຍວ່າ, ພຣະເຈົ້າຈະເຮັດໃຫ້ກະດູກຂອງເຫຼົ່າສັດຕູ ຂອງປະຊາຊົນຂອງພຣະອົງຊະຊາຍໄປສິ້ນ. ພຣະເຈົ້າຈະຊົງໃຫ້ພວກເຂົາອັບອາຍ, ເພາະວ່າພຣະເຈົ້າຊົງປະຖິ້ມພວກເຂົາແລ້ວ. 6 ຂ້ານ້ອຍຄວນພາວັນນາອະທິຖານຢ່າງໃດຈຶ່ງຈະໄດ້ມີໄຊ ກັບມາຈາກພູເຂົາຊີໂອນສູ່ຊາດອິດສະຣາເອນໄດ້. ປະຊາຊົນອິດສະຣາເອນຈະມີຄວາມສຸກສໍ່າໃດ ເມື່ອພຣະເຈົ້າເຮັດໃຫ້ພວກເຂົາຈະເລີນຮຸ່ງເຮືອງຂຶ້ນໃໝ່. |
@ 2012 United Bible Societies. All Rights Reserved.