ເພງ^ສັນລະເສີນ 51 - ພຣະຄຳພີສັກສິຄຳພາວັນນາອະທິຖານຂໍການຍົກໂທດ 1 ຂ້າແດ່ພຣະເຈົ້າ ໂຜດເມດຕາດ້ວຍ ເພາະຄວາມຮັກອັນໝັ້ນຄົງຂອງພຣະອົງນັ້ນ. ເພາະຄວາມເມດຕາອັນໃຫຍ່ຍິ່ງຂອງພຣະອົງ ໂຜດປັດການບາບຂອງຂ້ານ້ອຍຖິ້ມດ້ວຍ 2 ໂຜດຊຳລະລ້າງຄວາມຊົ່ວຂອງຂ້ານ້ອຍໃຫ້ສິ້ນໄປ ແລະໃຫ້ສະອາດໝົດຈາກການບາບດ້ວຍ. 3 ຂ້ານ້ອຍຍອມຮັບຮູ້ຄວາມຜິດຂອງຂ້ານ້ອຍຢູ່ສະເໝີ ແລະສຳນຶກເຖິງການບາບຂອງຂ້ານ້ອຍນັ້ນ. 4 ຂ້ານ້ອຍໄດ້ເຮັດບາບຕໍ່ສູ້ພຣະອົງແຕ່ຜູ້ດຽວ ຄືເຮັດໃນສິ່ງທີ່ພຣະອົງຖືວ່າເປັນການຊົ່ວຮ້າຍ. ການທີ່ພຣະອົງຕັດສິນຂ້ານ້ອຍນັ້ນກໍຖືກຕ້ອງແລ້ວ. ພຣະອົງຊົງຍຸດຕິທຳເມື່ອລົງໂທດຂ້ານ້ອຍນັ້ນ. 5 ຂ້ານ້ອຍຊົ່ວຊ້າຕັ້ງແຕ່ມື້ທີ່ໄດ້ເກີດມາ, ແຕ່ຢູ່ໃນທ້ອງແມ່ກໍມີບາບຢູ່ແລ້ວ. 6 ຄວາມຈິງກັບຄວາມສັດຊື່ຄືສິ່ງທີ່ພຣະອົງຕ້ອງການ ຂໍໃຫ້ແນວຄິດຈິດໃຈຂອງຂ້ານ້ອຍເຕັມດ້ວຍພຣະປັນຍາເຖີດ. 7 ຂໍຊົງໂຜດຊຳລະບາບຂອງຂ້ານ້ອຍແດ່ ແລະຂ້ານ້ອຍກໍຈະສະອາດງາມດີ ໂຜດຊຳລະການບາບຂອງຂ້ານ້ອຍທັງໝົດ ແລະຂ້ານ້ອຍກໍຈະຂາວກວ່າຫິມະ. 8 ຂໍຊົງໂຜດໃຫ້ຂ້ານ້ອຍໄດ້ຍິນສຽງອັນຊົມຊື່ນເບີກບານໃຈ ຂໍໃຫ້ກະດູກທີ່ພຣະອົງໄດ້ຊົງ ເຮັດໃຫ້ໝຸ່ນແຕກສະຫລາຍໄປນັ້ນຍິນດີ ຂ້ານ້ອຍນັ້ນກໍຈະມີຄວາມສຸກອີກຄັ້ງໜຶ່ງ. 9 ຂໍຊົງໂຜດອັດໜ້າແລະຢ່າເບິ່ງການບາບຂອງຂ້ານ້ອຍ ໂຜດລຶບການຊົ່ວຂອງຂ້ານ້ອຍໃຫ້ໝົດໄປເຖີດ. 10 ຂ້າແດ່ພຣະເຈົ້າ ຂໍຊົງໂຜດສ້າງຈິດໃຈຂ້ານ້ອຍໃຫ້ບໍຣິສຸດ ສວມຈິດວິນຍານໃໝ່ທັງສັດຊື່ໃສ່ໃນຂ້ານ້ອຍດ້ວຍ. 11 ຂໍຢ່າຂັບໄລ່ໃຫ້ໜີໄປຈາກບ່ອນທີ່ພຣະອົງສະຖິດ ແລະຢ່າຖອນພຣະວິນຍານບໍຣິສຸດຂອງພຣະອົງໄປຈາກຂ້ານ້ອຍ. 12 ຂໍຊົງໂຜດໃຫ້ມີຄວາມຊົມຊື່ນກັບຄວາມພົ້ນຂອງພຣະອົງ ແລະໂຜດເຮັດໃຫ້ມີໃຈປະສົງເຊື່ອຟັງພຣະອົງດ້ວຍ. 13 ແລ້ວຂ້ານ້ອຍກໍຈະສັ່ງສອນຄົນບາບໃຫ້ຮູ້ຈັກ ຂໍ້ຄຳສັ່ງແລະພວກເຂົາຈະກັບຄືນມາຫາພຣະອົງ. 14 ຂ້າແດ່ພຣະເຈົ້າ ຂໍຊົງໂຜດໄວ້ຊີວິດແລະຊ່ວຍໃຫ້ພົ້ນໄພ ແລະຂ້ານ້ອຍກໍຈະຊື່ນໃຈເຖິງຄວາມຊອບທຳນັ້ນ. 15 ຂ້າແດ່ອົງພຣະຜູ້ເປັນເຈົ້າ ຂໍຊົງໂຜດຊ່ວຍໄຂສົບປາກຂ້ານ້ອຍແລະຊ່ວຍເວົ້າແດ່ ເພື່ອຈະໄດ້ຍ້ອງຍໍສັນລະເສີນພຣະອົງ. 16 ເພາະພຣະອົງບໍ່ໄດ້ຍິນດີໃນເຄື່ອງຖວາຍບູຊາ ແລະເຄື່ອງເຜົາບູຊາທັງຫຼາຍທີ່ຂ້ານ້ອຍຈະຖວາຍ ພຣະອົງກໍບໍ່ພໍໃຈນຳດ້ວຍ. 17 ຂ້າແດ່ພຣະເຈົ້າ ເຄື່ອງບູຊາທີ່ພຣະເຈົ້າພໍພຣະໄທນັ້ນ ແມ່ນຈິດວິນຍານທີ່ຖ່ອມຕົວລົງ ພຣະເຈົ້າບໍ່ໄດ້ຊົງລັງກຽດຈິດໃຈທີ່ຖ່ອມຕົວລົງ ແລະການກັບໃຈໃໝ່ແທ້ຂອງຂ້ານ້ອຍ. 18 ຂໍຊົງໂຜດເມດຕາແລະຊ່ວຍເຫຼືອຊີໂອນດ້ວຍ ໂຜດສ້າງກຳແພງນະຄອນເຢຣູຊາເລັມຂຶ້ນໃໝ່ດ້ວຍ. 19 ແລ້ວພຣະອົງກໍຈະເພິ່ງພໍໃຈໃນເຄື່ອງບູຊາທີ່ເໝາະສົມ ແລະເຄື່ອງເຜົາບູຊາທີ່ພວກຂ້ານ້ອຍນຳມານັ້ນ ງົວເຖິກຫລາຍໂຕຈະຖືກຂ້າແລະຖວາຍ ທີ່ເທິງແທ່ນບູຊາຂອງພຣະອົງ. |
@ 2012 United Bible Societies. All Rights Reserved.