ເພງ^ສັນລະເສີນ 50 - ພຣະຄຳພີສັກສິການນະມັດສະການອັນແທ້ຈິງ 1 ພຣະເຈົ້າອົງຊົງຣິດອຳນາດຍິ່ງໃຫຍ່ ພຣະເຈົ້າຢາເວກ່າວຈາ ພຣະອົງເອີ້ນເອົາຄົນທົ່ວທັງໂລກາຈາກທິດຕາເວັນອອກ ເຖິງທິດຕາເວັນຕົກ. 2 ພຣະເຈົ້າສົ່ງແສງແຈ້ງມາຈາກພູເຂົາຊີໂອນ ຄືພຣະນະຄອນທີ່ມີຄວາມງົດງາມອັນຄົບຖ້ວນແລະສົມບູນແບບ. 3 ພຣະເຈົ້າຂອງພວກເຮົາກຳລັງມາຢ່າງໂດ່ງດັງ ພຣະອົງມີໄຟລຸກຢູ່ ແລະມີລົມພະຍຸອັນຮ້າຍແຮງພັດອ້ອມພຣະອົງໄວ້. 4 ພຣະອົງຊົງຮຽກເອີ້ນຟ້າສະຫວັນເບື້ອງເທິງແລະແຜ່ນດິນໂລກມາ ໃຫ້ເປັນພະຍານເພື່ອຕັດສິນປະຊາຊົນຂອງພຣະອົງ. 5 ພຣະອົງຊົງກ່າວວ່າ, “ຈົ່ງທ້ອນໂຮມເອົາພວກຄົນສັດຊື່ຕໍ່ເຮົາ ແລະນຳພວກເຂົາໃຫ້ມາຫາເຮົາພີ້ ຄືຜູ້ທີ່ໄດ້ຕົກລົງເຮັດພັນທະສັນຍາກັບເຮົາ ໂດຍການຖວາຍເຄື່ອງບູຊານັ້ນ.” 6 ຟ້າສະຫວັນປະກາດວ່າ ພຣະເຈົ້າຊົງຊອບທຳ ແລະຜູ້ຕັດສິນຄວາມແມ່ນພຣະອົງເອງຄືພຣະເຈົ້າ. 7 “ຈົ່ງຟັງເຮົາຈະກ່າວ ປະຊາຊົນຂອງເຮົາເອີຍ ເຮົາຈະເປັນພະຍານຕໍ່ສູ້ພວກເຈົ້າ ຊາດອິດສະຣາເອນເອີຍ ເພາະວ່າເຮົານັ້ນ ເປັນພຣະເຈົ້າຄືພຣະເຈົ້າຂອງພວກເຈົ້າ. 8 ເຮົາບໍ່ໄດ້ຕິຕຽນພວກເຈົ້າຍ້ອນເຄື່ອງບູຊາຂອງພວກເຈົ້າ ຫຼືເຄື່ອງເຜົາບູຊາທີ່ນຳມາໃຫ້ເຮົາເລື້ອຍໆນັ້ນ. 9 ງົວເຖິກໃນຄອກພວກເຈົ້ານັ້ນເຮົາບໍ່ຕ້ອງການ ຫລືແບ້ໃນຝູງສັດ ເຮົາກໍບໍ່ຕ້ອງການດ້ວຍ 10 ເພາະສັດທັງໝົດນັ້ນທີ່ຢູ່ໃນປ່າດົງພົງໄພ ຝູງງົວເທິງເນີນພູພັນໜ່ວຍກໍເປັນຂອງເຮົາທັງນັ້ນ. 11 ຝູງນົກຢູ່ຕາມປ່າຕ່າງໆກໍເປັນຂອງເຮົາ ທັງທຸກໆສິ່ງທີ່ມີຊີວິດຢູ່ຕາມທົ່ງນາດ້ວຍ. 12 ຖ້າເຮົາຫິວເຂົ້າກໍຈະບໍ່ຂໍເຂົ້າຈາກເຈົ້າກິນ ເພາະໂລກກັບທຸກໆສິ່ງກໍເປັນຂອງເຮົາທັງສິ້ນ. 13 ເຮົາກິນຊີ້ນຂອງງົວເຖິກຊັ້ນບໍ? ຫລືດື່ມເລືອດຂອງແບ້ເຖິກຫລືນີ້? 14 ຈົ່ງຖວາຍໂມທະນາຂອບພຣະຄຸນເປັນເຄື່ອງບູຊາແກ່ພຣະເຈົ້າ ຖວາຍແກ່ຜູ້ຊົງຣິດອຳນາດຍິ່ງໃຫຍ່ຕາມທີ່ເຈົ້າສາບານໄວ້. 15 ເມື່ອເຈົ້າຖືກເດືອດຮ້ອນ ຈົ່ງຮ້ອງຫາເຮົາ ເຮົາຈະຊ່ວຍເຈົ້າໃຫ້ພົ້ນ ແລະເຈົ້າກໍຈະຍ້ອງຍໍສັນລະເສີນເຮົາ.” 16 ແຕ່ພຣະເຈົ້າກ່າວຕໍ່ຄົນຊົ່ວຮ້າຍທັງຫລາຍວ່າ, “ເປັນຫຍັງເຈົ້າຈຶ່ງທ່ອງຈຳຂໍ້ຄຳສັ່ງຂອງເຮົາ? ແລະເປັນຫຍັງເຈົ້າຈຶ່ງກ່າວເຖິງເລື່ອງ ພັນທະສັນຍາຂອງເຮົານັ້ນ? 17 ເຈົ້າປະຕິເສດເຮົາ ກ່າວຕຳໜິຕິຕຽນ ແລະບໍ່ຍອມຮັບຂໍ້ຄຳສັ່ງຂອງເຮົາດ້ວຍ. 18 ເຈົ້າເປັນໝູ່ກັບຄົນຂີ້ລັກທຸກຄົນທີ່ພົບເຫັນ ແລະຄົບຫາສະມາຄົມກັບທຸກຄົນທີ່ຫລີ້ນຊູ້. 19 ເຈົ້າພ້ອມທີ່ຈະເວົ້າແຕ່ຄວາມຊົ່ວຮ້າຍຢູ່ສະເໝີ ເຈົ້າບໍ່ເຄີຍຫ້າມລີ້ນຂອງເຈົ້າບໍ່ໃຫ້ກ່າວຄຳຕົວະ. 20 ເຈົ້າພ້ອມທີ່ຈະຫາເລື່ອງໃສ່ພີ່ນ້ອງຂອງຕົນ ແລະເລັ່ງຊອກຈັບຜິດເຂົາເຈົ້າ. 21 ເຈົ້າໄດ້ເຮັດທຸກສິ່ງນີ້ ແຕ່ເຮົາບໍ່ໄດ້ເວົ້າຫຍັງ ສະນັ້ນ ເຈົ້າຈຶ່ງຄິດວ່າເຮົາກໍຄືກັນກັບເຈົ້າ ແຕ່ບັດນີ້ເຮົາຂໍກ່າວຕຳໜິຕິຕຽນ ແລະເຮັດໃຫ້ເລື່ອງຈະແຈ້ງຕໍ່ໜ້າເຈົ້າ. 22 ຈົ່ງພິຈາລະນາເຖິງເລື່ອງນີ້ໃຫ້ດີຜູ້ທີ່ມັກລືມພຣະເຈົ້າເອີຍ ຖ້າບໍ່ດັ່ງນັ້ນແລ້ວ ເຮົາຈະທຳລາຍພວກເຈົ້າໃຫ້ແຕກເປັນປ່ຽງໆ ແລະຈະບໍ່ມີຜູ້ໃດຊ່ວຍເຈົ້າໃຫ້ພົ້ນໄດ້. 23 ການຖວາຍໂມທະນາຂອບພຣະຄຸນເປັນການຖວາຍທີ່ໃຫ້ກຽດແກ່ເຮົາ ແລະທຸກຄົນທີ່ເຊື່ອຟັງພຣະເຈົ້າກໍຈະໄດ້ພົ້ນ.” |
@ 2012 United Bible Societies. All Rights Reserved.