ເພງ^ສັນລະເສີນ 49 - ພຣະຄຳພີສັກສິຄວາມໂງ່ຈ້າຂອງຜູ້ທີ່ໄວ້ໃຈໃນຄວາມຮັ່ງມີຂອງຕົນ 1 ຈົ່ງຟັງເຖີດ ປະຊາຊົນທຸກຖ້ວນໜ້າເອີຍ ຄົນທົ່ວທັງໂລກເອີຍ ຈົ່ງຮັບຟັງເລື່ອງນີ້ 2 ທັງຜູ້ໃຫຍ່ແລະຜູ້ນ້ອຍກໍເໝືອນກັນ ທັງຄົນຮັ່ງມີແລະຄົນຍາກຈົນດ້ວຍ. 3 ແນວຄິດຂອງຂ້ານ້ອຍນັ້ນຈະປອດໂປ່ງດີ ຂ້ານ້ອຍມີຖ້ອຍຄຳແຫ່ງປັນຍາທີ່ຈະກ່າວ. 4 ຂ້ານ້ອຍຈະໃຫ້ຄວາມສົນໃຈແກ່ຄຳສຸພາສິດ ແລະອະທິບາຍຄວາມໝາຍທັງດີດກິດຕາ ພ້ອມ. 5 ຂ້ານ້ອຍບໍ່ຢ້ານໃນຄາວອັນຕະລາຍ ເມື່ອຖືກສັດຕູອ້ອມລ້ອມຂ້ານ້ອຍໄວ້ 6 ເມື່ອຖືກຄົນຊົ່ວຮ້າຍຜູ້ທີ່ວາງໃຈໃນຄວາມຮັ່ງມີ ອວດດີໃນຊັບສິນອັນໃຫຍ່ໂຕຂອງເຂົາເຈົ້າ. 7 ຄົນຜູ້ໜຶ່ງໄຖ່ເອົາຊີວິດຂອງຕົນເອງບໍ່ໄດ້ເລີຍ ຈ່າຍຄ່າຊີວິດໃຫ້ພຣະເຈົ້າບໍ່ໄດ້ຈັກເທື່ອ 8 ເພາະຊີວິດມະນຸດນັ້ນມີຄ່າສູງຫລາຍ ສິ່ງທີ່ລາວມີກໍໄຖ່ເອົາຊີວິດບໍ່ພໍຈັກເທື່ອ 9 ເພື່ອຮັກສາລາວໃຫ້ພົ້ນຈາກຂຸມຝັງສົບ ແລະໃຫ້ມີຊີວິດຢູ່ສືບໄປເປັນນິດ. 10 ໃຜໆກໍເຫັນໄດ້ວ່າມະນຸດທຸກຄົນຕ້ອງຕາຍ ທັງຄົນໂງ່ຈ້າເບົາປັນຍາແລະນັກປາດດ້ວຍ. ພວກເຂົາໄດ້ປະຄວາມຄູນຮັ່ງຄູນມີໄວ້ໃຫ້ຜູ້ໃດ ກໍໃຫ້ລູກຫລານຂອງເຂົາເຈົ້າ. 11 ຂຸມຝັງສົບ ເປັນບ້ານເຮືອນຂອງເຂົາຕະຫຼອດໄປ ແມ່ນວ່າຄັ້ງໜຶ່ງພວກເຂົາມີທີ່ດິນເປັນຂອງຕົນເອງກໍຕາມ. 12 ຄວາມຍິ່ງໃຫຍ່ຂອງມະນຸດນັ້ນບໍ່ອາດຊ່ວຍຕົນໃຫ້ພົ້ນຕາຍ ລາວຈະຕ້ອງຕາຍໄປດັ່ງໂຕສັດຕ່າງໆ. 13 ເບິ່ງດູ ມີຫຍັງເກີດຂຶ້ນນຳຜູ້ທີ່ວາງໃຈໃນຕົນເອງ ຄືຊາຕາກຳຂອງຜູ້ທີ່ ພໍໃຈໃນຄວາມຮັ່ງມີນັ້ນ. 14 ພວກເຂົາຖືກກຳນົດໃຫ້ຕາຍດັ່ງໂຕແກະ ແລະຄວາມຕາຍກໍຈະເປັນຜູ້ລ້ຽງເຂົາເຈົ້າ. ຄົນຊອບທຳຈະມີໄຊຂະນະທີ່ຮ່າງກາຍເປື່ອຍເໜົ່າ ໃນແດນມໍຣະນາທີ່ໄກຈາກເຮືອນເຂົາເຈົ້າ. 15 ແຕ່ພຣະເຈົ້າຈະກອບກູ້ເອົາຂ້ານ້ອຍແລະຈະຊ່ວຍຊູຂ້ານ້ອຍ ໃຫ້ພົ້ນຈາກຣິດອຳນາດຂອງຄວາມຕາຍໄດ້. 16 ຢ່າສູ່ເຄືອງໃຈ ເມື່ອເຫັນຄົນໜຶ່ງຮັ່ງມີ ແມ່ນແຕ່ເມື່ອເຫັນຊັບສິນຂອງລາວທະວີຂຶ້ນ 17 ລາວເອົາຊັບສິນໄປນຳບໍ່ໄດ້ເມື່ອຕາຍໄປ ມັນຈະບໍ່ໄປກັບລາວໃນຂຸມຝັງສົບດອກ. 18 ຖ້າແມ່ນວ່າ ຊາຍຄົນໜຶ່ງພໍໃຈໃນຊີວິດຂອງຕົນ ແລະໄດ້ຮັບຄຳຍ້ອງຍໍຊົມເຊີຍເພາະຜົນສຳເລັດຂອງລາວນັ້ນ 19 ລາວກໍຈະໄປຢູ່ຮ່ວມກັບປູ່ຍ່າຕາຍາຍທີ່ຕາຍໄປ ສູ່ບ່ອນມືດມິດອັນຕະຫລອດສືບໆໄປພຸ້ນ. 20 ຄວາມຍິ່ງໃຫຍ່ນັ້ນບໍ່ອາດຊ່ວຍຕົນໃຫ້ພົ້ນຕາຍ ລາວຍັງຈະຕ້ອງຕາຍໄປດັ່ງໂຕສັດທັງຫຼາຍ. |
@ 2012 United Bible Societies. All Rights Reserved.