ເພງ^ສັນລະເສີນ 37 - ພຣະຄຳພີສັກສິຢ່າເຄືອງໃຈເພາະຄົນຊົ່ວໄດ້ດີ 1 ຢ່າກັງວົນໃຈໃນເລື່ອງຄົນຊົ່ວຮ້າຍທັງຫລາຍ ຢ່າອິດສາຄົນທີ່ປະພຶດຊົ່ວຮ້າຍ. 2 ບໍ່ດົນພວກເຂົາຈະຫາຍໄປດັ່ງຕົ້ນຫຍ້າທີ່ຫ່ຽວລົງ ພວກເຂົາຈະຕາຍດັ່ງພືດພັນທີ່ຫ່ຽວແຫ້ງ. 3 ຈົ່ງໄວ້ວາງໃຈໃນພຣະເຈົ້າຢາເວແລະເຮັດດີ ຈົ່ງອາໄສຢູ່ໃນດິນແດນຢ່າງປອດໄພເຖີດ. 4 ຈົ່ງຊອກຫາຄວາມຊົມຊື່ນຍິນດີໃນພຣະເຈົ້າຢາເວຂອງເຈົ້າສາ ພຣະອົງຈະໂຜດໃຫ້ຕາມຄວາມປະສົງຂອງເຈົ້າ. 5 ຈົ່ງມອບທາງຂອງເຈົ້າແກ່ພຣະເຈົ້າຢາເວ ຈົ່ງໄວ້ວາງໃຈໃນພຣະອົງແລ້ວພຣະອົງກໍຈະຊ່ວຍເຫລືອເຈົ້າ 6 ພຣະອົງຈະເຮັດໃຫ້ຄວາມຊອບທຳຂອງເຈົ້າຈະເລີນຮຸ່ງເຮືອງອອກໄປ ເໝືອນດັ່ງຕາເວັນໃນຍາມທ່ຽງ. 7 ຈົ່ງອົດທົນຄອຍຖ້າພຣະເຈົ້າຢາເວກະທຳການ ຢ່າກັງວົນນຳຜູ້ຮັ່ງມີຫລືຜູ້ສຳເລັດໃນທາງຊົ່ວຮ້າຍ. 8 ຢ່າຈຳນົນຕໍ່ຄວາມໂຫດຮ້າຍຫລືຄວາມວຸ້ນວາຍໃຈ ມັນນຳເຈົ້າໄປສູ່ຄວາມເດືອດຮ້ອນເທົ່ານັ້ນ. 9 ຜູ້ທີ່ໄວ້ວາງໃຈໃນພຣະເຈົ້າຢາເວ ຈະໄດ້ຮັບດິນແດນເປັນກຳມະສິດ ແຕ່ຄົນຊົ່ວຮ້າຍຈະຖືກຂັບໄລ່ໜີໄປໝົດສິ້ນ. 10 ອີກບໍ່ດົນຄົນຊົ່ວຮ້າຍຈະດັບສູນໄປ ເຈົ້າອາດຊອກຫາພວກເຂົາ ແຕ່ກໍຈະບໍ່ພົບ 11 ແຕ່ຜູ້ຖ່ອມຕົວຈະໄດ້ຮັບດິນແດນເປັນມໍຣະດົກ ທັງຊື່ນໃຈຍິນດີຢູ່ກັບຄວາມຮັ່ງມີແລະມີສັນຕິສຸກດ້ວຍ. 12 ຄົນຊົ່ວຮ້າຍວາງອຸບາຍເພື່ອປອງຮ້າຍຄົນຊອບທຳ ພວກເຂົາກຶ້ງຕາເບິ່ງລາວດ້ວຍຄວາມກຽດຊັງຍິ່ງ. 13 ແຕ່ພຣະເຈົ້າຢາເວຫົວຂວັນໃສ່ຄົນຊົ່ວຮ້າຍທັງຫລາຍ ເພາະພຣະອົງຮູ້ວ່າໃນບໍ່ດົນພວກເຂົາຈະຖືກທຳລາຍ. 14 ຄົນຊົ່ວຖອດດາບແລະກົ່ງຄັນທະນູຂອງຕົນ ເພື່ອຂ້າຄົນທີ່ຂັດສົນແລະຄົນທີ່ເຮັດຖືກຕ້ອງ 15 ແຕ່ພວກເຂົາຈະຖືກຂ້າດ້ວຍດາບຂອງພວກເຂົາເອງ ແລະຄັນທະນູຂອງພວກເຂົາຈະຫັກໄປສິ້ນ. 16 ສິ່ງເລັກນ້ອຍທີ່ຄົນຊອບທຳມີ ກໍມີຄຸນຄ່າຫລາຍກວ່າ ຊັບສິນຂອງຄົນຊົ່ວຮ້າຍທັງຫລາຍ 17 ເພາະພຣະອົງໄດ້ໃຫ້ກຳລັງຂອງຄົນຊົ່ວຮ້າຍເສຍໄປ ແຕ່ພຣະເຈົ້າຢາເວຄຸ້ມຄອງຄົນຊອບທຳໄວ້. 18 ພຣະເຈົ້າຢາເວເອົາໃຈໃສ່ຕໍ່ຜູ້ທີ່ເຊື່ອຟັງພຣະອົງ ດິນແດນກໍຈະເປັນຂອງພວກເຂົາໄປຕະຫລອດ. 19 ຄາວຊົ່ວຮ້າຍ ພວກເຂົາຈະບໍ່ທົນທຸກທໍລະມານ ພວກເຂົາຈະມີພຽງພໍໃນຄາວອຶດຢາກ. 20 ແຕ່ຄົນຊົ່ວຮ້າຍຈະຕາຍໄປດັ່ງຄວັນໄຟຫັບຫາຍ ສັດຕູຂອງພຣະເຈົ້າຢາເວຈະດັບໄປດັ່ງດອກໄມ້ປ່າ. 21 ຄົນຊົ່ວຮ້າຍຍືມເງິນໄປແລ້ວບໍ່ເຄີຍສົ່ງຄືນ ແຕ່ຄົນຊອບທຳມີໃຈສັດທາຮັກໃນການໃຫ້ທານ. 22 ຄົນມີພຣະພອນຂອງພຣະເຈົ້າຢາເວ ຈະໄດ້ຮັບດິນແດນເປັນມໍຣະດົກ ແຕ່ຄົນທີ່ຖືກສາບແຊ່ງ ຈະຖືກຂັບໄລ່ໜີໄປສິ້ນ. 23 ພຣະເຈົ້າຢາເວນຳຄົນຕາມທາງທີ່ພວກເຂົາຄວນໄປ ຜູ້ທີ່ເຮັດໃຫ້ພຣະອົງພໍໃຈ ພຣະອົງກໍຊົງຄຸ້ມຄອງເຂົາໄວ້. 24 ເມື່ອພວກເຂົາລົ້ມລົງ ພວກເຂົາຈະບໍ່ຖືກຢຽບຢໍ່າ ເພາະພຣະອົງຈະຈັບມືຖືແຂນຂອງພວກເຂົາໃຫ້ລຸກຂຶ້ນໃໝ່. 25 ບັດນີ້ ຂ້ອຍເຖົ້າແກ່ແລ້ວທັງມີຊີວິດຢູ່ຕັ້ງດົນນານ ແຕ່ກໍຍັງບໍ່ເຄີຍເຫັນເຫດການນີ້ຈັກເທື່ອ ຄືວ່າພຣະເຈົ້າປະຖິ້ມຄົນຊອບທຳ ຫລືປະປ່ອຍໃຫ້ລູກຂອງລາວຫາຂໍທານກິນຕາມບ້ານ. 26 ລາວໃຫ້ລ້າໆແລະໃຫ້ຄົນຢືມໂດຍບໍ່ຄິດຄ່າ ບັນດາລູກຂອງລາວນັ້ນກໍກາຍເປັນທໍ່ພຣະພອນ. 27 ຈົ່ງຫັນໜີຈາກການຊົ່ວແລະກະທຳແຕ່ການດີ ເຊື້ອສາຍຂອງເຈົ້າກໍຈະຢູ່ໃນດິນແດນເລື້ອຍໆ 28 ສຳລັບພຣະເຈົ້າຢາເວພຣະອົງຮັກຄວາມເປັນທຳ ແລະບໍ່ປ່ອຍປະລະເລີຍຄົນທີ່ສັດຊື່ຕໍ່ພຣະອົງນັ້ນ. ພຣະອົງຄຸ້ມຄອງເຂົາເຈົ້າຕະຫລອດໄປ ແຕ່ເຊື້ອສາຍຂອງຄົນຊົ່ວຈະຖືກໄລ່ໃຫ້ໜີໄປສິ້ນ. 29 ຄົນຊອບທຳຈະໄດ້ຮັບດິນແດນເປັນມໍຣະດົກ ແລະຈະອາໄສຢູ່ທີ່ນັ້ນສືບໄປເປັນນິດ. 30 ຄຳເວົ້າອັນສະຫລາດເປັນຄຳເວົ້າຂອງຄົນຊອບທຳ ລາວເວົ້າແຕ່ສິ່ງທີ່ຊອບທຳແລະຖືກຕ້ອງ. 31 ກົດບັນຍັດຂອງພຣະເຈົ້າກໍຢູ່ໃນຈິດໃຈຂອງພວກເຂົາ ພວກເຂົາບໍ່ເຄີຍຫ່າງເຫີນຈາກກົດບັນຍັດ. 32 ຄົນຊົ່ວຮ້າຍຕັ້ງໜ້າຊອມເບິ່ງຄົນຊອບທຳ ທັງຊອກຫາທາງທີ່ຈະຂ້າລາວຖິ້ມ 33 ແຕ່ພຣະເຈົ້າຢາເວຈະບໍ່ຖິ້ມລາວໄປ ໃຫ້ຢູ່ໃຕ້ເງື້ອມມືຂອງຄົນຊົ່ວຮ້າຍ ຫລືປະປ່ອຍໃຫ້ລາວໄດ້ຮັບໂທດທັນ ເມື່ອຖືກນຳຂຶ້ນສານຕັດສິນລົງໂທດ. 34 ຈົ່ງມີຄວາມຫວັງໃນພຣະເຈົ້າຢາເວ ແລະຈົ່ງເຊື່ອຟັງຂໍ້ຄຳສັ່ງເຖີດ; ພຣະອົງຈະໃຫ້ກຽດເຈົ້າໂດຍໄດ້ຮັບດິນແດນ ເຈົ້າຈະເຫັນຄົນຊົ່ວຖືກຂັບໄລ່ອອກໄປສິ້ນ. 35 ຂ້ອຍໄດ້ເຫັນຄົນຊົ່ວຮ້າຍແລະຜູ້ກົດຂີ່ຄົນ ຖືຕົວສູງດັ່ງຕົ້ນສົນສີດາທີ່ເລບານອນພຸ້ນ; 36 ແຕ່ເມື່ອຂ້ອຍຍ່າງຜ່ານກາຍ ບໍ່ເຫັນລາວຢູ່ທີ່ນັ້ນອີກຕໍ່ໄປ ຂ້ອຍໄດ້ຊອກຫາລາວແຕ່ກໍບໍ່ພົບ. 37 ຈົ່ງແລເບິ່ງຄົນດີແລະສັງເກດເບິ່ງຄົນຊອບທຳ ຜູ້ທີ່ຮັກສັນຕິສຸກກໍມີລູກຫລານຫລາຍ 38 ແຕ່ບັນດາຄົນບາບຈະຖືກທຳລາຍຢ່າງສິ້ນເຊີງ ເຊື້ອສາຍຂອງພວກເຂົາຈະຖືກທຳລາຍໃຫ້ດັບສູນໄປ. 39 ຄົນຊອບທຳນັ້ນພຣະເຈົ້າຢາເວຊ່ວຍໃຫ້ພົ້ນໄພ ແລະຄຸ້ມຄອງພວກເຂົາໃນຄາວເດືອດຮ້ອນ. 40 ພຣະເຈົ້າຢາເວຊ່ວຍເຫຼືອແລະຊ່ວຍກູ້ເອົາພວກເຂົາຈາກຄົນຊົ່ວຮ້າຍທັງຫລາຍ ເພາະວ່າພວກເຂົາມາຂໍໃຫ້ພຣະອົງຄຸ້ມຄອງຮັກສາ. |
@ 2012 United Bible Societies. All Rights Reserved.