ເພງ^ສັນລະເສີນ 36 - ພຣະຄຳພີສັກສິອົງພຣະຜູ້ເປັນເຈົ້າເປັນບໍ່ເກີດແຫ່ງຊີວິດ 1 ຄວາມບາບເວົ້າຕໍ່ຄົນຊົ່ວຮ້າຍເລິກເຂົ້າໄປໃນຈິດໃຈ ພວກເຂົາປະຕິເສດພຣະເຈົ້າເພາະບໍ່ຢ້ານຢຳພຣະອົງ. 2 ຍ້ອນຄິດວ່າຕົນເອງຍິ່ງໃຫຍ່ຫລາຍ ຈຶ່ງຄິດວ່າ ພຣະເຈົ້າຈະບໍ່ຮູ້ເຫັນບາບຂອງພວກເຂົາ ແລະຈະບໍ່ໃສ່ໂທດພວກເຂົາໄດ້. 3 ຄຳເວົ້າຂອງພວກເຂົາຊົ່ວຊ້າເຕັມໄປດ້ວຍຄຳຕົວະ ບໍ່ເຮັດສິ່ງທີ່ສະຫລາດ ແລະບໍ່ເຮັດສິ່ງດີຕໍ່ໄປອີກ. 4 ເມື່ອພວກເຂົານອນຢູ່ເທິງຕຽງ ພວກເຂົາກໍວາງແຜນການຊົ່ວຊ້າ ພວກເຂົາບໍ່ເຄີຍກະທຳດີແລະບໍ່ເຄີຍປະຕິເສດສິ່ງທີ່ຊົ່ວຮ້າຍ. ພຣະເຈົ້າຊົງຄຸນຄວາມດີ 5 ຂ້າແດ່ພຣະເຈົ້າຢາເວ ພຣະຄຸນຄວາມດີຂອງພຣະອົງຢຽດສູງສູ່ຟ້າສະຫວັນ ຄວາມສັດຊື່ຂອງພຣະອົງກໍແຜ່ໄປສູ່ທ້ອງຟ້າ. 6 ຄວາມຊອບທຳຂອງພຣະອົງນັ້ນສູງສົ່ງດັ່ງພູເຂົາ ແລະຄວາມຍຸດຕິທຳກໍເປັນດັ່ງທະເລເລິກ. ມວນມະນຸດແລະຝູງສັດທັງປວງ ກໍຢູ່ໃຕ້ການຄຸ້ມຄອງຂອງພຣະເຈົ້າຢາເວທັງນັ້ນ. 7 ຂ້າແດ່ພຣະເຈົ້າ ຄວາມຮັກອັນໝັ້ນຄົງຂອງພຣະອົງນັ້ນກໍປະເສີດຍິ່ງ ມະນຸດພົບພໍ້ ການຄຸ້ມຄອງໃຕ້ຮົ່ມປີກຂອງພຣະອົງ. 8 ມະນຸດກິນລ້ຽງດ້ວຍອາຫານອັນດີທີ່ພຣະອົງຊົງປະທານໃຫ້ ທັງດື່ມນໍ້າຈາກແມ່ນໍ້າແຫ່ງພຣະຄຸນຄວາມດີຂອງພຣະອົງ. 9 ພຣະອົງເປັນບໍ່ເກີດແຫ່ງທຸກຊີວິດ ພວກຂ້ານ້ອຍເຫັນແສງສະຫວ່າງ ຍ້ອນແສງສະຫວ່າງຂອງພຣະອົງ. 10 ຂໍຊົງໂຜດສືບຕໍ່ໃຫ້ຄວາມຮັກໝັ້ນຄົງຂອງພຣະອົງແກ່ຜູ້ທີ່ຮູ້ຈັກພຣະອົງ ແລະໃຫ້ພຣະຄຸນຄວາມດີຂອງພຣະອົງແກ່ຜູ້ທີ່ຊອບທຳດ້ວຍ. 11 ຂໍຢ່າປ່ອຍໃຫ້ຂ້ານ້ອຍຖືກໂຈມຕີໂດຍຄົນຈອງຫອງ ຫລືຕ້ອງແລ່ນປົບໜີເພາະຄົນຊົ່ວຮ້າຍ. 12 ເບິ່ງບ່ອນຄົນຊົ່ວຮ້າຍລົ້ມລົງດູ ທີ່ນັ້ນພວກເຂົາຢຽດຢູ່ແລະລຸກຂຶ້ນບໍ່ໄດ້. |
@ 2012 United Bible Societies. All Rights Reserved.