ເພງ^ສັນລະເສີນ 32 - ພຣະຄຳພີສັກສິຄວາມສຸກເປັນຂອງຜູ້ທີ່ໄດ້ຮັບການອະໄພ 1 ຄວາມສຸກເປັນຂອງຜູ້ທີ່ໄດ້ຮັບການອະໄພບາບກຳ ແລະເປັນຂອງຜູ້ທີ່ໄດ້ຮັບການຍົກໂທດຈາກຄວາມຜິດ. 2 ຄວາມສຸກເປັນຂອງຜູ້ທີ່ພຣະເຈົ້າຢາເວບໍ່ຕໍ່ວ່າເພາະເຮັດຜິດ ແລະເປັນຂອງຜູ້ທີ່ພົ້ນຈາກການຫລອກລວງທັງສິ້ນ. 3 ເມື່ອຂ້ານ້ອຍບໍ່ສາລະພາບການບາບທີ່ໄດ້ກະທຳມາ ຂ້ານ້ອຍກໍອິດອ່ອນຊຸດໂຊມເພາະຮ້ອງໄຫ້ຕະຫລອດວັນ. 4 ພຣະອົງລົງໂທດໃສ່ໃຫ້ຂ້ານ້ອຍທັງເວັນແລະຄືນນັ້ນ ກຳລັງຂ້ານ້ອຍກໍອ່ອນແຮງລົງຢ່າງໝົດສິ້ນ ດັ່ງຄວາມຊຸ່ມທີ່ແຫ້ງລົງໂດຍລະດູອົບເອົ້າ. 5 ແລ້ວຂ້ານ້ອຍກໍສາລະພາບບາບຕໍ່ພຣະເຈົ້າຢາເວໂດຍບໍ່ໄດ້ປິດບັງຫຍັງ ຄືການເຮັດຜິດຂອງຂ້ານ້ອຍທຸກຢ່າງນັ້ນ. ຂ້ານ້ອຍໄດ້ຕັດສິນໃຈຄັກແນ່ແລ້ວວ່າ ສາລະພາບຕໍ່ພຣະອົງ ການບາບທັງໝົດຂອງຂ້ານ້ອຍກໍຖືກອະໄພແລ້ວ. 6 ສະນັ້ນ ປະຊາຊົນທຸກທົ່ວໜ້າ ທີ່ຈົງຮັກພັກດີຕໍ່ພຣະອົງ ຄວນພາວັນນາອະທິຖານຫາພຣະອົງເມື່ອຄາວຈຳເປັນ ເມື່ອຄວາມທົນທຸກລຳບາກດັ່ງນໍ້າມາກໄຫລຫລັ່ງເຂົ້າມາ ກໍຈະບໍ່ໄຫລຖ້ວມເຖິງພວກເຂົາຢ່າງເດັດຂາດ. 7 ບ່ອນລີ້ໄພຂອງຂ້ານ້ອຍນັ້ນແມ່ນພຣະອົງ ຜູ້ຈະຊ່ວຍຂ້ານ້ອຍຈາກຄວາມເດືອດຮ້ອນໄດ້. ຂ້ານ້ອຍເປັ່ງສຽງຮ້ອງເຖິງຄວາມພົ້ນຂອງພຣະອົງ ເພາະພຣະອົງຄຸ້ມຄອງຮັກສາຂ້ານ້ອຍໄວ້. 8 “ເຮົາຈະສອນເຈົ້າໃຫ້ຮູ້ຈັກທາງທີ່ເຈົ້າຄວນໄປ ເຮົາຈະໃຫ້ຄຳແນະນຳແລະແອບສອນເຈົ້າ. 9 ຢ່າໂງ່ຈ້າດັ່ງມ້າຫລືລໍ ຊຶ່ງຖືກຄຸມດ້ວຍເຫຼັກ ຫລືເຊືອກຂວາງປາກໄວ້ ເພາະເພື່ອໃຫ້ມັນຍອມຟັງ.” 10 ຄົນຊົ່ວຕ້ອງທົນທຸກໜັກ ແຕ່ຜູ້ທີ່ວາງໃຈໃນພຣະເຈົ້າຢາເວ ຄວາມຮັກອັນໝັ້ນຄົງຂອງພຣະອົງຈະຄຸ້ມຄອງໄວ້. 11 ຜູ້ທີ່ຊອບທຳເອີຍ ຈົ່ງຍິນດີແລະຊື່ນໃຈໃນພຣະເຈົ້າຢາເວ ຜູ້ທີ່ເຊື່ອຟັງພຣະອົງເອີຍ ຈົ່ງໂຮຮ້ອງຍິນດີເທີ້ນ. |
@ 2012 United Bible Societies. All Rights Reserved.