ເພງ^ສັນລະເສີນ 29 - ພຣະຄຳພີສັກສິສຽງຂອງອົງພຣະຜູ້ເປັນເຈົ້າກ່າວໃນລົມພະຍຸ 1 ຈົ່ງຍ້ອງຍໍສັນລະເສີນພຣະເຈົ້າຢາເວ ຊາວສະຫວັນເອີຍ ຈົ່ງຍ້ອງຍໍສັນລະເສີນສະຫງ່າຣາສີຂອງພຣະເຈົ້າຢາເວ ແລະຣິດທານຸພາບ. 2 ຈົ່ງຍ້ອງຍໍສັນລະເສີນພຣະນາມອັນຮຸ່ງເຮືອງຂອງພຣະເຈົ້າຢາເວ ຈົ່ງກົ້ມຂາບອົງບໍຣິສຸດ ເມື່ອພຣະອົງມາປາກົດນັ້ນ. 3 ສຽງຂອງພຣະເຈົ້າຢາເວດັງ ກ້ອງກັງວານອອກໄປເທິງໜ້ານໍ້າມະຫາສະໝຸດເລິກ ສະຫງ່າຣາສີຂອງພຣະເຈົ້າເປັນສຽງດັງກ້ອງກັງວານ ສຽງຂອງພຣະເຈົ້າຢາເວກໍດັງທົ່ວທັງມະຫາສະໝຸດດ້ວຍ. 4 ສຽງຂອງພຣະເຈົ້າຢາເວມີຣິດເດດ ສຽງຂອງພຣະເຈົ້າຢາເວໜ້າຢ້ານກົວ. 5 ສຽງຂອງພຣະເຈົ້າຢາເວຜ່າຕົ້ນແປກທັງຫລາຍລົງ ພຣະເຈົ້າຢາເວຜ່າແມ່ນແຕ່ຕົ້ນແປກທີ່ຢູ່ດົງເລບານອນນັ້ນ. 6 ພຣະອົງໃຫ້ພູເລບານອນເຕັ້ນດັ່ງງົວນ້ອຍທັງຫລາຍ ແລະເຮັດໃຫ້ພູເຂົາເຮີໂມນເຕັ້ນດັ່ງຝູງງົວໜຸ່ມ. 7 ສຽງຂອງພຣະເຈົ້າຢາເວກໍດັງອອກໄປ ກ້ອງກັງວານເຮັດໃຫ້ຟ້າແມບເຫລື້ອມ. 8 ສຽງຂອງພຣະເຈົ້າຢາເວສັ່ນຖິ່ນແຫ້ງແລ້ງກັນດານ ພຣະເຈົ້າຢາເວສັ່ນຖິ່ນແຫ້ງແລ້ງກັນດານກາເດັດດ້ວຍ. 9 ສຽງຂອງພຣະເຈົ້າຢາເວນັ້ນສັ່ນຕົ້ນໂອກທັງຫລາຍ ແລະເຮັດໃຫ້ໃບໄມ້ຫລົ່ນລົງສູ່ພື້ນ ໃນຂະນະທີ່ທຸກຄົນຮ້ອງໃນພຣະວິຫານຂອງພຣະອົງວ່າ, “ສະຫງ່າຣາສີ.” 10 ພຣະເຈົ້າຢາເວປົກຄອງເໜືອນໍ້າເລິກທັງຫລາຍ ພຣະເຈົ້າຢາເວນັ່ງປົກຄອງດັ່ງກະສັດຕະຫຼອດໄປເປັນນິດ. 11 ພຣະເຈົ້າຢາເວໃຫ້ເຫື່ອແຮງແກ່ປະຊາຊົນຂອງພຣະອົງ ພຣະເຈົ້າຢາເວອວຍພອນປະຊາຊົນຂອງພຣະອົງໃຫ້ມີສັນຕິສຸກ. |
@ 2012 United Bible Societies. All Rights Reserved.