ເພງ^ສັນລະເສີນ 27 - ພຣະຄຳພີສັກສິພຣະເຈົ້າເປັນຄວາມສະຫວ່າງ ແລະເປັນຄວາມພົ້ນຂອງຂ້ານ້ອຍ 1 ພຣະເຈົ້າຢາເວຊົງເປັນຄວາມສະຫວ່າງ ແລະເປັນຜູ້ຊ່ວຍໃຫ້ພົ້ນຂອງຂ້ານ້ອຍ ຂ້ານ້ອຍຈະບໍ່ຢ້ານກົວຜູ້ໃດທັງນັ້ນ ພຣະເຈົ້າຢາເວຊົງຄຸ້ມຄອງຂ້ານ້ອຍຈາກອັນຕະລາຍທຸກຢ່າງ ແລະຂ້ານ້ອຍກໍຈະບໍ່ຢ້ານກົວແຕ່ປະການໃດທັງສິ້ນ. 2 ເມື່ອຄົນຊົ່ວໂຈມຕີທັງຫາທາງທີ່ຈະສັງຫານ ພວກເຂົາກໍຈະຖືກຕ້ານທານໂດຍເຕະສະດຸດລົ້ມ. 3 ເຖິງແມ່ນກອງທັບທັງໝົດອ້ອມຂ້ານ້ອຍໄວ້ທຸກແຈ ຫົວໃຈຂອງຂ້ານ້ອຍກໍຈະບໍ່ຢ້ານກົວແຕ່ປະການໃດທັງສິ້ນ ເຖິງແມ່ນເຫຼົ່າສັດຕູໂຈມຕີຂ້ານ້ອຍກໍຕາມ ຂ້ານ້ອຍກໍຍັງຈະໄວ້ວາງໃຈໃນພຣະເຈົ້າ. 4 ຂ້ານ້ອຍຂໍຈາກພຣະເຈົ້າຢາເວພຽງແຕ່ສິ່ງດຽວ ແມ່ນສິ່ງດຽວເທົ່ານັ້ນທີ່ຂ້ານ້ອຍຢາກໄດ້ ຄື: ໃຫ້ຂ້ານ້ອຍໄດ້ຢູ່ໃນວິຫານຂອງພຣະເຈົ້າຢາເວຕະຫລອດໄປ ເພື່ອຈະເບິ່ງຄວາມງາມຂອງພຣະເຈົ້າຢາເວ ແລະເພື່ອຈະພິຈາລະນາຮຽນຮູ້ໃນພຣະວິຫານຂອງພຣະອົງ. 5 ໃນຍາມຍາກລຳບາກພຣະອົງຈະເປັນຮົ່ມໃຫ້ຂ້ານ້ອຍ ພຣະອົງຈະຮັກສາຂ້ານ້ອຍໄວ້ ຢູ່ໃນພຣະວິຫານຂອງພຣະອົງ ແລະໃຫ້ຂ້ານ້ອຍຢູ່ເທິງໂງ່ນຫີນສູງຢ່າງປອດໄພ. 6 ສະນັ້ນ ຂ້ານ້ອຍຈຶ່ງຈະມີໄຊເໜືອເຫຼົ່າສັດຕູ ທີ່ພາກັນລ້ອມຂ້ານ້ອຍຢູ່ນັ້ນ. ຂ້ານ້ອຍຈະຖວາຍບູຊາໃນພຣະວິຫານດ້ວຍສຽງໂຮຮ້ອງຍິນດີ ທັງຮ້ອງເພງຖວາຍສັນລະເສີນພຣະເຈົ້າຢາເວ. 7 ຂ້າແດ່ພຣະເຈົ້າຢາເວ ເມື່ອຂ້ານ້ອຍຮ້ອງຫາ ຂໍຊົງໂຜດຮັບຟັງ ເມດຕາແລະຕອບຂ້ານ້ອຍດ້ວຍ 8 ໃຈຂອງຂ້ານ້ອຍກ່າວຕາງພຣະອົງວ່າ, “ຈົ່ງສະແຫວງຫາພຣະພັກຂອງເຮົາ.” ຂ້ານ້ອຍຕອບວ່າ, “ຂ້າແດ່ພຣະເຈົ້າຢາເວ ຂ້ານ້ອຍຈະສະແຫວງຫາພຣະພັກຂອງພຣະອົງ.” 9 ຂໍແຕ່ພຣະອົງຢ່າປິ່ນໜ້າໜີຈາກຂ້ານ້ອຍເລີຍ. ຂໍຢ່າຄຽດ ແລະໄລ່ຜູ້ຮັບໃຊ້ຂອງພຣະອົງໜີໄປ ພຣະອົງເຄີຍເປັນຜູ້ຊ່ວຍເຫຼືອເອົາຂ້ານ້ອຍໄວ້ ຂໍຢ່າໜີຈາກແລະຢ່າປະປ່ອຍຂ້ານ້ອຍໄປເລີຍ ໂອ ຂ້າແດ່ພຣະເຈົ້າ ພຣະຜູ້ຊ່ວຍໃຫ້ພົ້ນຂອງຂ້ານ້ອຍ. 10 ພໍ່ແມ່ຂ້ານ້ອຍອາດປະປ່ອຍຂ້ານ້ອຍໄປ ແຕ່ພຣະເຈົ້າຢາເວຈະຮັກສາຂ້ານ້ອຍໄວ້. 11 ຂ້າແດ່ພຣະເຈົ້າຢາເວ ຂໍຊົງໂຜດສັ່ງສອນ ສິ່ງທີ່ພຣະອົງຢາກໃຫ້ຂ້ານ້ອຍກະທຳນັ້ນ ໂຜດນຳພາໄປໃນທາງທີ່ປອດໄພ ເພາະຂ້ານ້ອຍມີສັດຕູຫລາຍ. 12 ຢ່າປະປ່ອຍຂ້ານ້ອຍໃຫ້ເຫຼົ່າສັດຕູ ຜູ້ທີ່ໂຈມຕີດ້ວຍຄຳຕົວະແລະການຂົ່ມຂູ່. 13 ຂ້ານ້ອຍໝັ້ນໃຈວ່າຂ້ານ້ອຍຍັງຈະເຫັນ ພຣະຄຸນຄວາມດີຂອງພຣະເຈົ້າຢາເວຢູ່ໃນຊີວິດນີ້. 14 ຈົ່ງໄວ້ວາງໃຈແລະມີຄວາມເຊື່ອໃນພຣະເຈົ້າຢາເວ ຈົ່ງເຂັ້ມແຂງແລະຢ່າໝົດຫວັງໃນພຣະເຈົ້າຢາເວຈັກເທື່ອ. |
@ 2012 United Bible Societies. All Rights Reserved.