ເພງ^ສັນລະເສີນ 25 - ພຣະຄຳພີສັກສິຄຳພາວັນນາອະທິຖານຂໍຊົງນຳພາແລະການຄຸ້ມຄອງ 1 ຂ້າແດ່ພຣະເຈົ້າຢາເວ ຂ້ານ້ອຍນົບນ້ອມຖວາຍ ຄຳພາວັນນາອະທິຖານດ້ວຍຈິດວິນຍານຫາພຣະອົງ. 2 ພຣະເຈົ້າຂອງຂ້ານ້ອຍເອີຍ ຂ້ານ້ອຍໄວ້ວາງໃຈໃນພຣະອົງ ຂໍຊົງໂຜດຊ່ວຍໃຫ້ຂ້ານ້ອຍພົ້ນຈາກຄວາມພ່າຍແພ້ອັນອັບອາຍ ແລະຢ່າໃຫ້ສັດຕູໄດ້ຫົວເຍາະເຍີ້ຍໃສ່ຂ້ານ້ອຍ 3 ຜູ້ທີ່ວາງໃຈໃນພຣະອົງຈະບໍ່ພ່າຍແພ້ເລີຍ ແຕ່ຜູ້ທີ່ກະບົດຕໍ່ສູ້ພຣະອົງນັ້ນຈະໄດ້ຮັບຄວາມອັບອາຍ. 4 ຂ້າແດ່ພຣະເຈົ້າຢາເວ ເປັນເຈົ້າ ຂໍຊົງໂຜດສັ່ງສອນທາງຂອງພຣະອົງ ແລະເຮັດໃຫ້ຂ້ານ້ອຍຮູ້ທາງເຫຼົ່ານັ້ນແດ່ທ້ອນ. 5 ຂໍຊົງໂຜດສັ່ງສອນໃຫ້ໃຊ້ຊີວິດໃນຄວາມຈິງຂອງພຣະອົງ ເພາະພຣະອົງເປັນພຣະເຈົ້າຂອງຂ້ານ້ອຍ ພຣະຜູ້ຊ່ວຍຂອງຂ້ານ້ອຍເລື້ອຍໆມາ ຂ້ານ້ອຍຈຶ່ງໄວ້ວາງໃຈໃນພຣະອົງຕະຫລອດມາບໍ່ຂາດ. 6 ຂ້າແດ່ພຣະເຈົ້າຢາເວ ຂໍຊົງໂຜດລະນຶກເຖິງ ຄວາມເມດຕາກັບຄວາມຮັກອັນໝັ້ນຄົງຂອງພຣະອົງ ຊຶ່ງພຣະອົງໄດ້ສຳແດງແກ່ຂ້ານ້ອຍ ໃຫ້ໄດ້ເຫັນແຕ່ດົນນານມາແລ້ວ. 7 ຂໍຊົງໂຜດອະໄພການບາບກັບຄວາມຜິດຂອງຂ້ານ້ອຍ ຊຶ່ງໄດ້ກະທຳໃນເວລາຍັງໜຸ່ມນ້ອຍ. ຂ້າແດ່ພຣະເຈົ້າຢາເວ ຂໍຊົງໂຜດລະນຶກເຖິງຂ້ານ້ອຍດ້ວຍ ເພາະເຫັນແກ່ຄວາມຮັກອັນໝັ້ນຄົງ ແລະພຣະຄຸນຄວາມດີຂອງພຣະອົງນັ້ນ. 8 ເພາະພຣະເຈົ້າຢາເວຊອບທຳແລະຊົງຄຸນຄວາມດີ ສັ່ງສອນຄົນບາບໃຫ້ຮູ້ທາງທີ່ພວກເຂົາຈະປະພຶດ. 9 ພຣະອົງນຳຜູ້ທີ່ຖ່ອມຕົວໄປໃນທາງອັນຊອບທຳ ແລະສັ່ງສອນພວກເຂົາໃຫ້ຮູ້ເຖິງພຣະປະສົງດ້ວຍ. 10 ທາງຂອງພຣະເຈົ້າຢາເວນັ້ນແມ່ນຄວາມຮັກແລະຄວາມສັດຊື່ ສຳລັບຜູ້ທີ່ຮັກສາພັນທະສັນຍາແລະເຊື່ອຟັງຂໍ້ຄຳສັ່ງຂອງພຣະອົງ. 11 ຂ້າແດ່ພຣະເຈົ້າຢາເວ ຂ້ານ້ອຍນີ້ມີບາບຫລາຍ ຂໍຊົງໂຜດຮັກສາພຣະສັນຍາແລະອະໄພບາບກຳໃຫ້ດ້ວຍ. 12 ຜູ້ທີ່ຢຳເກງພຣະເຈົ້າຢາເວກໍຈະໄດ້ຮໍ່າຮຽນຈາກພຣະອົງ ໃຫ້ຮູ້ທາງທີ່ພວກຕົນຈະປະພຶດ. 13 ແລ້ວພວກເຂົາກໍຈະໄດ້ຈະເລີນຮຸ່ງເຮືອງຂຶ້ນ ແລະເຊື້ອສາຍຂອງພວກເຂົາຈະໄດ້ເປັນເຈົ້າຂອງດິນແດນດ້ວຍ. 14 ພຣະເຈົ້າຢາເວເປັນເພື່ອນກັບຜູ້ທີ່ຢຳເກງພຣະອົງ ແລະໃຫ້ພັນທະສັນຍາຍືນຍົງຢູ່ກັບເຂົາເຈົ້າ. 15 ຂ້ານ້ອຍຊອກຫາພຣະເຈົ້າຢາເວໃຫ້ຊ່ວຍທຸກເວລາ ພຣະອົງຊ່ວຍກູ້ເອົາຂ້ານ້ອຍຈາກອັນຕະລາຍນັ້ນ. 16 ຂໍຊົງໂຜດຫັນມາຫາຂ້ານ້ອຍແລະເມດຕາຂ້ານ້ອຍດ້ວຍ ເພາະຂ້ານ້ອຍອ່ອນແຮງແລະໂດດດ່ຽວ. 17 ຂໍພຣະອົງໂຜດໃຫ້ຫາຍຈາກຄວາມກັງວົນ ແລະຊ່ວຍໃຫ້ພົ້ນຈາກຄວາມລຳບາກທັງໝົດ. 18 ຂໍຊົງໂຜດເບິ່ງວ່າຂ້ານ້ອຍທຸກໂສກເທົ່າໃດ ໂຜດອະໄພບາບກຳໃຫ້ແກ່ຂ້ານ້ອຍດ້ວຍ. 19 ເບິ່ງດູວ່າຂ້ານ້ອຍມີສັດຕູຫລາຍເທົ່າໃດ ພວກເຂົາກຽດຊັງຂ້ານ້ອຍຫລາຍເທົ່າໃດແລ້ວ. 20 ຂໍຄຸ້ມຄອງແລະຊ່ວຍຂ້ານ້ອຍໃຫ້ພົ້ນໄພ ຂໍຢ່າໃຫ້ຂ້ານ້ອຍພ່າຍແພ້ເລີຍ ຂ້ານ້ອຍມາຫາພຣະອົງເພື່ອຄວາມປອດໄພ. 21 ຂໍຄວາມດີແລະຄວາມສັດຊື່ນັ້ນປົກປັກຮັກສາ ເພາະວ່າຂ້ານ້ອຍໄວ້ວາງໃຈໃນພຣະເຈົ້າ. 22 ຂ້າແດ່ພຣະເຈົ້າ ຂໍຊົງໂຜດໄຖ່ເອົາຊາວອິດສະຣາເອນ ພົ້ນຈາກຄວາມທຸກລຳບາກຂອງພວກເຂົາດ້ວຍເຖີດ. |
@ 2012 United Bible Societies. All Rights Reserved.