ເພງ^ສັນລະເສີນ 22 - ພຣະຄຳພີສັກສິການຮ້ອງໄຫ້ຄໍ່າຄວນແລະບົດເພງສັນລະເສີນ 1 ພຣະເຈົ້າຂອງຂ້ານ້ອຍ ພຣະເຈົ້າຂອງຂ້ານ້ອຍເອີຍ ເຫດໃດພຣະອົງຈຶ່ງໄດ້ປະຖິ້ມຂ້ານ້ອຍ? ຂ້ານ້ອຍຮ້ອງຂໍໃຫ້ຊ່ວຍເຫລືອຢ່າງສຸດກຳລັງ ເປັນຫຍັງຄວາມຊ່ວຍເຫຼືອຈຶ່ງຢູ່ຫ່າງໄກຂ້ານ້ອຍແທ້. 2 ຂ້າແດ່ພຣະເຈົ້າຂອງຂ້ານ້ອຍ ຂ້ານ້ອຍຮ້ອງຫາໃນກາງເວັນ ແຕ່ພຣະອົງບໍ່ໃຫ້ຄຳຕອບ ຂ້ານ້ອຍເອີ້ນຫາພຣະອົງໃນເວລາກາງຄືນ ຈົນວ່າບໍ່ໄດ້ຮັບການພັກຜ່ອນ. 3 ແຕ່ອົງຊົງບໍຣິສຸດນັ່ງທີ່ເທິງບັນລັງຂອງພຣະອົງ ອົງທີ່ຊາວອິດສະຣາເອນໃຫ້ຄຳຍ້ອງຍໍສັນລະເສີນນັ້ນ. 4 ປູ່ຍ່າຕາຍາຍຂອງພວກຂ້ານ້ອຍໄວ້ວາງໃຈໃນພຣະອົງ ພວກເພິ່ນໄວ້ວາງໃຈພຣະອົງຈຶ່ງຊ່ວຍກູ້ເອົາພວກເພິ່ນໄວ້. 5 ພວກເພິ່ນຮ້ອງຫາພຣະອົງແລະໄດ້ທີ່ພົ້ນອັນຕະລາຍ ພວກເພິ່ນໄວ້ວາງໃຈໃນພຣະອົງແລະບໍ່ໄດ້ສູນເສຍຄວາມຫວັງ. 6 ຂ້ານ້ອຍບໍ່ແມ່ນມະນຸດແຕ່ເປັນພຽງໂຕໜອນ ທີ່ທຸກຄົນຫຍໍ້ຫຍັນແລະກຽດຊັງ 7 ທຸກຄົນທີ່ເຫັນຂ້ານ້ອຍຕ່າງກໍຫົວຂວັນ ແລບລີ້ນແລະແກວ່ງຫົວໃສ່ຂ້ານ້ອຍ. 8 ພວກເຂົາເວົ້າວ່າ, “ເຈົ້າຜູ້ເພິ່ງພຣະເຈົ້າຢາເວເອີຍ ເປັນຫຍັງພຣະອົງບໍ່ມາຊ່ວຍກູ້ເອົາເຈົ້າ? ຖ້າພຣະອົງພໍໃຈໃນຕົວເຈົ້າແທ້ນັ້ນ ເປັນຫຍັງພຣະອົງບໍ່ມາຊ່ວຍເຫຼືອເອົາເຈົ້າໄວ້?” 9 ເມື່ອຂ້ານ້ອຍເກີດ ພຣະອົງໃຫ້ຄວາມປອດໄພ ເມື່ອຍັງເຍົາໄວແມ່ນພຣະອົງທີ່ໄດ້ຮັກສາໄວ້. 10 ຂ້ານ້ອຍເພິ່ງພຣະອົງຕັ້ງແຕ່ມື້ໄດ້ເກີດມາ ພຣະອົງເປັນພຣະເຈົ້າຂອງຂ້ານ້ອຍມາຕະຫລອດ. 11 ຂໍພຣະອົງຢ່າຢູ່ຫ່າງໄກຂ້ານ້ອຍ ຍ້ອນວ່າຄວາມເດືອດຮ້ອນຢູ່ໃກ້ແລ້ວ ແລະບໍ່ມີຜູ້ໃດທີ່ຈະຊ່ວຍຊີວິດຂອງຂ້ານ້ອຍໄວ້ໄດ້. 12 ສັດຕູດັ່ງຝູງງົວປ່າອ້ອມຂ້ານ້ອຍໄວ້ທຸກແຈ ດັ່ງງົວປ່າຮ້າຍແຕ່ເຂດບາຊານທີ່ປິດລ້ອມໄວ້. 13 ພວກເຂົາອ້າປາກໃສ່ເໝືອນດັ່ງຝູງໂຕສິງ ທີ່ກຳລັງຮ້ອງແຜດສຽງແລະຈະກັດກິນເນື້ອ. 14 ເຫື່ອແຮງຂອງຂ້ານ້ອຍກໍໄດ້ສູນເສຍໄປ ດັ່ງນໍ້າທີ່ໄຫລຊະໄປຕາມພື້ນດິນນັ້ນ. ກະດູກຂອງຂ້ານ້ອຍທຸກຊີກກໍບໍ່ຕິດຕໍ່ກັນ ຈິດໃຈຂອງຂ້ານ້ອຍກໍເປື່ອຍໄປດັ່ງຂີ້ເຜິ້ງ. 15 ລຳຄໍ ຂອງຂ້ານ້ອຍກໍແຫ້ງເໝືອນດັ່ງຂີ້ຝຸ່ນດິນລີ້ນກໍຫົດຕິດເຫລືອກເບື້ອງເທິງ ພຣະອົງປະຂ້ານ້ອຍຕາຍໃນແດນມໍຣະນາເສຍແລ້ວ. 16 ກຸ່ມຄົນຊົ່ວຮ້າຍກໍອ້ອມຮອບຂ້ານ້ອຍໄວ້ຄືກັບຝູງໝາອ້ອມຮອບຂ້ານ້ອຍ; ໝາຍຈະກັດກິນທັງແທງ ມືແທງຕີນຂອງຂ້ານ້ອຍ. 17 ກະດູກທຸກຊີກຂອງຂ້ານ້ອຍຖືກນັບໄດ້ໝົດ ຄູ່ປໍລະປັກຂອງຂ້ານ້ອຍສັກຕາໃສ່ຂ້ານ້ອຍດ້ວຍ. 18 ພວກເຂົາຈົກສະຫລາກເພື່ອເອົາເສື້ອຂອງຂ້ານ້ອຍໄປ ແລະກໍແບ່ງປັນກັນໃນທ່າມກາງພວກເຂົາເຈົ້າ. 19 ໂອ ຂ້າແດ່ພຣະເຈົ້າຢາເວ ຂໍຢ່າຢູ່ຫ່າງໄກຈາກຂ້ານ້ອຍເລີຍ ຂໍຊົງເລັ່ງມາຊ່ວຍເຫຼືອເອົາຂ້ານ້ອຍແດ່ທ້ອນ 20 ໂຜດຊ່ວຍຂ້ານ້ອຍໃຫ້ພົ້ນຈາກຄົມດາບ ແລະຊ່ວຍຊີວິດຂອງຂ້ານ້ອຍໃຫ້ພົ້ນຈາກຝູງໝາຮ້າຍເຫຼົ່ານີ້ແດ່ທ້ອນ. 21 ໂຜດຊ່ວຍກູ້ເອົາຂ້ານ້ອຍຈາກຝູງສິງນີ້ແດ່ ແລະປ້ອງກັນຂ້ານ້ອຍຈາກຝູງງົວປ່າ. 22 ຂ້ານ້ອຍຈະປະກາດພຣະນາມຂອງພຣະອົງ ຕໍ່ພວກພີ່ນ້ອງຂອງຂ້ານ້ອຍທີ່ພຣະອົງໄດ້ຊົງກະທຳ ແລ້ວຂ້ານ້ອຍຈະສັນລະເສີນພຣະອົງໃນທີ່ປະຊຸມຂອງພວກເຂົາວ່າ 23 “ພວກເຈົ້າຜູ້ຢຳເກງພຣະເຈົ້າຢາເວເອີຍ ຈົ່ງຍ້ອງຍໍສັນລະເສີນພຣະອົງ ພວກເຈົ້າຜູ້ເປັນເຊື້ອສາຍຂອງຢາໂຄບເອີຍ ຈົ່ງຍ້ອງຍໍໃຫ້ກຽດພຣະອົງ ພວກເຈົ້າຜູ້ເປັນປະຊາຊົນອິດສະຣາເອນເອີຍ ຈົ່ງນະມັດສະການພຣະອົງ. 24 ຄົນທຸກຈົນພຣະອົງບໍ່ປະຖິ້ມ ແຕ່ສົນໃຈຍ້ອນພວກເຂົາທົນທຸກ ພຣະອົງບໍ່ຫັນໜີ ແຕ່ຕອບສິ່ງທີ່ເຂົາເຈົ້າຮ້ອງຂໍ.” 25 ຂ້ານ້ອຍຈະສັນລະເສີນພຣະອົງ ໃນທີ່ຊຸມນຸມໃຫຍ່ ສຳລັບສິ່ງທີ່ພຣະອົງໄດ້ກະທຳນັ້ນ ຂ້ານ້ອຍຈະຖວາຍບູຊາຕາມທີ່ໄດ້ສາບານໄວ້ ຢູ່ຊ້ອງໜ້າພວກທີ່ນະມັດສະການພຣະອົງ 26 ຄົນທຸກຈົນຈະກິນອີ່ມ ແລະເພິ່ງພໍໃຈ ເປັນພວກທີ່ມາເພິ່ງພາອາໄສໃນພຣະເຈົ້າຢາເວ ພວກເຂົາຈະພາກັນຮ້ອງຍົກຍໍພຣະນາມ ຂໍໃຫ້ພວກເຂົາຈະເລີນຮຸ່ງເຮືອງໄປເລື້ອຍໆເທີ້ນ. 27 ທຸກມູມໂລກ ທຸກຊົນຊາດຈະຄິດເຖິງແລະກັບຄືນມາຫາພຣະເຈົ້າຢາເວ ທຸກເຊື້ອຊາດພາສາຈະນະມັດສະການພຣະອົງ. 28 ທຸກຊົນຊາດເປັນຂອງພຣະເຈົ້າຢາເວ ພຣະອົງປົກຄອງເໜືອຊົນຊາດທັງຫລາຍ. 29 ທຸກຄົນທີ່ໂອ້ອວດຈອງຫອງນັ້ນ ຈະກົ້ມຂາບພຣະອົງ ມະນຸດທີ່ຕາຍເປັນຈະກົ້ມຂາບພຣະອົງ. 30 ຄົນຮຸ່ນຫລັງຈະບົວລະບັດຮັບໃຊ້ພຣະອົງ ຄົນຈະກ່າວສູ່ເຊັ່ນລູກຫລານເຖິງພຣະເຈົ້າຢາເວ. 31 ຄົນທີ່ຍັງບໍ່ທັນເກີດກໍຈະໄດ້ຮູ້ຂ່າວວ່າ, “ພຣະເຈົ້າຊ່ວຍປະຊາຊົນຂອງພຣະອົງໃຫ້ພົ້ນໄພ.” |
@ 2012 United Bible Societies. All Rights Reserved.