ເພງ^ສັນລະເສີນ 2 - ພຣະຄຳພີສັກສິກະສັດທີ່ພຣະເຈົ້າເລືອກ 1 ເປັນຫຍັງບັນດາຊົນຊາດທັງປວງຈຶ່ງກໍ່ແຜນການກະບົດ? ເປັນຫຍັງປະຊາຊົນຈຶ່ງວາງອຸບາຍອັນໄຮ້ປະໂຫຍດ? 2 ກະສັດ, ພວກຜູ້ປົກຄອງຂອງພວກເຂົາ ກໍລຸກຂຶ້ນຕໍ່ຕ້ານ ພວກເຂົາຮ່ວມໃຈກັນວາງອຸບາຍ ຕໍ່ສູ້ພຣະເຈົ້າຢາເວແລະຕໍ່ສູ້ກະສັດ ທີ່ພຣະອົງຫົດສົງໄວ້. 3 ພວກເຂົາກ່າວວ່າ, “ຂໍໃຫ້ພວກເຮົາໄດ້ພົບອິດສະຫລະ ຈາກການປົກຄອງຂອງພວກເພິ່ນນັ້ນ. ຈົ່ງໃຫ້ພວກເຮົາປົດການຄວບຄຸມ ຂອງພວກເພິ່ນນັ້ນອອກໜີໄປ.” 4 ແຕ່ຜູ້ປະທັບເທິງຟ້າສະຫວັນໄດ້ຫົວຂວັນ ແລະພຣະເຈົ້າຢາເວຫຍໍ້ຫຍັນພວກເຂົາ. 5 ແລ້ວພຣະອົງໄດ້ເຕືອນພວກເຂົາດ້ວຍຄວາມໂກດຮ້າຍ ແລະເຮັດໃຫ້ພວກເຂົາຕົກໃຈຢ້ານກົວຍ້ອນພຣະອົງໂມໂຫ. 6 ພຣະອົງກ່າວວ່າ, “ເຮົາໄດ້ແຕ່ງຕັ້ງກະສັດຂອງເຮົາ; ຢູ່ເທິງພູເຂົາຊີໂອນ ພູສັກສິດຂອງເຮົາ.” 7 ກະສັດກ່າວວ່າ, “ເຮົາຈະປ່າວປະກາດຕາມຄຳ ທີ່ພຣະເຈົ້າຢາເວໄດ້ບອກນັ້ນ” ພຣະອົງໄດ້ກ່າວຕໍ່ເຮົາວ່າ, “ເຈົ້າເປັນລູກຊາຍຂອງເຮົາ ເຮົາເປັນບິດາຂອງເຈົ້າ.” 8 ຈົ່ງຂໍມາເຖີດ ເຮົາຈະໃຫ້ຊົນຊາດທັງໝົດ; ແຜ່ນດິນໂລກທັງປວງເປັນກຳມະສິດຂອງເຈົ້າ. 9 ເຈົ້າຈະຂ້ຽນພວກເຂົາດ້ວຍໄມ້ແສ້ເຫຼັກ; ຈະທຸບພວກເຂົາດັ່ງທຸບໝໍ້ດິນແຕກເປັນປ່ຽງໆ. 10 ບັດນີ້ ບັນດາກະສັດເອີຍ ຈົ່ງຟັງຄຳຕັກເຕືອນນີ້; ພວກຜູ້ປົກຄອງໂລກເອີຍ ຈົ່ງຮຽນເອົາບົດຮຽນນີ້: 11-12 ຈົ່ງຮັບໃຊ້ພຣະເຈົ້າຢາເວດ້ວຍຄວາມຢຳເກງ; ຈົ່ງຂາບລົງຢ່າງສະທ້ານຢ້ານຢຳຕໍ່ໜ້າພຣະເຈົ້າ; ຫລືຈະໃຫ້ຄວາມໂກດຮ້າຍຂອງພຣະອົງລຸກຂຶ້ນໄວ ພວກເຈົ້າກໍຈະຕາຍຢ່າງກະທັນຫັນໂລດ. ຄວາມສຸກເປັນຂອງທຸກຄົນທີ່ໄດ້ມາຂໍ ການປົກປ້ອງຄຸ້ມຄອງຈາກພຣະອົງ. |
@ 2012 United Bible Societies. All Rights Reserved.