ເພງ^ສັນລະເສີນ 17 - ພຣະຄຳພີສັກສິຄຳພາວັນນາອະທິຖານຂອງຄົນຊອບທຳ 1 ຂ້າແດ່ພຣະເຈົ້າຢາເວ ຂໍຊົງໂຜດຟັງຂ້ານ້ອຍດ້ວຍ ໂຜດຟັງຄຳພາວັນນາອະທິຖານຮ້ອງຂໍຄວາມຍຸດຕິທຳດ້ວຍ ໂຜດເອົາໃຈໃສ່ຕໍ່ສິ່ງທີ່ຂ້ານ້ອຍຂໍໃຫ້ຊ່ວຍເຫລືອ ໂຜດຟັງຄຳພາວັນນາອະທິຖານຢ່າງຈິງໃຈດ້ວຍ. 2 ຂໍໃຫ້ພຣະອົງຕັດສິນເຂົ້າຂ້າງຂ້ານ້ອຍ ເພາະພຣະອົງຊົງເຫັນວ່າ ອັນໃດເປັນສິ່ງທີ່ຖືກຕ້ອງ. 3 ເມື່ອພຣະອົງຊົງກວດເບິ່ງຈິດໃຈຂອງຂ້ານ້ອຍ. ພຣະອົງມາຫາຂ້ານ້ອຍໃນຕອນກາງຄືນ; ເມື່ອພຣະອົງໄດ້ກວດເບິ່ງຂ້ານ້ອຍ ແລະກໍບໍ່ພົບຄວາມປາຖະໜາຊົ່ວໃດໆ ຢູ່ໃນຈິດໃຈຂອງຂ້ານ້ອຍ. 4 ຂ້ານ້ອຍບໍ່ໄດ້ເວົ້າຊົ່ວເໝືອນດັ່ງຄົນອື່ນໆເວົ້າກັນ ຂ້ານ້ອຍຖືຂໍ້ຄຳສັ່ງຂອງພຣະອົງທຸກໆຂໍ້ ແລະບໍ່ຢຶດທາງຮຸນແຮງດ້ວຍ. 5 ຂ້ານ້ອຍເດີນຕາມທາງທີ່ພຣະອົງສັ່ງສອນສະເໝີ ແລະບໍ່ເຄີຍຫລີກໜີຈາກທາງນັ້ນຈັກເທື່ອ. 6 ຂ້າແດ່ພຣະເຈົ້າ ຂ້ານ້ອຍພາວັນນາອະທິຖານຫາພຣະອົງ ເພາະພຣະອົງຕອບຄຳພາວັນນາອະທິຖານຂອງຂ້ານ້ອຍແລ້ວ ສະນັ້ນ ໂຜດຫັນມາຫາຂ້ານ້ອຍແດ່ທ້ອນ ແລະຟັງຄຳພາວັນນາອະທິຖານຂອງຂ້ານ້ອຍດ້ວຍ. 7 ຂໍຊົງໂຜດສຳແດງຄວາມຮັກອັນໝັ້ນຄົງຂອງພຣະອົງ ໂຜດຊ່ວຍເອົາຂ້ານ້ອຍດ້ວຍມືຂວາຂອງພຣະອົງແດ່ທ້ອນ ເມື່ອຢູ່ໃກ້ຊິດພຣະອົງກໍປອດໄພຈາກສັດຕູທັງສິ້ນ. 8-9 ຂໍຊົງໂຜດຄຸ້ມຄອງຂ້ານ້ອຍໄວ້ດັ່ງແກ້ວຕາຂອງພຣະອົງ ຂໍຊົງໂຜດປົກບັງຂ້ານ້ອຍໄວ້ໃຕ້ຮົ່ມປີກຂອງພຣະອົງ ແລະຊົງປົກປ້ອງຂ້ານ້ອຍໄວ້ຈາກການໂຈມຕີຂອງຄົນຊົ່ວຮ້າຍດ້ວຍ. 10 ສັດຕູຜູ້ໝາຍປອງຂ້າກໍອ້ອມຂ້າງຂ້ານ້ອຍຢູ່ ພວກເຂົາບໍ່ມີຄວາມເມດຕາແລະເວົ້າໂອ້ອວດຈອງຫອງ. 11 ບັດນີ້ ຂ້ານ້ອຍຖືກປິດລ້ອມແລະບໍ່ຮູ້ວ່າຈະຫັນໄປທາງໃດ ພວກເຂົາຊອກໂອກາດທີ່ຈະດຶງຂ້ານ້ອຍລົງໃຫ້ໄດ້. 12 ພວກເຂົາເປັນດັ່ງຝູງສິງໂຕຮ້າຍທີ່ຄອຍຖ້າເຫຍື່ອ ຊຶ່ງດັກຈັບ ເພື່ອກັດຈີກກິນຂ້ານ້ອຍເປັນຕ່ອນໆ. 13 ຂ້າແດ່ພຣະເຈົ້າຢາເວ ຂໍຊົງໂຜດລຸກຂຶ້ນ ຂັດຂວາງເຫຼົ່າສັດຕູຂອງຂ້ານ້ອຍໄວ້ດ້ວຍ ໂຜດໃຊ້ດາບຂອງພຣະອົງມາກຳຈັດສັດຕູເຫຼົ່ານັ້ນສາ ໂຜດຊ່ວຍຂ້ານ້ອຍໃຫ້ພົ້ນໄພແດ່ທ້ອນ 14 ຂ້າແດ່ພຣະເຈົ້າຢາເວ ໂຜດຊ່ວຍໃຫ້ພົ້ນຈາກຄົນເຫຼົ່ານີ້ ຄືຈາກມະນຸດທີ່ເຫັນແກ່ໄດ້ ໃນຊີວິດນີ້ພວກເຂົາເອົາໄດ້ທຸກສິ່ງທີ່ພວກເຂົາຕ້ອງການ. ໂຜດລົງໂທດພວກເຂົາໃຫ້ທົນທຸກໂດຍໂທດກຳ ທີ່ພວກເຂົາໄດ້ສະສົມໄວ້ນັ້ນ. ຂໍໃຫ້ພວກລູກຫລານຂອງເຂົາເຈົ້າ ໄດ້ຮັບໂທດກຳນັ້ນຈົນທົນບໍ່ໄຫວ ທັງປະໄວ້ໃຫ້ຫລານເຫຼັນຫລ້ອນ ຂອງພວກເຂົາເຊັ່ນຕໍ່ໆໄປອີກດ້ວຍ. 15 ແຕ່ຂ້ານ້ອຍຈະໄດ້ພົບພຣະອົງໃນຄວາມຊອບທຳ ເມື່ອຂ້ານ້ອຍຕື່ນມາຈິດໃຈກໍເບີກບານມ່ວນຊື່ນຢູ່ຊ້ອງໜ້າພຣະອົງ. |
@ 2012 United Bible Societies. All Rights Reserved.