ເພງ^ສັນລະເສີນ 145 - ພຣະຄຳພີສັກສິບົດເພງແຫ່ງຄຳສັນລະເສີນ 1 ຂ້ານ້ອຍຈະປະກາດຄວາມຍິ່ງໃຫຍ່ຂອງພຣະອົງ ພຣະເຈົ້າແລະກະສັດຂອງຂ້ານ້ອຍເອີຍ. ຂ້ານ້ອຍຈະໂມທະນາຂອບພຣະຄຸນພຣະອົງສືບໄປເປັນນິດ. 2 ຂ້ານ້ອຍຈະໂມທະນາຂອບພຣະຄຸນພຣະອົງທຸກໆວັນ ແລະຈະຍົກຍໍພຣະອົງສືບໆໄປເປັນນິດ. 3 ພຣະເຈົ້າຢາເວອົງຍິ່ງໃຫຍ່ ແລະເປັນທີ່ຍ້ອງຍໍສັນລະເສີນຢ່າງສູງສົ່ງ. ຄວາມຍິ່ງໃຫຍ່ຂອງພຣະອົງນັ້ນ ເໜືອກວ່າຄວາມເຂົ້າໃຈໄດ້. 4 ຈົ່ງໃຫ້ຄົນຊົ່ວອາຍຸນີ້ເວົ້າເຖິງພຣະຣາຊກິດຂອງພຣະອົງສູ່ຄົນອີກຊົ່ວອາຍຸໜຶ່ງຟັງ ແລະປະກາດກິດຈະການອັນຍິ່ງໃຫຍ່ທີ່ໄດ້ຊົງກະທຳນັ້ນ. 5 ພວກເຂົາຈະກ່າວເຖິງຣິດອຳນາດທັງສະຫງ່າຣາສີຂອງພຣະອົງ ຂ້ານ້ອຍຈະຮໍ່າເພິງເຖິງການອັດສະຈັນນັ້ນ. 6 ພວກເຂົາຈະເວົ້າເຖິງຣິດອຳນາດອັນຍິ່ງໃຫຍ່ທີ່ພຣະອົງໄດ້ກະທຳ ແລະຂ້ານ້ອຍຈະປະກາດເຖິງຣິດທານຸພາບອັນຍິ່ງໃຫຍ່ຂອງພຣະອົງ. 7 ພວກເຂົາຈະເວົ້າເຖິງຄຸນຄວາມດີຂອງພຣະອົງ ແລະສັນລະເສີນຄວາມຍຸດຕິທຳຂອງພຣະອົງ. 8 ພຣະເຈົ້າຢາເວເຕັມໄປດ້ວຍພຣະຄຸນແລະຄວາມເມດຕາ ໂກດຮ້າຍຊ້າແລະມີຄວາມຮັກອັນໝັ້ນຄົງ. 9 ພຣະເຈົ້າຢາເວກະທຳດີຕໍ່ມະນຸດທຸກໆຄົນ ແລະສົງສານຕໍ່ສັບພະທຸກສິ່ງທີ່ພຣະອົງໄດ້ສ້າງນັ້ນ. 10 ຂ້າແດ່ພຣະເຈົ້າຢາເວ ທຸກສິ່ງທີ່ຖືກສ້າງມາຈະຍ້ອງຍໍສັນລະເສີນພຣະອົງ ແລະປະຊາຊົນຂອງພຣະອົງຈະໂມທະນາຂອບພຣະຄຸນແດ່ພຣະອົງ. 11 ພວກເຂົາຈະກ່າວເຖິງພຣະຣາຊອຳນາດຂອງພຣະອົງ ແລະບອກເຖິງອຳນາດອັນຍິ່ງໃຫຍ່ຂອງພຣະອົງ. 12 ເພື່ອທຸກຄົນຈະໄດ້ຮູ້ກິດຈະການອັນຍິ່ງໃຫຍ່ ຣິດອຳນາດແລະຣັດສະໝີແຫ່ງຣາຊອານາຈັກຂອງພຣະອົງ. 13 ການຄອງອຳນາດຂອງພຣະອົງດຳລົງຢູ່ຕະຫລອດໄປ ແລະອຳນາດຂອງພຣະອົງກໍຍືນຍົງໄປຕະຫລອດ. ພຣະເຈົ້າຢາເວສັດຊື່ຕໍ່ຄຳສັນຍາຂອງພຣະອົງ ພຣະອົງມີໃຈເມດຕາຕໍ່ການກະທຳທັງສິ້ນ. 14 ພຣະເຈົ້າຢາເວຊ່ວຍຄົນທີ່ຢູ່ໃນຄວາມເດືອດຮ້ອນຂັດສົນ ແລະອູ້ມຊູຄົນທີ່ລົ້ມລົງໃຫ້ເຂົາລຸກຂຶ້ນໃໝ່. 15 ທຸກໆສິ່ງທີ່ມີຊີວິດຢູ່ກໍເບິ່ງພຣະອົງດ້ວຍຄວາມຫວັງ ລໍຖ້າພຣະອົງໃຫ້ອາຫານຕາມທີ່ຕ້ອງການນັ້ນ. 16 ພຣະອົງໂຜດໃຫ້ພວກເຂົາຢ່າງພຽງພໍ ແລະໃຫ້ສົມຄວາມປະສົງທຸກຄົນດ້ວຍ. 17 ພຣະເຈົ້າຢາເວເປັນຄວາມຊອບທຳໃນທຸກສິ່ງໃນທາງຂອງພຣະອົງ. ແລະຊົງເມດຕາໃນການກະທຳທຸກຢ່າງ. 18 ພຣະເຈົ້າຢາເວຢູ່ໃກ້ຊິດທຸກໆຄົນທີ່ຮ້ອງຫາພຣະອົງ ຄືຜູ້ທີ່ຮ້ອງຫາພຣະອົງຢ່າງຈິງໃຈແທ້. 19 ທຸກຄົນທີ່ໃຫ້ກຽດພຣະອົງກໍໄດ້ຕາມທີ່ຕ້ອງການ ພຣະອົງໄດ້ຍິນສຽງພວກເຂົາຮ້ອງໄຫ້ແລະຊ່ວຍເຂົາໃຫ້ພົ້ນ. 20 ພຣະເຈົ້າຢາເວປົກປັກຮັກສາຜູ້ທີ່ຮັກພຣະອົງທຸກຄົນ ແຕ່ພຣະອົງຈະທຳລາຍຜູ້ຊົ່ວຮ້າຍທຸກຄົນຖິ້ມ. 21 ຂ້ານ້ອຍຈະຍ້ອງຍໍສັນລະເສີນພຣະອົງຢູ່ສະເໝີ ຄືຈະສັນລະເສີນພຣະເຈົ້າຢາເວຢູ່ເລື້ອຍໆ. ຂໍໃຫ້ທຸກສິ່ງທີ່ຖືກສ້າງມາ ຈົ່ງຍ້ອງຍໍສັນລະເສີນ ພຣະນາມອັນບໍຣິສຸດຂອງພຣະອົງຕະຫລອດໄປເຖີດ. |
@ 2012 United Bible Societies. All Rights Reserved.