ເພງ^ສັນລະເສີນ 144 - ພຣະຄຳພີສັກສິຄຳພາວັນນາອະທິຖານຂໍໃຫ້ຊ່ວຍເຫລືອ 1 ສັນລະເສີນພຣະເຈົ້າຢາເວ ຜູ້ຄຸ້ມຄອງຂອງຂ້ານ້ອຍ ພຣະອົງຝຶກຂ້ານ້ອຍໃຫ້ສູ້ຮົບ ແລະຕຽມຂ້ານ້ອຍໃຫ້ເຮັດສົງຄາມ. 2 ພຣະອົງເປັນຜູ້ປົກປ້ອງ ແລະຜູ້ຄຸ້ມຄອງຂ້ານ້ອຍ ເປັນຜູ້ຊ່ວຍໃຫ້ພົ້ນໄພ ແລະເປັນທີ່ກຳບັງດ້ວຍ. ຂ້ານ້ອຍປອດໄພໄດ້ໂດຍໄວ້ວາງໃຈໃນພຣະອົງ ແລະປາບຊົນຊາດທັງຫລາຍໃຫ້ຢູ່ໃຕ້ອຳນາດຂອງພຣະອົງ. 3 ຂ້າແດ່ພຣະເຈົ້າຢາເວ ມະນຸດແມ່ນຜູ້ໃດທີ່ພຣະອົງຕ້ອງເອົາໃຈໃສ່ ມະນຸດທຳມະດາເປັນຫຍັງພຣະອົງຈຶ່ງເອົາໃຈໃສ່ພວກເຂົາ? 4 ມະນຸດນັ້ນເປັນເໝືອນດັ່ງລົມຫາຍໃຈ ວັນທັງຫລາຍຂອງເຂົາກໍເໝືອນດັ່ງເງົາມືດຜ່ານກາຍໄປນັ້ນ. 5 ຂ້າແດ່ພຣະເຈົ້າຢາເວ ໂຜດແຍກຟ້າສະຫວັນອອກ ແລະສະເດັດລົງມາ ໂຜດແຕະຕ້ອງພູຜາ ແລະຄວັນໄຟກໍຈະພຸ່ງອອກມາ. 6 ໂຜດສົ່ງຟ້າແມບຂັບໄລ່ພວກສັດຕູຂອງພຣະອົງໃຫ້ແຕກກະຈັດກະຈາຍ ໂຜດຍິງລູກທະນູຂອງພຣະອົງໄລ່ພວກເຂົາໃຫ້ພ່າຍໜີໄປ. 7 ໂຜດຍື່ນມືຂອງພຣະອົງລົງມາຈາກເບື້ອງເທິງ ແລະດຶງຂ້ານ້ອຍຂຶ້ນຈາກນໍ້າເລິກດ້ວຍ. ໂຜດຊ່ວຍກູ້ຂ້ານ້ອຍໃຫ້ພົ້ນຈາກອຳນາດຂອງສັດຕູ ຄືຈາກອຳນາດຂອງຊົນຊາດຕ່າງດ້າວ. 8 ພວກນີ້ບໍ່ເຄີຍເວົ້າຄວາມຈິງແຕ່ປະການໃດ ເວົ້າຕົວະຢູ່ເລື້ອຍ ແມ່ນແຕ່ຄຳສາບານກໍຕາມ. 9 ຂ້າແດ່ພຣະເຈົ້າ ຂ້ານ້ອຍຈະຮ້ອງເພງບົດໃໝ່ ທັງດີດກິດຕາ ແລະຮ້ອງເພງຖວາຍແດ່ພຣະອົງ. 10 ພຣະອົງໃຫ້ໄຊຊະນະແກ່ກະສັດທັງຫລາຍ ແລະຊ່ວຍກູ້ເອົາດາວິດຜູ້ຮັບໃຊ້ຂອງພຣະອົງໄວ້. 11 ຂໍຊົງໂຜດຊ່ວຍໃຫ້ຂ້ານ້ອຍພົ້ນຈາກສັດຕູຜູ້ໂຫດຮ້າຍ ແລະຈາກອຳນາດຂອງຊາວຕ່າງດ້າວ ຄືຜູ້ທີ່ບໍ່ເຄີຍເວົ້າຄວາມຈິງແຕ່ປະການໃດ ເວົ້າຕົວະຢູ່ເລື້ອຍແມ່ນແຕ່ຄຳສາບານກໍຕາມ. 12 ຂໍໃຫ້ລູກຊາຍຂອງຂ້ານ້ອຍເປັນດັ່ງຕົ້ນໄມ້ໃຫຍ່ ທີ່ໃຫຍ່ຂຶ້ນຢ່າງທ່ຽງທຳໃນໄວໜຸ່ມຂອງເຂົາເຈົ້າ. ຂໍໃຫ້ລູກສາວຂອງຂ້ານ້ອຍເປັນດັ່ງເສົາຕົ້ນໃຫຍ່ ທີ່ຖືກປະດັບໄວ້ເອ້ໃນພະຣາຊວັງ. 13 ຂໍໃຫ້ເລົ້າເຕັມໄປດ້ວຍພືດຜົນນາໆຊະນິດ ຂໍໃຫ້ຝູງແກະອອກລູກໄດ້ເປັນພັນໆຕາມທົ່ງເຖີດ. 14 ຂໍໃຫ້ຝູງງົວຂອງພວກຂ້ານ້ອຍອອກລູກໃຫ້ຫລາຍຂຶ້ນ ຂໍຢ່າໃຫ້ມີສຽງຮ້ອງໄຫ້ຮໍ່າໄຮຕາມທ້ອງຖະໜົນດ້ວຍ. 15 ຄວາມສຸກເປັນຂອງຊົນຊາດທີ່ຢູ່ຝ່າຍຄວາມຈິງ ເປັນຂອງປະຊາຊົນທີ່ມີພຣະເຈົ້າຢາເວເປັນພຣະເຈົ້າຂອງພວກເຂົາ. |
@ 2012 United Bible Societies. All Rights Reserved.