ເພງ^ສັນລະເສີນ 140 - ພຣະຄຳພີສັກສິຄຳພາວັນນາອະທິຖານຂໍການຄຸ້ມຄອງ 1 ຂ້າແດ່ພຣະເຈົ້າຢາເວ ຂໍຊົງໂຜດຊ່ວຍໃຫ້ຂ້ານ້ອຍພົ້ນຈາກຄົນເຮັດຊົ່ວແດ່ ໂຜດຮັກສາຂ້ານ້ອຍໃຫ້ປອດໄພຈາກຄົນໂຫດຮ້າຍແດ່ທ້ອນ. 2 ພວກເຂົາຄິດວາງແຜນຮ້າຍໃສ່ຂ້ານ້ອຍຢູ່ເລື້ອຍໄປ ແລະຍຸແຍ່ໃຫ້ຄົນຜິດຖຽງກັນຢູ່ຕະຫລອດ. 3 ລີ້ນຂອງພວກເຂົາຂ້າຄົນໄດ້ເໝືອນດັ່ງລີ້ນງູ ຄຳເວົ້າຂອງພວກເຂົາກໍເປັນດັ່ງພິດງູເຫົ່າ. 4 ຂ້າແດ່ພຣະເຈົ້າຢາເວ ຂໍຊົງໂຜດຄຸ້ມຄອງຂ້ານ້ອຍ ໃຫ້ພົ້ນຈາກອຳນາດຂອງຄົນຊົ່ວ, 5 ຄົນຈອງຫອງໄດ້ຫ້າງແຮ້ວໃຫ້ຂ້ານ້ອຍຖືກຈັບ ແລະວາງບ້ວງດັກຈັບຕາມທາງທີ່ໄປນັ້ນ. 6 ຂ້ານ້ອຍກ່າວຕໍ່ພຣະເຈົ້າຢາເວວ່າ, “ພຣະອົງເປັນພຣະເຈົ້າຂອງຂ້ານ້ອຍ. ຂ້າແດ່ພຣະເຈົ້າຢາເວ ຂໍຊົງໂຜດຟັງຄຳຮ້ອງຂໍໃຫ້ຊ່ວຍເຫລືອຂອງຂ້ານ້ອຍດ້ວຍ.” 7 ຂ້າແດ່ພຣະເຈົ້າຢາເວອົງພຣະຜູ້ເປັນເຈົ້າຂອງຂ້ານ້ອຍ ຜູ້ປ້ອງກັນທີ່ເຂັ້ມແຂງຂອງຂ້ານ້ອຍເອີຍ ພຣະອົງໄດ້ປົກປ້ອງຄຸ້ມຄອງຂ້ານ້ອຍໃນສະໜາມຮົບ. 8 ຂ້າແດ່ພຣະເຈົ້າຢາເວ ຂໍຢ່າໃຫ້ຄົນຊົ່ວໄດ້ຕາມທີ່ພວກເຂົາຕ້ອງການ ຢ່າໃຫ້ແຜນການຮ້າຍຂອງພວກເຂົາພົບຄວາມສຳເລັດຜົນ. 9 ຢ່າໃຫ້ພວກສັດຕູມີໄຊຊະນະເໜືອຂ້ານ້ອຍໄດ້ເລີຍ ໂຜດໃຫ້ຄຳນາບຂູ່ຂອງພວກເຂົາຕໍ່ສູ້ພວກເຂົາຄືນເຖີດ. 10 ຂໍໃຫ້ຖ່ານໄຟແດງລຸກໄໝ້ຕົກຖືກພວກເຂົາ ທັງໃຫ້ພວກເຂົາຕົກລົງໃນຂຸມແລະຢ່າໃຫ້ຂຶ້ນມາໄດ້. 11 ຂໍໃຫ້ຜູ້ທີ່ໃສ່ຮ້າຍປ້າຍສີຄົນອື່ນຢ່າໄດ້ເຮັດສຳເລັດຜົນ ຂໍໃຫ້ສິ່ງຊົ່ວຮ້າຍຕິດຕາມແລະທຳລາຍພວກເຂົາຖິ້ມ. 12 ຂ້ານ້ອຍຮູ້ວ່າພຣະເຈົ້າຢາເວປ້ອງກັນຄົນທຸກຈົນ ແລະສິດທິຂອງຄົນຂັດສົນດ້ວຍ. 13 ຝ່າຍຄົນຊອບທຳນັ້ນຈະຍ້ອງຍໍສັນລະເສີນພຣະອົງຢ່າງຈິງໃຈ ພວກເຂົາຈະໄດ້ອາໄສຢູ່ຊ້ອງໜ້າພຣະອົງ. |
@ 2012 United Bible Societies. All Rights Reserved.